23. यीसू रा जन्म

यूसुफ नांऊँआं रे एक धर्मी म्हाणुँ साऊगी मरियमा री मांगणी हुई चुकिरी थी। जेबे तिन्हें सुणेया कि मरियमे गर्भ धारण करी लईरा ता से जाणहां था कि से तेसरा बच्चा नी आ। पर, से मरियमा जो बदनाम नी करणा चाहन्दा था, इधी कठे तिन्हें तेस्सा पर दया करणे होर तेस्सा जो चुपचाप छाडणे री सोची। पर एता ले पैहले कि से एह्ड़ा करदा, एक स्वर्गदूते तेसरे सुपने मन्झ आई किन्हें तेस किन्हें गल्ला कीती।

तिन्हें स्वर्गदूते बोल्या, "हे यूसुफ, मरियमा जो आपणी लाड़ी रे रूपा मन्झ अपनाणे ले मत डर। तेस्सा रे अंदर जो बच्चा आ से पवित्र आत्मा री वखा ले आ। तेस्सा एक म्हठा जम्मणा। तेसरा नांऊँ यीसू रख्या (जेसरा मतलब आ, 'यहोवा बचाहां'), क्यूंकि तेस लोक तिन्हारे पापा ले बचाणे।"

इधी कठे यूसुफे मरियमा किन्हें ब्याह कितेया होर तेस्सा जो आपणी लाड़ी रे रूपा मन्झ घरा जो लई आया, पर बच्चे रा जन्म हूंणें तक से तेसा साऊगी नी सुतेया।

जेबे मरियम बच्चे जो जन्म देणे वाली थी, ता तेस्से होर यूसुफे बैतलेहमा जाणे रे कठे एक लम्बा सफर कितेया। तिन्हा जो तेथी जाणा जरुर था क्यूंकि रोमी हाक्म इस्राएला मन्झ रैहणे वाले सभी लोका री गिणती करणा चाहें थे। स्यों चाहें थे कि सभी लोक तेथी जाए जेथी तिन्हारे स्याणे रैह्याँ ऐं थे। राजा दाऊदा रा जन्म बैतलेहम नगरा मन्झ हुईरा था, होर से मरियम होर यूसुफ दुहीं रा स्याणा था।

मरियम होर यूसुफ बैतलेहम नगरा मन्झ गए, पर तेथी गुआणिया जो छाडी किन्हें होर कोई जगहा तिन्हारे रुकणे रे कठे नी थी। ये सेई जगहा थी जेथी मरियमे आपणे बच्चे जो जन्म दितेया। तेस्से से चरणी मन्झ लटाया क्यूंकि तेथी तेसरे कठे कोई बिस्तरा नी था। तिन्हें तेसरा नांऊँ यीसू रख्या।

तेस राती, तेथी नेडे ई डोर्हिया मन्झ कुछ पुहाल आपणे भेडा रे झुंडा री रखवाली करेया करहा ऐ थे। एकदम, एक चमकदार स्वर्गदूत तिन्हा जो सुझ्या, होर स्यों डरी गए। तिन्हें स्वर्गदूते बोल्या, "मत डरा, क्यूंकि मेरे वाले तुस्सा रे कठे खरी खबर ई। बैतलेहम नगरा मन्झ मसीह, प्रभु रा जन्म हुईरा!"

तुस्से जाई किन्हें तेस बच्चे जो तोपा, होर तुस्सा जो से कपड़े मन्झ लिपटिरा होर चरणी मन्झ लेटिरा मिलणा।" एकदम, सर्ग स्वर्गदूता किन्हें भरी गया। स्यों परमेसरा री बड़ाई करेया करहा ऐ थे। तिन्हें बोल्या, "सारी महिमा स्वर्गा मन्झ बैठिरे परमेसरा जो मिले। धरती पर तिन्हा लोका मन्झ सांति हो जिन्हारी से फिकर करहा!"

तेबे स्वर्गदूत चली गए। स्यों पुहाल भी आपणी भेडा जो छाडी किन्हें बच्चे जो देख्दे चली गए। जल्दी ई स्यों तेस जगहा पर पूजे जेथी यीसू था होर तिन्हा जो से चरणी मन्झ लेटिरा मिल्या, जिहां कि तिन्हें स्वर्गदूते बोलिरा था। स्यों बौह्त खुस थे। तेबे स्यों पुहाल वाप्स तेथी गए जेथी तिन्हारी भेडा थी। तिन्हें जो कुछ भी सुणेया होर देख्या तिन्हा सभ चीजा रे कठे स्यों परमेसरा री बड़ाई करेया करहा ऐ थे।

पूर्व दिसा वखा रे दूर एक देसा मन्झ कुछ आदमी थे। स्यों तारेया रे जाणकार थे होर स्यों बौह्त बुद्धिमान थे। तिन्हें एक अजीब तारा सर्गा मन्झ देख्या। तिन्हें बोल्या कि एता रा मतलब आ कि यहूदिया रे एक नंऊँऐं राजा का जन्म हुईरा। इधी कठे तिन्हें तेस बच्चे जो देखणे रे कठे आपणे देसा ले सफर करणे रा फैसला कितेया। एक लंबे सफरा ले बाद, स्यों बैतलेहम नगरा मन्झ आए होर तिन्हा जो से घर मिली गया जेथी यीसू होर तेसरे माऊ-बाब रुकिरे थे।

जेबे इन्हें म्हाणुँऐं यीसू जो आपणी माऊआ साऊगी देख्या ता तिन्हें घुटने पर बैठी किन्हें तेसरी अराधना किती। तिन्हें यीसू जो कीमती दान दिते। फेरी स्यों घर वाप्स चली गए।