44. पतरसे ए यूहन्ना ओ इच्चा भिखारी बि अईन लहज़ि

इच्चा ध्याड़ा, पतरस ए यूहन्ना बि मंदिरो इलिर। इच्चा अपंग मीह भीख पेट्रीमी थल्जी मोह्ड़े पेतंङों टोईच़ी बंङज़ा तोहई।

पतरसे दू लट्टे मीहू हखा खांई दंङ कुई, “गिहबी कनिंङ रंड्रीमी थल्जी ढ्बाह ता माह। पर छि गिऊ कछंङ तोह दू कनिंङ रमोग। यीशु मिन्दंङ खड़े अच़ु दंङ ज़ो!”

ध्वांए, परमेश्वरे दू ए मुक्का दू मीहबी अईन लेह च़रति। दोई देखा-नोखा ज़ोज़ि ए ज़रका रंड्री ए परमेश्वरो स्तुति लहज़ि शुरू लहरी। मंदिरो ल्वाड़ी हाज़िर मीहरे महस हैरान तोईरे।

ध्वांए मीहतु इच्चा भीड़ दू मीहबी खंड्रीमी थल्जी अतिर अंऊ दू अईन शुचि इलज़ि तोहई। पतरसे दोतु हखा कुई, “दि मीह ठीक तोह, पर दि गप्पो थल्जी हैरान था शुंई। ञेंहच़ी दिबि हेंदु शाक्ति रैं ठीक माह लंहि, या दिऊ थल्जी माह लंहि कि ञेंहच़ी परमेश्वरो आदर लहज़ातंई। बल्कि दिऊ थल्जी, दू यीशु शुह अच़ि दि मीहबी एनोह शाक्ति रैं अईन लेह च़रति, छना कुचे ञेंहच़ी यीशु मसीहू टोईच़ी विशवास लहज़ातंई।”

“दू केरे ए शुंई अपि दू रोमी अधिकारी बि यीशु बि सच़िमी थल्जी कुईरे। दोच़ि दोबि सच़ि च़रति अच़ि भत्ते तिंङ जीवन रंड्रा। पर परमेश्वरे दोबि सिए दोतु बिचंङ ज़ि श्रीङंमी लहरी। केहच़ी माह ञेंहच़ातंई कि केहच़ी छि लहज़ातंई, पर अपेहल केहच़ी दू कम लहज़ातंई, दंङ अंऊ भविष्यवक्ता ज़ि कुहषी तारेर दू पूरा शुई। दोई कुहषी ताहरे कि मसीह दुख उठाएपोतो दंङ सिए योतो। परमेश्वरे दिबि दि तरीका रंङ साते शुहबी रांई। झांह लेह एंतेग, पश्चाताप लंहि दंङ परमेश्वरो हखा किरज़ा इलांई, ताकि दोई केहतु पाप माफ लेह च़रपोतो।”

अपेहल मंदिरो अगुवा ज़ि पतरस ए यूहन्ना बि रेड्रिर, दंङ दोरे महस बेवा इलिर। झांह लेह दोच़ि दोकु तिंङ च़ुमनि जेलारिंङ केहच़ी च़रतिर। पर अंऊ पतरसे कुहषी ताहरे दोऊ टोईच़ी महस मीहच़ी विशवास लहरिर। यीशु टोईच़ी विशवास लहज़ा मीहतु गिनती लगभग ङा हज़ार शुचि इलि।

ऊई रग, दोरे यहूदी मीहरे पतरस ए यूहन्ना बि मोह्ड़े पुरोहित ए ऊई धार्मिक अगुवा तु रेंज़ा हतिर। दोरे दू मीहबी ला रैंज़ा हतिर। अंऊ लट्टे तोहई। दोच़ि पतरस ए यूहन्ना ओ हखा रूहक्तिर, “छि अधिकारे केई दि लट्टे मीहबी अईन लहरिन?”

पतरसे जबाब रांई, “दि मीह अंऊ केहतु तुईज़ि खड़े तोह दोबि यीशु मसीहू सामर्थ रैं अईन लाहतंई। केहच़ी यीशु बि क्रूसो टोईच़ी चढ़ाएकी केतंई, पर परमेश्वरे दोबि यहच़ा श्रीङंमी लेह च़रति! केहच़ी दोबि ग्रहण माह लहरिन, पर यीशु सामर्थो अलावा उद्धारो ऊई छल्ले अम माह।”

दोरे अगुवार हैरान तोईरे कि पतरस ए यूहन्ना ज़ि महस याहब रंङ साते गप्पा लहरिर। दोच़ि खंईरे कि दिरे साधारण गंङमी रे तोईरे अंऊ कि अनपढ़ तोईरे। पर दोहपल दोतिंङ हिद अति कि दिरे गंङमीरे यीशु रंङ साते बंङज़ातेर। झांह लेह दोच़ि दोतु हखा कुईरे, “ञेहच़ी केतिंङ महस सज़ा रमोंई अगर केहच़ी दि मीह यीशु पाहठी मीहतिंङ अंऊआ खबर रंड्रातंई।” झांह ठ्रोह महस गप्पा कुट्रीमी थल, दोच़ि पतरस ए यूहन्ना बि इबि रांईरे।