45. स्तिफनुस ए फिलिप्पुस

भत्ते बे मुंड़ो मसीही अगुवा तु बिचंङ स्तिफनुस मिन्दु इच्चा गंङमी तोहई। भत्ते मीहच़ी दोऊ आदर लहज़ातेर। पवित्र आत्मा ज़ि दोबि महस सामर्थ ए बुद्धि रांहषी तते। स्तिफनुसे महस चमत्कार लहसी ताहरे। अपेहल दोई यीशु टोईच़ी विशवास लहज़िमी पाहठी दोतिंङ शिक्षा रांई दंङ महस मीहच़ी दोऊ टोईच़ी विशवास लहरिर।

इच्चा ध्याड़ा, स्तिफनुसे यीशु पाहठी शिक्षा रंड्री लेहकी तोहई, दंङ रै झांह ठ्रोह यहूदी अतिर अंऊ दोच़ि यीशु टोईच़ी माह लहरिर दंङ दोरंङ साते कुवाद लह शुरू लेह च़रतिर। दोरे महस रोहषेक्च़ा इलिर, छना कुचे दोरे धार्मिक अगुवा तु कछंङ अंज़े तोईरे दंङ दोरे हप्सी कुट्री लेहतिर। दोच़ि कुईरे, “ञेंहच़ी स्तिफनुसा बि मूसा ए परमेश्वरो पाहठी मदम गप्पा कुट्री लेहतिर।” झांह लेह धार्मिक अगुवा ज़ि स्तिफनुसा बि गिरफ्तार लेह च़रतिर दंङ दोबि मोह्ड़े पुरोहित ए यहूदी ऊई अगुवा तु तुईज़ि रैंज़ा हतिर। ऊई ला हप्सी लहज़ा गवाह अतिर। दंङ दोच़ि स्तिफनुसो पाहठी हप्सी कुईरे।

मोह्ड़े पुरोहिते स्तिफनुसो हखा रूहक्तिर, “छि दि मीहरे कांह पाहठी हेले कुट्रातोर आ?” स्तिफनुसे मोह्ड़े पुरोहिता बि जबाब रंड्रीमी थल्जी महस गप्पा कुट्री शुरू लेह च़रति। दोई कुई कि अब्राहमो टेम बे यीशु टेम तचेक परमेश्वरे इस्राएलो मीहतु थल्जी महस अद्धभुत कम लहरी। पर मीहच़ी हमेशा परमेश्वरो भाषे माह लहरिर। स्तिफनुसे कुई, “केरे मीहरे परमेश्वरो खिलाप ज़िद्दी ए वलवा लहज़ा तोंहई। केहच़ी हमेशा पवित्र आत्मा बि ग्रहण माह लहज़ातंई, छना कि हेंदु बाह-मेमेज़ि हमेशा पवित्र आत्मा बि ग्रहण माह लहरिर दंङ हमेशा दोऊ भविष्यवक्ता तिंङ सच़ि च़रति। पर अंऊ दोच़ि लाहतेर दोऊ बराबरी रिंङ केहच़ी ऊई ला मदम लहसी तातंई! केहच़ी मसीह बि सच़ि च़रचातंई।”

अपेहल दू धार्मिक अगुवा ज़ि दि रेड्रिर, दंङ दोरे धोंण रोह्षेक्च़ा इलिर कि दोच़ि एनोह रेह्ट्रा बंद लेह च़रतिर दंङ ज़ोरे हाऊष रांईर। दोरे स्तिफनुसा घषेकी नगरो धकतेखा रैंज़ा शिलिर दंङ दोबि सच़िमी थल्जी दोबि रह्घ द्रले रंड्री लेहतिर।

अपेहल स्तिफनुस सिए लेहकी तोहई, दोई हाऊष रांई, “हे यीशु, गिऊ आत्मा बि ग्रहण लोह!” दोहपल दू एनोह पुष्टु भारे दह्च़ी इलि दंङ यहच़ा हाऊष रांई, “हे प्रभु, दि पाप दोतु टोईच़ी था लगाएतु।” दोहपल दू सिए इलि।

दू ध्याड़ा, यरूशलेमा रिंङ बंङज़ा महस मीहच़ी यीशु टोईच़ी विशवास लहज़ा मीहतिंङ सताच़ी शुरू लहरिर, झांह लेह विशवासी मीहरे ऊई ठाहरि पोक्शे इलिर। पर दोऊ थल, अंऊर ला दोरे इलिर यीशु पाहठी प्रचार लहरिर।

फिलिप्पुस मिन्दु इच्चा यीशु विशवासी तोहई। छना कि ऊई महस विशवासी ज़ि लहसी तारेर दोरे ला यरूशलेमा ज़ि पोक्शे इलिर। दू सामारिया ओ हखा अच़ा इलि। दोर्तिंङ दोई यीशु पाहठी प्रचार लहज़ि शुरू लहरी दंङ उद्धार खोकसिरी। इच्चा ध्याड़ा, फिलिप्पुसो कछङ परमेश्वरो तरफे इच्चा स्वर्गदूत अति दंङ दोऊ हखा बणो हखा इबिमी थल्जी, दंङ इच्चा सड़का रिंङ ज़ोज़िमी थल्जी कुई। फिलिप्पुस दोर्तिंङ अच़ा इलि। अपेहल दू सड़का रिंङ ज़ोज़ि लेहकी तोहई, दंङ दोई इच्चा मीहबी रथा रिंङ इबि तंङरी। दि मीह कूश देशो इच्चा खास अधिकारी तोहई। पवित्र आत्मा ज़ि फिलिप्पुसो हखा कुई कि इलज़ि दू मीहरंङ साते ज़ो।

झांह लेह फिलिप्पुस रथो ओ कछंङ इलि। दोई रेड्रिरी कि दू कूशी परमेश्वरो बचन पढञक्पि लेहकी तोहई। अंऊ यशायाह भविष्यवक्ता ज़ि चेहसी शुह दू दोबि पढ़ेक्पि लेहकी तोहई।, “दोरे दोबि बलि चढ़ाएच़िमी जोगे त्रैंई तु ठ्रोह रैंज़ा शिलिर, दंङ छना इच्चा कुरच़ा शांत शुहवा, दोई ला इच्चा शब्द माह कुट्रीरी। दोच़ि दोरंङ साते मदम व्यवहार लहरिर दंङ दोऊ आदर माह लहरिर। दोच़ि दोऊ जहान लेहपच़ी च़रतिर।”

फिलिप्पुसे दू कूशी रंङ साते रूहक्ति, “केई छि पड़ेक्पन छि केई दू समझेक्च़ातना?” दू कूशी ज़ि जबाब रांई, “मेस। अपेहल तचेक अच़िया गिहबी समझाएपोतो माह, दोहपल तचेक गेह दिबि सझेक्गी मरपोग। ज़ि शबस गिऊ कछंङ अंज़े बंङज़ू। यशायाह ज़ि दि एनोह पाहठी चेहच़ाते या ऊई अतुआ पाहठी?”

फिलिप्पुस रथो टोईच़ी बंङज़ा इलि। दोहपल दोई दू कूशी मीहबी कंड्रीरी अंऊ यशायाह ज़ि यीशु पाहठी चेहसी ताहरे। फिलिप्पुसे परमेश्वरो बचनो महस गप्पा ऊईतिंङ ल कंड्रीरी। झांह ठ्रोह, दोई दू मीहबी यीशु पाहठी रूठे खबर सुनाएति।

फिलिप्पुस ए दू कूशी मीह बहाएक्च़ा तिऊ कछंङ अच़ा इलिर। दू कूशी ज़ि कुई, “खंणु! देर्तिंङ ति तोह! छि गेह बपतिस्मा लेहपच़ी तरपोगा?” दंङ दोई एनोह सारथी बि रथ रूहमज़िमी थल्जी कुई।

दंङ दोरे तिऊ बिचंङ अच़ा इलिर, दंङ फिलिप्पुसे दू कूशी बि बपतिस्मा रांई। अपेहल दोरे तिऊ दोरच़ी धकतेखा अतिर, दंङ पवित्र आत्मा ज़ि अचानक ए फिलिप्पुसा बि उठाके ऊई ठाहरि रिंङ रैंज़ा शिलि। दोर्तिंङ फिलिप्पुसे मीहतिंङ यीशु पाहठी कंड्री जारी तहरी।

दू कूशी एनोह चुंङी यात्रा रिंङ तुंखा शुहबी लेहति। दू खुश तोहई कि दोई एंतेग यीशु बि ञेंहच़ाते।