14. १४. उजाड स्थानाङ भौतारीस्चै
सिनै पर्वताङ लहो करार याम्ह भ्याच पछि परमेसोरै इस्राएलीकोलाक प्रतिग्यौ देश पटिक डोरीकी थाला, होसकी कनानौ देश र डेले। डेबुओ खाबै होखुरीककी अघी-अघी कनान पटिक डोरीचै आल्हा र इस्राएलीकै होसकी डुटा।
परमेसोरै अब्राहाम, इसहाक र याकुबखाटा होसे देश होखुरीकुङ सन्तानकी याल्हे डेम प्रतिग्या जाट्नन्या, तर होसे समयाङ होला वास्टै समुदायुङ भर्मीको ङुमन्या। होखुरीककी कनानीको डेमन्या। कनानीकै परमेसोरकी पुजा माजाट्नन्या र होसकुङ आग्या र मामन्डीमन्या। होखुरीकै झुटो देवकोलाक पुजा जाट्नन्या र वास्टै अधर्मी कामको जाट्नन्या।
परमेसोरै इस्राएलीकोलाक डेया, “नाखुरीकै होला लेच पट्ट न कनानीकोलाक प्रतिग्यौ देशलकीङ हटडीकी र होखुरीकखाटा कुसेर कालुङ सम्झौता वा ब्याहा माजाट्की। होखुरीकुङ मुर्तिकोलाक पुरा रुपाङ ध्वस्ट पार्न याल्हे। इडीक नाखुरीकै ङौ आग्या पालन माजाट डेनाङ नाखुरीकै ङौ सट्टाङ होखुरीकुङ मुर्तिकोलाक पुजा जाट्ले।”
जब इस्राएलीको कनानौ सीमानाङ टाराहा, मोशै इस्राएलीकुङ पट्ट न कुललकीङ काट काट जना जाटार बाह्र जना भर्ममीकोलाक भाका। होचे होसे भर्मीकोलाक होसे देशुङ खबर बुझडीस्की जासुसौ रुपाङ बिर्न्हका। कनानीको बलियो ले अथवा नीर्धा ले डेच बीसयाङ चीयो जाट्कीयो लागी र होखुरीककी बिर्न्हकामन्या।
होसे बाह्र जना भर्मीको चालिसयाक सम्म कनानाङ न घुम्डीस्न ङुवा र होटै होखुरीक ल्हेसा। होखुरीकै भर्मीकोलाक डेया, “होलुङ झा च साफ्फी मलिलो र प्रसस्ट बाली छान्च खालुङ लेसा।
तब तुरुन्टै अर्को जासुसको, कालेब र यहोसुये चहीँ डेया, “इसे सहि हो कि कनानुङ भर्मीको घाङ्च र बलियो ले, तर पक्का न कानै होखुरीककी परास्त जाट्की ह्योक्ले
तर भर्मीकै कालेप र यहोसुओ कुरा मासेया। होखुरीक मोशा र हारुनखाटा मीरीस ख्योह्वा र डेया, “नाखुरीकै हिजै कानकी याङ्च बिर्हिम सेछ ठावाङ राक्च? लडाइयाङ सीकी र लहो मास्टो र बालखमीजाकोलाक दास खास्की डेनाङ च बरु कान मिश्रदेसाङ न ङुच लेनाङ छान्च लेया।” फेरी मिश्रदेशाङ ल्हेसाकार आल्खीयो लागी इस्राएलीकै काट जना नयाँ अगुवा ङेहा।
इसे डाङार परमेसोर साफ्फी मिरिस ख्योहा र भेट छान्च पालाङ राहा। परमेसोरै डेया, “ङौ बिरुढाङ बिद्रोह जाट्च कारण नाखुरीक पट्टकी इसे उजाड ठावाङ भौतारीस्चै ह्वाकी पर्ले। कालेब र यहोसु बाहेक २० बर्स डेनाङ ढेनामुङ पट्ट न इला न सिले र प्रतिग्यौ मुलुक भिट्री पर्की माडुप्ले।”
जब भर्मीकै इसे कुरा सेया, लहे पाप जाट्च बाटै होखुरीक साह्रै दुखी छाना। होखुरीकै लहो हतियार ला र कानानुङ भर्मीकोलाक आक्रमण जाट्की नुङा। मोशै होखुरीककी होला मानुङ्की चेतवनी याहा हिजैडेनाङ परमेसोर होखुरीकुङ साथाङ लेया, तर होखुरीकै होच्यो कुरा मासेया।
होसे लडाइयाङ परमेसोरै इस्राएलीकोखाटा माना, होटबाटै होखुरीक हारीसा र वास्टै जना सीया। होटै इस्राएलीको कनानलकीङ ल्हेसा र चालिस बर्ससम्म उजाड ठावाङ भौतारिस्न ङुवा।
चालिस बर्स सम्म उजाड ठावाङ भौतारीस्न ङुनाङ परमेसोरै न इस्राएलीकोलाक जुटडीम याहा। होखुरीककी सोर्गलकीङ रोटी याहा, होसे रोटीकी न “मन्न” डेले। होसकै होखुरीककी ङुच पालाङ ज्याचओ लागी स्या र छान्ख्यो डेच हेतुये बट्टाइयो हुल र बिर्हन्हका। होसे पट्ट न समयभरी परमेसोरै होखुरीकुङ बढिन र जुट्टा च्याहाखी मायाहा।
परमेसोरै होखुरीककी चट्टानलकीङ डी याहा। इडीक लेनाङ लेनाम र, इस्राएलीकै परमसोर र मोसौ बिरुढाङ आरोप लैडीया र गनगन जाटा र पनि, अब्राहाम, इसहाक र याकुबखाटा लहे छ्याक्च प्रतिग्याङ परमेसोर बिस्वास योग्य ले।
काट पटक, जब भर्मीकोखाटा गाकीयो लागीडी मालेया, परमेसोरै मोशाकी डेया, “चट्टानकी डेओ र होसे लकीङ डी राल्हे।” तर मोशै पट्टन भर्मीकुङ म्याहासाङ ङाक्कीयो सट्टाङ चट्टानाङ नीस खेप लठ्ठीये हीर्कडीयार परमेसोरकी अनादर जाटा। चट्टानलकीङ डी च राहा तर परमेसोर मोशाखाटा मीरीस ख्योहा र डेया, “नाङ प्रतिग्यौ मुलुक भिट्री पर्की माडुप्ले।”
उजाड ठावाङ भौतारिस्च चालिस बर्सपछि, परमेसोरौ बिरुढाङ बिद्रोह जाट्च पट्ट न इस्राएलीको सिमभ्या। होटै परमेसोरै फेरी भर्मीकोलाक प्रतिग्या जाट्च मुलुकौ छेवाङ लक्डीसा। मोशा अब बुढा छान्न भ्या, होटबाटै परमेसोरै यहोसुकी होसे भर्मीकोलाक नेतृत्व जाट्की भाका। परमेसोरै मोशाकी इसे र प्रतिग्या जाटा कि कायाक होसकै मोशा ल्याक्च न अर्को काट जना अगमबक्टा बिर्न्हकाले।
अनि परमेसोरै मोशाकी पहाडौ मीचुटाङ नुङ्की डेया, ताकी होचे प्रतिग्या जाट्च मुलुक ङोस्की ह्योक्ख्यो। मोसै प्रतिग्या जाट्च मुलुक डाङ्की डुपा तर परमेसोरै मोसाकी होला नुङ्की माह्या। होटै मोसा र सीया अनी तिस दिनसम्म इस्राएलीको आसकुङ लागी शोक मन्डीया। यहोशु होखुरीकुङ नयाँ अगुवा छाना। यहोसु काट असल अगुवा लेया हिजैडेनाङ होसे परमेसोराङ भर पर्नन्या।
बाइबलको कथा: लेवी १६-१७, गन्ती १० -१४;२०;२७, व्यवस्था ३४ बाट
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।