29. कठोर सेऊआदारारी कहाणी

एक ध्याड़े, पतरसे यीसू ले पूछेया, "हे प्रभु, मुंजो आपणे भाई जो कितनी बार माफ करणा चहिए जेबे से मेरे बरख्लाफ पाप करे? क्या सात बारी?" यीसूए बोल्या, "सात बारी नी, पर साता रे सत्तर बारी!" एता रे ज्रीए, यीसू रा मतलब आ कि आस्सा जो हमेसा माफ करणा चहिए। तेबे यीसूए ये कहाणी दसी।

यीसूए बोल्या, "परमेसरा रा राज्य एक राजे साहीं आं जो आपणे दासा ले हिसाब लैणा चाहाँ था। तेसरा एक दास 2,00,000 साला री मजदूरी रे बराबर एक बड़े कर्जे रा कर्जदार था।"

पर से दास आपणा कर्जा वाप्स नी करी पाया, इधी कठे राजे बोल्या, "एसरा कर्ज चुकाणे रे कठे एस आदमी जो होर एसरे परिवारा जो दासा रे रूपा मन्झ बेची देऊआ।"

तिने दासे राजे रे साम्हणे आपणे जान्ढू मोड़ी किन्हें अर्ज करी किन्हें बोल्या, 'दया करी किन्हें मेरे बारे मन्झ थोड़ा सब्र करा, होर मां आपणे कर्जे री पूरी रकम देई देणी।' राजे दासा पर दया कीती, इधी कठे तिने तेसरे सारे कर्ज माफ करी दिते होर से जाणे दितेया।

पर जेबे से दास राजा वाले ले बाहर गया, ता तेस जो तेसरा एक साथी दास मिल्या जो तेसरे चार महीने री मजदूरी रे बराबर कर्जे रा कर्जदार था। तिने दासे आपणा साथी दास पकड़ी लया होर बोल्या, 'जो तेरे ऊपर मेरा कर्ज आ से तू मुंजो देई दे!

तिने साथी दासे आपणे जान्ढू मोड़ी किन्हें अर्ज करी किन्हें बोल्या, 'दया करी किन्हें मेरे बारे मन्झ थोड़ा सब्र करा, होर मां आपणे कर्जे री पूरी रकम देई देणी।' पर एता रे बजाए, तिने दासे आपणा साथी दास जेल्हा मन्झ पाई दितेया जेबे तक कि से कर्जा वाप्स नी करी दे।

जो कुछ हुएआ था से दूजे दासे देख्या होर स्यों बौह्त परेसान हुए। स्यों राजा वाले गए होर तेस जो सभ कुछ दस्या।

राजे तेस दासा जो सादी किन्हें बोल्या, 'हे बुरे दास! मैं तेरा कर्ज इधी कठे माफ कितेया था क्यूंकि तैं मेरे ले अर्ज कीती थी। तुजो भी तेहड़ा ई करणा चहिए था।' राजा इतने गुस्से मन्झ था कि तिने से बुरा दास जेल्हा मन्झ पाई दितेया जेबे तक कि से आपणा सारा कर्ज वाप्स नी करी दे।

तेबे यीसूए बोल्या, "स्वर्गा मन्झ बैठिरे मेरे बापूआ तुस्सा मंझा ले हर एकी साऊगी एह्ड़ा ई करणा अगर तुस्से आपणे भाई जो आपणे दिला ले माफ नी करे।"