28. २८. धनि जवान शासक

काट याक, काट जना धनि जवान शासक येसु लेठाङ राहा, “असल गुर अनन्‍त जीवन डुप्‍कीयो लागी ङै ही जाट्‍की पर्‌ले?” येसुये होसकी डेया,“हीजै नाङ ङाकी ‘असल’ डेले? काट जना मट्‍टै असल ले र लेमङुले , अनि होसको चहीँ परमेसोर हो। तर इडीक नाको अनन्‍त जीवन डुप्‍की मीमन जाट्‍ले डेनाङ, परमेसोरौ आग्‍याको पालन जाटो।”

“होसे मध्‍ये कुसे कुसे चहीँ ङै पालन जाट्‍की पर्‌ले?” होचे गिना। येसये डेया, “हत्‍या माजाट्‍की। ब्‍यभिचार माजाट्‍की, माखुस्‍की, झुटो माङाक्‍की, लहो बोइ मोइकी आदर जाट्‍की र लहो छिमेकीकी लाहाकी लेखान प्रेम जाट्‍की।”

तर होसे जवान भर्‌मीये लाहाकी ठिक प्रमाणित जाट्‍कीयो लागी डेया, “ङै इसे पट्‍ट न आग्‍याको च मार्‌जा लेनाङ लकीङ न जाट्‍न राम्‍हने। ङै अझै हि जाट्‍की पर्‌ले ताकी ङा सधैयो लागी जीवाकी ह्‍योकिङ?” येसुये होसे भर्‌मीकी ङोसा र टिठडीया।

येसुये जवाफ याहा, “इडीक नाङ सिद्‍ध छान्‍की मीमन जाट्‍ले डेनाङ, नुङ्‍ना र नाङखाटा लेच पट्‍ट न ठोक आर्‌लौ अनि होसेलकीङ राछ पैसा गरीबकोलाक योहो, र सोर्‌गाङ निये धन डुप्‍ले। होटै रान्‍हा र ङौ पछि लक्‍डीसो।”

जब होसे जवान भर्‌मीये येसुये डेच कुराको सेया, होसे वास्‍टै डुखी छाना, हिजैडेनाङ होसे एकदम धनि लेया अनि लहे अधिकार जमडीच पट्‍ट न ठोक याकी मीमन मालेया। होसे होटै ल्‍हेसार नुङा।

अनि येसुये होच्‍यो चेलाकोलाक डेया, “धनि भर्‌मीकोलाक परमेसोरौ राज्‍याङ पर्‌की धेरै कठिन ले

जब चेलाकै येसुये डेच कुरा सेया, होखुरीक छक्‍क पर्‍या अनि डेया, “नभा सुये चहीँ मुक्‍टी याल्‍खी ह्‍योक्‍ले त?”

येसये होसे चेलाको पटिक ङोसार डेया, “भर्‌मीकुङ लागी इसे असम्भव ले, तर परमेसोरौ लागी, पट्‍ट न कुरा सम्‍भव ले।”

पत्रुसै यसुकी डेया, “कानै पट्‍ट न कुराको डासार नाकोकी डुट्‍नने। कानुङ लागी इनाम ही छान्‍ले? ”

येसुये जवाफ याहा, “जुनै ङौ म्‍यार्‌मीनौ खातिर लहो इम, डाजेभाइको, डैबहिनीको, बोइ, मोइ, मीजाको, अथवा धन-सम्‍पत्ति डास्‍नने, होखुरीक पट्‍टये सय गुना बढि डुप्‍ले अनि होखुरीकै अनन्‍त जीवन र डुप्‍ले। तर वास्‍टै जना जुन चहीँ पहिला ले, होखुरीक न्‍हुङ्‍लाक छान्‍ले, र न्‍हुङ्‍लाक छान्‍चको चहिँ पहिला छान्‍ले।”