24. यूहन्ना यीसू जो बप्तिस्मा देहां

एलीसिबा होर जकर्याहा रा म्हठा यूहन्ना, बडा हुई किन्हें एक नबी बणी गया। से रेगिस्थाना मन्झ रैह्याँ था, होर जंगली म्खीर होर टिटले खाहाँ था, होर ऊँटा रे बाल्आ रे बणिरे कपड़े पैन्हा था।

बौह्त सारे लोक यूहन्ना की गल्ला सुणने रे कठे रेगिस्थाना मन्झ चले आए। तिन्हें ये बोली किन्हें तिन्हा जो प्रचार कितेया, पापा री माफ़ी मांगा, क्यूंकि स्वर्ग रा राज्य नेडे आ!"

जेबे लोके यूहन्ना रा संदेस सुणेया, ता तिन्हा मंझा ले कईये आपणे पापा ले पस्चाताप कितेया, होर यूहन्ने तिन्हा जो बप्तिस्मा दितेया। यूहन्ने जो देखणे कठे बौह्त सारे धार्मिक अगुवे भी आए, पर तिन्हें आपणे पापा रा पस्चाताप या अंगीकार नी कितेया।

यूहन्ने धार्मिक अगुवे किन्हें बोल्या, "हे जैहरीले सर्पो! पस्चाताप करा होर आपणे व्यवहार बदला। परमेसरा हर से डाल्अ काटी देणा जो खरा फल नी ल्याऊन्दा, होर तेस स्यों आगी मन्झ फुकी देणे।" जो नबिए बोल्या था यूहन्ने से पूरा कितेया, "देख, जल्दी ई मैं तेरे अगे आपणे संदेस देणे वाल्आ भेजणा जेस तेरे कठे पैंडा त्यार करणा।"

कुछ धार्मिक अगुवे यूहन्ने ले पूछेया कि क्या से मसीह आ। यूहन्ने जवाब दितेया, "हांऊँ मसीह नी आ, पर से मेरे बाद आऊणे वाल्आ आ। से इतना महान आ कि हांऊँ तेसरे बूटा रे तस्मे खोलणे रे भी लायक नी आ।"

अगले ध्याड़े, यीसू बप्तिस्मा लेणे रे कठे यूहन्ना वाले आया। जेबे यूहन्ने से देख्या, ता तिन्हें बोल्या, "देखा! परमेसरा रा गाभू जेस संसारा रे पाप चकी किन्हें लई जाणे।"

यूहन्ने यीसू किन्हें बोल्या, "हांऊँ तुजो बप्तिस्मा देणे रे लायक नी आ। बजाए एता रे जरूरी आ कि तू मुंजो बप्तिस्मा दे।" पर यीसूए बोल्या, "तुजो मुंजो बप्तिस्मा देणा चहिए, क्युंकि येई ता सही काम आ।" इधी कठे यूहन्ने तेस जो बप्तिस्मा दितेया, जेब्की यीसूए कधी पाप नी कितेया था।

बप्तिस्मा मिलणे ले बाद जेबे यीसू पाणी ले निकली किन्हें बाहर आया, ता परमेसरा रा आत्मा कबूतरा रे रूपा मन्झ जाहिर हुएआ होर हेठ आई किन्हें तेस पर रुकी गया। तेस ई टैम, परमेसरे स्वर्गा ले गल्ला कीती। तिन्हें बोल्या, "तू मेरा म्हठा आ। हांऊँ तेरे किन्हें प्यार करहा, होर हांऊँ तेरे ले बौह्त खुस आ।"

परमेसरे यूहन्ने किन्हें बोल्या था, "जेस केसी पर तू पवित्र आत्मा उतरदे होर तेस पर रुकदे देखे तेस जो तू बप्तिस्मा देया।" सेई परमेसरा रा म्हठा आ परमेसर एक ई आ। पर जेबे यूहन्ने यीसू जो बप्तिस्मा दितेया, ता तिन्हें परमेसर बापू जो गल्ला करदे सुणेया, होर तिन्हें म्हठा परमेसर देख्या, जो कि यीसू आ, होर तिन्हें पवित्र आत्मा भी देखी।