27. दयालु सामरी री कहाणी

एक ध्याड़े, यहूदी व्यवस्था रा एक जाणकार यीसू वाले आया। से सभी जो ये दसणा चाहाँ था कि यीसू गलत तरीके किन्हें उपदेस देया करहा। इधी कठे तिन्हें बोल्या, "हे गुरु, हमेसा री जिन्दगी पाणे रे कठे हांऊँ क्या करु?”

तिन्हें म्हाणुंए बोल्या, "से व्यवस्था बोल्हा ई कि आपणे परमेसरा किन्हें आपणे सारे मन, प्राण, सामर्थ, होर बुद्धि किन्हें प्यार रख। होर आपणे पड़ोसी साऊगी आपणे बराबर प्यार रख।" यीसूए जवाब दितेया, "तू एकदम सही आ! अगर तू एह्ड़ा करे, ता तुजो हमेसा री जिन्दगी मिलणी।"

पर से व्यवस्था रा जाणकार लोका जो दसणा चाहाँ था कि तेसरी जिन्दगी जीणे रा तरीका सही था। इधी कठे तिन्हें यीसू ले पूछेया, "ठीक आ, ता मेरा पड़ोसी कुणहां?"

यीसूए तेस व्यवस्था रे जाणकारा जो एक कहाणी दसणे रे ज्रीए जवाब दितेया। "एक यहूदी म्हाणुँ था जो एक सड़का ले हुई किन्हें यरूस्लेम सैहरा ले यरीहो नगरा रा सफर करेया करहा था।"

पर कुछ डाकुऐ से देख्या होर तेस पर हमला करी दितेया। तिन्हें तेसरा सभ कुछ लई लया होर तेस जो मारी कुट्टी किन्हें लगभग अधमरा करी दितेया। तेबे स्यों चली गए।

तेता ले एकदम बाद, एक यहूदी याजक तेस ई सड़का ले हुई किन्हें गुजरेया। तिन्हें याजके से म्हाणुँ सड़का पर पईरा देख्या। जेबे तिन्हें से जख्मी म्हाणुँ देख्या ता से सड़का री दूजी वखा जो जाई किन्हें अगे चली गया। तिन्हें से म्हाणुँ पूरी तरह ले अनदेखा करी दितेया।

एता ले बाद कुछ ई टैम बीतणे पर, एक लेवी तेस सड़का पर आया। (लेवी यहूदिया रा एक गोत्र था जिन्हें मन्दरा मन्झ याजका री मदद कीती थी।) से लेवी भी सड़का री दूजी वखा ले निकली गया। तिन्हें भी से म्हाणुँ अनदेखा करी दितेया।

अगला आदमी जो तेस सड़का पर आया से सामरिया इलाके रा एक आदमी था। (सामरी होर यहूदी एक दूजे किन्हें नफरत करहा ऐ थे।) तिन्हें सामरिए सड़का पर से म्हाणुँ देख्या। तिन्हें देख्या कि से यहूदी था, पर फेरी भी तिन्हें तेस पर बड़ा तरस खाधेया। इधी कठे से तेसरे वाले गया होर तेसरे जख्मा पर पट्टिया बान्ही।

फेरी तिन्हें सामरिए से जख्मी म्हाणुँ आपणे गधे पर बठ्याया होर तेस जो से सड़का ले एक सराय मन्झ लई गया। जेथी पर तिन्हें तेसरी देखभाल करदा रैह्या।

अगले ध्याड़े, तेस सामरी जो आपणा सफर जारी रखणे री जरूरत थी। तिन्हें तेस सराय रे मालका जो कुछ ढब्बे दिते। तिन्हें तेस किन्हें बोल्या, "एस म्हाणुँ री देखभाल करेया। अगर इन्हा ढब्बे रे अलावा तेरे कुछ होर ढब्बे खर्च हुई जाए ता वाप्स आई किन्हें मां तेरे एस खर्चे रा हिसाब कताब करी देणा।"

फेरी यीसूए तेस व्यवस्था रे जाणकारा ले पूछेया, "तुस्से क्या सोच्हा ऐ? इन्हा तीन लोका मंझा ले कुण तेस म्हाणुँ रा पड़ोसी आ जेस जो लूटेया होर पीटेया गया था?" तिन्हें जवाब दितेया, "सेई जो जेस पर तिन्हें दया किति।तिन्हें बोल्या,जा तु भी ईंयां कर।