32. यीसू दुष्टआत्मा ले दुःखी हुई चुकिरे म्हाणुँ जो होर एक बीमार ज्नाने जो ठीक करहा

यीसू होर तेसरे चेले आपणी किस्ती मन्झ तेस इलाके जो गए जेथी गिरासेनी लोक रैह्याँ ऐं थे। स्यों तेस इलाके मन्झ पूजी किन्हें किस्ती ले उतरी गए।

तेथी एक म्हाणुँ था जो दुष्टआत्मा ले दुःखी था।

ये म्हाणुँ इतना ताकतवर था कि कोई भी तेस जो काबू नी कर सक्दा था। कई बार लोक तेसरे हाथ होर पैर सांगला किन्हें बान्हा ऐं थे, पर से तिन्हा जो तोड़ी देहां था।

से म्हाणुँ तेस इलाके री कब्रा मन्झ रैह्या करहा था। ये म्हाणुँ पूरे ध्याड़े होर पूरी रात चिलान्दा रैह्याँ था। से कपड़े नी पैहणदा था होर हमेसा आपु जो पात्थरा ले से जख्मी करदा रैह्याँ था।

से म्हाणुँ दौड़ी किन्हें यीसू वाले आया होर तेसरे साम्हणे जांढू रे भारे थाले बैठी गए। तेबे यीसूए तेस म्हाणुँ रे अंदर बैठिरी दुष्टआत्मा किन्हें गल्ला कीती होर बोल्या, "एस म्हाणुँ मंझा ले बाहर निकली जा!"

से दुष्टआत्मा ऊची अवाजा मन्झ चिल्लाई, "हे यीसू, परम प्रधान परमेसरा रे म्हठे, तेरा मेरे ले क्या काम आ? दया करी किन्हें मुंजो मत तंग कर!" तेबे यीसूए तेस दुष्टआत्मा ले पूछेया, "तेरा नांऊँ क्या आ?" तिन्हें जवाब दितेया, "मेरा नांऊँ सेना आ, क्यूंकि आस्से बौह्त ई।" (रोमी सेना मन्झ कई हजार स्पाहिया रा एक झूंड एक "सेना" हूंहाँ ईं थी।)

तेस दुष्टआत्मे यीसू किन्हें अर्ज कीती, "दया करी किन्हें आस्सा जो एस इलाके ले बाहर मत भेजा!" तेथी नेडे पहाड़ा पर सूअरा रा एक झुंड चरेया करहा था। इधी कठे तेस दुष्टआत्मे यीसू किन्हें अर्ज कीती, "दया करी किन्हें आस्सा जो तिन्हा सूअरा मन्झ भेजी दे!" यीसूए बोल्या, "ठीक आ, तिन्हा मन्झ चली जाऊआ!"

इधी कठे से दुष्ट आत्मा तेस म्हाणुँ मंझा ले निकली किन्हें तिन्हा सूअरा मन्झ चली गईं। स्यों सूअर दौड़ी किन्हें एक खड़े टीले ऊपरा ले झीला मन्झ छलांग लगाई होर डूबी गए। तेस झुंडा मन्झ लगभग 2,000 सूअर थे।

तेथी जो सूअरा री देखभाल करणे वाले लोक थे। तिन्हें ये सभ कुछ हुंदे हुए देख्या, होर स्यों नगरा मन्झ भगी गए। होर जो कुछ यीसूए कितेया था तिन्हें सभी जो दसी दितेया। तेस नगरा रे लोके आई किन्हें से म्हाणुँ देख्या जेस मन्झ दुष्ट आत्मा थी।

स्यों लोक बौह्त डरी गईरे थे होर तिन्हें यीसू जो चली जाणे रे कठे बोल्या। इधी कठे यीसू किस्ती पर बैठी गया। से म्हाणुँ जेस मन्झ जे दुष्ट आत्मा थी तिन्हें यीसू साऊगी जाणे री अर्ज कीती।

पर यीसूए तेस किन्हें बोल्या, "नी। हांऊँ चाहाँ कि तू घर जाई किन्हें सभी जो दस कि परमेसरे तेरे कठे क्या कितेया। तिन्हा जो दस कि किहाँ परमेसरे तेरे पर दया कीती।"

इधी कठे से म्हाणुँ चली गया होर सभी जो एस बारे मन्झ दस्या जो यीसूए तेसरे कठे कितेया था। तेसरी कहाणी सुणने वाल्आ हर एक आदमी हैरान हुई जाहाँ था।

यीसू झीला री दूजी वखा जो वाप्स आया। तेसरे तेथी पूजणे ले बाद, एक बड़ी भीड़ तेसरे ओरे परे कठा हुई होर तेस जो दबान्दी लगी। तेस भीड़ा मन्झ एक ज्नाने थी जो बारा साला ले खून बैहणे री परेसानी ले दुःखी थी। तेस्से आपणे सारे ढब्बे बैदा जो देई दिते थे ताकि स्यों तेस्सा जो ठीक करी सके, पर तेस्सा री ब्मारी होर भी खराब हुई गईरी थी।

तेस्से सुणेया था कि यीसूए कई बीमार लोक ठीक किते थे होर तेस्से सोच्या, "मुंजो पूरा विस्वास आ कि अगर हांऊँ सिर्फ यीसू रे कपड़े रा पून्घ ई छुही लैन्घी, ता मां भी ठीक हुई जाणा!" इधी कठे से यीसू रे पीछे ले आई होर तेसरे कपड़े रा पून्घ छुही लया। जिहां ईं तेस्से यीसू छुहेया, तेस्सा रा खून बैहणा बंद हो गया।

एकदम ई, यीसूए जाणी लया कि तेस मंझा ले सामर्थ निकली। इधी कठे तिन्हें पीछे मुड़ी किन्हें पूछेया, "हांऊँ कुने छुहेया?" चेले जवाब दितेया, "एथी इतने सारे लोक तेरे चहुँ वखा जो भीड़ लगाई किन्हें खड़ीरे, होर तुस्सा किन्हें टकराया करहा ऐ। ता तुस्से कि पूछेया करहा ऐ कि तुस्से कुने छुहे?"

से ज्नाने यीसू रे साम्हणे काम्दी हुई होर बौह्त डरी किन्हें आपणे जांढू रे सहारे थाले ज्मीना पर बैठी गई। तेबे तेस्से जो कुछ कितेया था से सभ तेस जो दसी दितेया, होर ये भी दस्या कि से ठीक हुई गई। यीसूए तेस्सा किन्हें बोल्या, "तेरे विस्वासे तू ठीक करी दिती। सांति किन्हें चली जा।"