46. पौलुस मसीही विशवासी बणेंके इलि

शाऊल मिन्दु इच्चा मीह तोहई अच़ि यीशु टोईच़ी विशवास माह लहज़ाते। अपेहल दू जवान तोहई, दोहपल दोई स्तिफनुसा बि सच़ा मीहतु खमज़ेतु रखवाली लहरी। थले, दोई विशवासी तिंङ तंग लहरी। दोई यरूशलेमा रिंङ चुंङ-चुंङ इलज़ि गङंमी या मेच़िमी झुल्ला तिंङ गिरफ्तार लहज़ि जेला रिंङ केहच़ी च़रति। दोहपल मोह्ड़े पुरोहिते शाऊला बि दमिश्क नगरंङ इबिमी हुकुम रांई। दोई दोरकी मसीह तिंङ गिरफ्तार लहज़िमी थल्जी ए दोतिंङ वापिस यरूशलेमो हखा वापिस हपिमी थल्जी शाऊलो हखा कुई।

दंङ शाऊले दमिश्को हखा इबिमी यात्रा शुरू लहरी। दू नगरंङ पिपिमी तुहई, दोऊ पिला हासी सर्गंङ ज़ि इच्चा छंङी च़मक्की इलि, दंङ दू धरतिऊ टोईच़ी दह्च़ी इलि। शाऊले अपि आ दि कुट्री रेड्री, “हे शाऊल! हे शाऊल! केई गिहबी छिल्ले तंग लहज़ातन?” शाऊल ए रूहक्ति, “हे प्रभु, का अरि शुनाह?” यीशु ज़ि दोबि जबाब रांई, “गेह यीशु शुगाह। केई गिहबी छिल्ले तंग लहज़ातन!”

अपेहल शाऊल खड़े अच़िरी दंङ खंड्री मरच़ाते। दोऊ मित्र दोबि दमिश्को हखा रेंज़ा शिलिर। शाऊले षुमु ध्याड़ा तचेक छल्ले माह ज़ो ए तुंङ माह।

दमिश्का रिंङ हनन्याह मिन्दु इच्चा चेला तोहई। परमेश्वरे दोऊ हखा कुई, “दू चुंङ अंऊर शाऊल रूहम्ज़ा तोहई। केनोह गुह्ट्र दोऊ टोईच़ी केहु ताकि दोई यहच़ा खंड्री तरपोतो।” पर हनन्याह ज़ि कुई, “हे प्रभु, गेह रेड्री तातग कि दि मीह छना विशवासी तिंङ तंग लहज़ा।” परमेश्वरे दोबि जबाब रांई, “ईला! गेह दोबि यहूदी तिंङ ए ऊई जाति मीहतु बिचंङ गिऊ मिन्दु घोषणा लहज़िमी थल्जी अंङे च़रति। दू गिऊ मिन्दु थल्जी महस कष्ट सहन लोहतो।”

दंङ हनन्याह शाऊलो कछंङ इलि, एनोह गुह्ड़ दोऊ टोईच़ी केहई, दंङ कुई, “यीशु ज़ि, “अंऊ देर अपिमी कांह अमरिंङ कनु टोईच़ी प्रकट शुह्त, गिहबी कांह कछंङ च़रची शुह ताकि केई यहच़ा खंड्री तरपोन, दंङ पवित्र आत्मा कनिंङ पिंङे च़रपोतो।” ध्वांए ए शाऊल खंड्री लेहति, दंङ हनन्याह ज़ि दोबि बपतिस्मा रांई दोहपल शाऊले बगत ज़हरी दंङ दोबि ताकत खोकसिरी।

दोहपल बे, शाऊले दमिश्का रिंङ बंङज़ा यहूदी तु बिचंङ प्रचार लहज़ि शुरू लेह च़रति। दोई कुई, “यीशु ए परमेश्वरो योह शुह!” यहूदी मीहरे हैरान तोईरे, छना कुचे शाऊले ता विशवासी तिंङ सच़िमी कोशिश लहरिर, पर एंतेग दोई यीशु टोईच़ी विशवास लाहते, शाऊले यहूदी रंङ साते कुवाद लाहते। दोई कंड्रिरी कि यीशु ए मसीह शुह।

महस ध्याड़ो थल, यहूदी ज़ि शाऊला बि सच़िमी कोशिश लहरिर। दोच़ि दोबि सच़िमी थल्जी नगरो मोह्ड़े पेतंङ रिंङ मीहतिंङ च़रति। कि दोऊ निगरानी लोहर पर शाऊले दू योजना ओ पाहठी रेड्री च़रति, दंङ दोऊ मित्रा तु दोरची बचेकी दोऊ मदत लेह चरति। इच्चा राता दोई दोबि टोकरी रिंङ केहच़ी नगरो भिती ओ योंखा तक्शे च़रतिर। दमिश्को दोरच़ी बचेकी हुंच़िमी थल शाऊले यीशु पाहठी प्रचार लहज़ि ज़ारी तहरी।

शाऊल प्रेरिता तंङ साते दोइमी थल्जी यरूशलेमो हखा इलि। दोहपल बरनबास मिन्दु इच्चा विशवासी शाऊला बि प्रेरिता तु कछंङ रैंज़ा शिलि। दोई दोतिंङ कंड्रिरी कि शाऊले छना हिम्मत लहज़ि दमिश्का रिंङ प्रचार लहरी। दोऊ थल, प्रेरिता ज़ि शाऊला बि स्वीकार लेह च़रतिर।

रे विशवासी अंऊ यरूशलेमा रिंङ तंग लहज़िमी रंङ साते पोक्शे इलिर दोरे ऊईतार अंताकिया नगरंङ अच़ा इलिर दंङ यीशु पाहठी प्रचार लहज़ातेर। अंताकिया रिंङ बंङज़ा मीहरे महस यहूदी माह तोईरे, पर मुंड़ा रिंङ, पर मुंड़ा रिंङ ए दोतु बिचंङ ज़ि महस मीहरे विशवासी बणेंके इलिर। बरनबास ए शाऊल दि खरकोई विशवासी तिंङ यीशु पाहठी ऊई ला महस कंड्रीमी थल्जी दोर्तिंङ इलिर दंङ कलीसिया बि पक्का लहरिर। यीशु टोईच़ी विशवास लहज़ा मुंड़ा रिंङ अंताकिया रिंङ ए “मसीही” शुईरे।

इच्चा ध्याड़ा, अन्ताकिया ओ मसीही मीहरे व्रता रंङ साते प्रार्थना लहज़ातेर। पवित्र आत्मा ज़ि दोतु हखा कुई, “गिऊ थल्जी बरनबास ए शाऊला बि दू कम लहज़िमी थल्जी शतह लेह च़रतेंई अंऊ कम लहज़िमी थल्जी गेह दोतिंङ बुलासी शुगाह।” झांह लेह अंताकिया ओ कलीसिया ज़ि बरनाबास ए शाऊलो थल्जी प्रार्थना लहरिर दंङ दोतु टोईच़ी एनोह गुह्ड़ केहिरे। दोहपल दोच़ि दोतिंङ ऊई महस ठाहरि यीशु पाहठी रूठे खबरो प्रचार लहज़िमी थल्जी च़रतिर। बरनबास ए शाऊले शतह-शतह जाति तु मीहतिंङ शिक्षा रांईरे, दंङ महस मीहच़ी यीशु टोईच़ी विशवास लहरिर।