30. यीसू पांज हजार लोका जो खाणा खुआहां

यीसूए आपणे प्रेरित प्रचार करणे होर लोका जो उपदेस देणे रे कठे बौह्त सारे लग-लग गाऊँआं मन्झ भेजे। जेबे स्यों यीसू वाले वाप्स आए ता तिन्हें तेस जो दस्या कि तिन्हें क्या कितेया था। तेबे यीसूए स्यों झीला री दूजी वखा जो तेस साऊगी एक सांत जगहा पर जाई किन्हें कुछ टैम अराम करणे रे कठे सादे। इधी कठे स्यों एक किस्ती पर बैठी गए होर झीला री दूजी वखा जो चली गए।

पर तेथी बौह्त सारे एह्ड़े लोक थे जिन्हें यीसू होर चेले किस्ती मन्झ जान्दे हुए देखे। ये लोक तिन्हा ले अगे झीला री दूजी वखा जाणे रे कठे झीला रे बाढे -बाढे भगे। इधी कठे जेबे यीसू होर चेले पूजे ता लोका रा एक बडा झूंड पैहले ले ई तेथी तिन्हा जो न्हयाल्या करहा था।

तेस भीड़ा मन्झ ज्नानिया होर बच्चे री गिणती रे बगैर 5,000 ले ज्यादा आदमी मौजूद थे। यीसूए तिन्हा लोका पर बड़ा तरस खाधेया। यीसू रे कठे स्यों लोक बगैर पुहाला री भेडा साहीं थे। इधी कठे तिने तिन्हा जो उपदेस दितेया होर तिन्हारे बीचा मन्झ जो लोक बीमार थे स्यों तिने ठीक कितेया।

सान्झ्के टैमा, चेले यीसू किन्हें बोल्या, "ऐबे देर हुई गईरी होर नेडे कोई नगर भी नी आ। इन्हा लोका जो भेजी दे ताकि स्यों जाई किन्हें खाणे रे कठे कुछ लई ले।"

पर यीसूए चेले किन्हें बोल्या, "तुस्से तिन्हा जो खाणे रे कठे कुछ देआ!" तिन्हें जवाब दितेया, "आस्से एह्ड़ा किहाँ करी सक्हा ऐ? आस्सा वाले सिर्फ पांज रोटी होर दो छोटी मछिया ई।"

यीसूए आपणे चेले किन्हें बोल्या कि स्यों भीड़ा रे लोका जो घाहा पर पनज्याह-पनज्याह री घिड़ी मन्झ बैठणे रे कठे बोला।

तेबे यीसूए पांज रोटी होर दो मछिया लई किन्हें स्वर्ग वखा जो देख्या, होर तेस खाणा रे कठे परमेसरा धन्यवाद दितेया।

फेरी यीसूए रोटी होर मछिया रे टुकड़े-टुकड़े किते। तिने स्यों टुकड़े आपणे चेले जो दिते ताकि स्यों तिन्हा टुकड़े जो लोका जो दे। चेले से खाणा बांडदे रहे, होर से कधी नी मुकेया! स्यों सभ लोक खाई किन्हें रजी गए।

तेता ले बाद, चेले से खाणा कठा कितेया जो बची गईरा था होर तिन्हा टुकड़े री लगभग बारा भरीरे छडोलु निकले! से सारा खाणा तिन्हा पांज रोटी होर दो मछिया ले आईरा था।