28. अमीर जुआन राजा

एक ध्याड़े, एक अमीर जुआन राजे यीसू वाले आई किन्हें तेसले पूछेया, "हे सभी ले खरे गुरु, हमेसा री जिन्दगी पाणे रे कठे मुंजो क्या करणा चहिए?" यीसूए तेस किन्हें बोल्या, "तू मुंजो 'सभी ले खरे' कि बोल्हा? सिर्फ एक ई सभी ले खरे आ होर से परमेसर आ। पर अगर तू हमेसा री जिन्दगी पाणा चाहाँ ता परमेसरा री व्यवस्था रा पालन कर।"

मुंजो कुण कुण जे हुक्मा रा पालन करणे री जरूरत ई? तिने पूछेया। यीसूए जवाब दितेया, "हत्या नी करणी। व्यभिचार नी करणा। चोरी नी करणी। झूठ मत बोलणा। आपणे माऊ होर बाबा री इज्जत करणी, होर आपणे पड़ोसी किन्हें आपणे बराबर प्यार करणा।"

पर तिने जुआन आदमीए बोल्या, "हांऊँ आपणे बचपना ले ई इन्हा सभ हुक्मा रा पालन करेया करहा। मुंजो हमेसा रे कठे जिऊन्दा रैहणे रे कठे ऐबे भी क्या करणे री जरूरत ई?" यीसूए तेस वखा जो देख्या होर तेस पर तेस जो बौह्त प्यार आया।

यीसूए जवाब दितेया, "अगर तू सिद्ध हूंणां चाहाँ ता जाई किन्हें आपणा सभ कुछ बेची दे होर स्यों ढब्बे धेले गरीबा मन्झ बांडी दे, होर तुजो स्वर्गा मन्झ ढब्बे धेले मिलणे। तेबे वाप्स आई किन्हें मेरे पीछे चली पऊ।"

जो यीसूए बोल्या से सुणी किन्हें से जुआन आदमी बौह्त उदास हुई गया, क्यूंकि से बौह्त अमीर था होर तिने आपणी सारी जायदाद देणा नी चाही। से मुड़ी किन्हें यीसू वाले ले चली गया।

तेबे यीसूए आपणे चेले किन्हें बोल्या, "परमेसरा रे राज्या मन्झ अमीर लोका रा जाणा बौह्त कठण आ! हाँ, एक अमीर आदमी रे परमेसरा रे राज्या मन्झ जाणा बोहत मुसकल आ एता री तुलना मन्झ कि केसी ऊँटा रा सूई रे नाके मंझा ले हुई किन्हें निकली जाणा असान आ।"

जो यीसूए बोल्या तेता जो सुणी किन्हें चेले हैरान थे। तिन्हें बोल्या, "अगर एह्ड़ा आ ता परमेसरा कुण बचाणे?"

यीसूए चेलेया जो देखी किन्हें बोल्या, "लोका रे कठे आपणा उद्धार करणा नामुमकिन आ। पर परमेसरा रे कठे कुछ भी करणा आसान आ।"

पतरसे यीसू किन्हें बोल्या, "आस्से चेले आपणा सभ कुछ छाडी किन्हें तेरे पीछे चलिरे। ता आस्सा रा इनाम क्या हूंणां?"

यीसूए जवाब दितेया, "हर एक म्हाणुँऐं जिने मेरी वजहा ले घर बार, भाई, बहन, माऊ, बाब, बच्चे, या जायदाद छाडिरी हो, तेस तेता ले 100 गुणा ज्यादा हासल करणा होर हमेसा री जिन्दगी भी पाणी। पर बौह्त सारे जो पैहले ऐ स्यों पीछे हूंणे, होर बौह्त सारे जो पीछे ऐ स्यों पैहले हूंणे।"