26. यीसू आपणी सेऊआ सुर्हू करहा

सैताना री परखणिया पर जीत पाणे ले बाद, यीसू वाप्स गलील जघा रे इलाके मन्झ आया। येई से जगहा ई जेथी से रैह्याँ था। पवित्र आत्मा तेस जो बौह्त सामर्थ देई करहा था, होर यीसू एक जगहा ले दूजी जगहा जो गया होर लोका जो उपदेस दिते। सभीए तेसरे बारे मन्झ खरी गल्ला बोली।

यीसू नासरत नगरा मन्झ गया। ये से गाँव आ जेथी से आपणे बचपना मन्झ रैह्याँ था। अरामा रे ध्याड़े, से अराधना करणे री जगहा पर गया। अगुवे तेस जो यसायाह नबी रे संदेसा री एक कताब दीती। स्यों चाहें थे कि से तेस कताबा मंझा ले पढ़े। इधी कठे यीसूए से कताब खोल्ही किन्हें तेसरा एक हिस्सा लोका रे कठे पढ़ेया।

यीसूए पढ़ेया, "परमेसरे मुंजो आपणा आत्मा दितिरा ताकि हांऊँ गरीबा जो सुसमाचार प्रचार करी सकूँ। तिने हांऊँ इधी कठे भेज्या कि हांऊँ कैदिया जो अजाद करूँ, काणेया जो द्बारा देखणे रे लायक बणाऊँ, होर तिन्हा जो छुटकारा देऊँ जिन्हा पर दूजे लोक अत्याचार करेया करहा ऐ। ये से टैम आ जेबे परमेसरा आस्सा पर दया करणी होर आस्सा री मदद करणी।"

फेरी यीसू बैठी गया। सभ लोक तेस जो बड़े ध्याना किन्हें देख्या करहा ऐ थे। स्यों जाणहां ऐं थे कि पवित्र सास्त्रा रा जो हिस्सा तिने ऐबे पढ़ेया था से मसीह रे बारे मन्झ था। यीसूए बोल्या, "जो गल्ला मैं ऐबे तुस्सा रे कठे पढ़ी, स्यों एस टैमा हुएआ करहा ई।" सभ लोक हैरान थे। तिन्हें बोल्या, "ये ता यूसुफा रा म्हठा।"

तेबे यीसूए बोल्या, "ये सच आ कि लोक केसी एह्ड़े नबी जो कधी नी मन्नदे जो तिन्हारे नगरा मन्झ पले बढ़ीरे हो। एलिय्याह नबी रे टैमा मन्झ, इस्राएला मन्झ बौह्त सारी विधवा थी। पर जेबे साढ़े तीन साला तक बरखा नी हुई ता परमेसरे एलिय्याहा जो इस्राएला मन्झ केसी विधवा री मदद करणे रे कठे नी भेज्या। एता रे बजाए, तिने एलिय्याहा जो केसी दूजे देसा री विधवा वाले भेज्या।"

यीसूए बोल्दा गया, "होर एलिसा नबी रे टैमा मन्झ, इस्राएला मन्झ बौह्त सारे लोक चमड़ी री ब्मारी किन्हें दुःखी थे। पर एलिसे तिन्हा मंझा ले कोई भी चंगा नी कितेया। तिने सिर्फ इस्राएला रे दुस्मणा रा सेनापति नामान ठीक कितेया।" पर जो लोक यीसू जो सुणदे लगिरे थे स्यों यहूदी थे। इधी कठे जेबे तिन्हें तेस जो ये बोल्दे हुए सुणेया ता स्यों तेस पर गुस्सा हुई गए।

नासरता रे लोके यीसू पकड़ी लया होर तेस जो अराधना करणे री जगहा ले खिंजी किन्हें बाहर लई गए। स्यों तेस जो मारणे रे कठे हेठ सटणे जो एक चट्टाना रे सिरे पर लई गए। पर यीसू भीड़ा मंझा ले निकली गया होर नासरत नगर छाडी किन्हें चली गया।

फेरी यीसू सारे गलील जिले रे इलाके मन्झ गया, होर बड़ी भीड़ तेस वाले आई। स्यों एह्ड़े बौह्त सारे लोका जो लई किन्हें आए जो बीमार होर अपंग थे। तिन्हा मंझा ले कुछ काणे, लगड़े, टोणे होर बोली नी सक्दे थे, होर यीसूए स्यों ठीक किते।

एता रे अलावा, बौह्त सारे एह्ड़े लोक यीसू वाले ल्यांदे जिन्हा मन्झ बुरी आत्मा थी। यीसूए बुरी आत्मा जो तिन्हा मंझा ले निकलणे रा हुक्म दितेया। स्यों बुरी आत्मा हमेसा चिल्लाहीं थी, "तू परमेसरा रा म्हठा आ!" भीड़ा रे लोक हैरान थे, होर तिन्हें परमेसरा री बड़ाई कीती।

फेरी यीसूए बारा म्हाणुँ छांटी लए जिन्हा जो तिने आपणे प्रेरित बोल्या। तिन्हें प्रेरिते तेस साऊगी सफर कितेया होर तेसले उपदेस हासल किते।