25. सैतान यीसू री परखणी करहा

यीसू रा बप्तिस्मा हूंणें ले एकदम बाद ई, पवित्र आत्मा तेस जो रेगिस्थाना मन्झ लई गया। यीसू तेथी चाल्ई ध्याड़े होर चाल्ई रात था। तेस टैम तिहें उपवास कितेया, होर सैताने यीसू वाले आई किन्हें पाप कुराणे रे कठे तेसरी परखणी कीती।

पैहले, सैताने यीसू किन्हें बोल्या, "अगर तू परमेसरा रा म्हठा आ ता इन पात्थरा जो रोटी बणाई दे ताकि तू खाई सके!"

पर यीसूए सैताना किन्हें बोल्या, "परमेसरा रे वचना मन्झ ये लिखीरा, 'जिऊन्दा रैहणे रे कठे म्हाणुँ जो सिर्फ रोटी री जरूरत नी ई, पर तिन्हा जो हर तेस गल्ला री जरूरत ई जो परमेसर तिन्हा ले बोल्हा!'"

तेबे सैतान यीसू जो मन्दरा रे सभी ले ऊची चोटी पर लई गया। तिहें तेस किन्हें बोल्या, "अगर तू परमेसरा रा म्हठा आ ता एथी ले हेठ छलांग मार, क्यूंकि लिखिरा, 'परमेसरा तुजो चकणे रे कठे आपणे स्वर्गदूता जो हुक्मा देणा कि तेरे पैरा पर पात्थरा ले चोट नी लगे।'"

पर यीसूए से नी कितेया जो सैताने तेसले करणे रे कठे बोल्या था। एता रे बजाए, तिन्हें बोल्या, "परमेसर हर एकी किन्हें बोल्हा, 'तू प्रभु आपणे परमेसरा री परखणी मत कर।'"

फेरी सैताने तेस जो संसारा रे सारे राज्य दसे। तिन्हें तेस जो दस्या कि स्यों राज्य बौह्त ताकतवर, होर खुसहाल थे। तिन्हें यीसू किन्हें बोल्या, "मां तुजो ये सभ कुछ देणा अगर तू घुटने टेकी किन्हें मेरी अराधना करे।"

यीसूए जवाब दितेया, "हे सैतान, मेरे वाले ले भगी जा! परमेसरा रे वचना मन्झ से लोका जो हुक्म देहां, 'सिर्फ आपणे प्रभु परमेसरा री अराधना करा। परमेसरा रे रूपा मन्झ सिर्फ तेसरी ई इज्जत करा।'"

यीसूए सैताना री परखणी ले हार नी मन्नी, इधी कठे सैतान तेस वाले ले भगी गया। तेबे स्वर्गदूत आई किन्हें यीसू री सेऊआ करदे लगे।