31. यीसू पाणी पर चल्हा

पांज हजार लोका जो खाणा खुआणे ले बाद, यीसूए आपणे चेले किन्हें किस्ती मन्झ जाणे रे कठे बोल्या। तिन्हें तिन्हा जो झीला री दूजी वखा जो जाणे रे कठे बोल्या जेब्की से थोड़े टैमा रे कठे तेथी रुकी गया। इधी कठे चेले चली गए होर यीसूए भीड़ भेजी दिती ताकि स्यों आपणे घरा जो वाप्स चली जाए। एता ले बाद, यीसू प्रार्थना करणे रे कठे एक पहाड़ा पर चली गया। तेथी से कल्हा था, होर तिन्हें देर राती तक प्रार्थना कीती।

तेस टैमा, चेले आपणी किस्ती जो चलाया करहा ऐ थे, पर हाऊआ तिन्हारे बरख्लाफ बड़ी जोरा किन्हें बैह्या करहा ई थी। बौह्त रात हुई जाणे पर भी स्यों सिर्फ झीला रे बीचा मन्झ ई पूजे थे।

तेस टैमा यीसूए प्रार्थना करणी बंद करी दीती होर आपणे चेले वाले वाप्स जाणा सुर्हू कितेया। से किस्ती वखा जो जाणे रे कठे पाणी रे ऊपर चल्दा लग्या।

चेले यीसू जो देखी किन्हें बौह्त डरी गईरे थे क्यूंकि तिन्हें सोच्या था कि स्यों केसी भूता जो देख्या करहा ऐ। यीसू जाणहां था कि स्यों डरी गईरे, इधी कठे तिन्हें तिन्हा जो अवाज देई किन्हें बोल्या, "डरा मत, ये हांऊँ आं!"

तेबे पतरसे यीसू किन्हें बोल्या, "हे प्रभु, अगर ये तूस्से ऐ ता मुंजो पाणी पर चली किन्हें तेरे वाले आऊणे रा हुक्म दे।" यीसूए पतरसा किन्हें बोल्या, "आई जा!"

इधी कठे पतरस किस्ती ले बाहर उतरी गया होर यीसू वाले जाणे रे कठे पाणी रे ऊपर चलणा सुर्हू कितेया। पर थोड़ी दूर जाई किन्हें, तिन्हें आपणी हाखिया यीसू ले हटाई लई होर लैहरा देखी होर तेज हऊआ मैहसूस करणा सुर्हू करी दिती।

तेबे पतरस डरी गया होर पाणी मन्झ डूबदा लग्या। से चिल्लाया, "हे प्रभु, मुंजो बचाई लऊआ!" यीसूए तेस ई टैम हाथ अगे किन्हें से पकड़ी लया। तेबे तिन्हें पतरसा किन्हें बोल्या, "तेरा विस्वास बौह्त कम आ! तुजो सम्भालणे रे कठे तैं मेरे पर भरोसा कि नी कितेया?"

तेबे यीसू होर पतरस किस्ती पर बैठी गए, होर एकदम हऊआ चलणी बंद हुई गई। पाणी सांत हुई गया। चेले हैरान हुई किन्हें यीसू रे अगे जांढू रे भारे थाले बैठी गए। तिन्हें तेसरी अराधना किती होर तेस किन्हें बोल्या, "सच्हे तूस्से परमेसरा रे म्हठे ऐ।"