22. यूहन्ना रा जन्म

बीते टैमा मन्झ, परमेसरे आपणे नबिया किन्हें गल्ला कीती थी इधी कठे कि स्यों लोका किन्हें गल्ला करी सके। पर तेस टैमा ले लई किन्हें फेरी 400 साल गुजरने तक तिन्हें तिन्हा किन्हें गल्ला नी कीती। तेबे परमेसरे जकर्याह नांऊँआं रे नबी वाले एक स्वर्गदूत भेज्या। जकर्याह होर तेसरी लाड़ी एलीसिबा परमेसरा रा आदर करहा ऐ थे। स्यों बौह्त स्याणे हुई गईरे थे, होर तेसरे कोई बाल बच्चे नी जम्मिरे थे।

तिन्हें स्वर्गदूते जकर्याहा किन्हें बोल्या, "तेरी लाड़ी रा एक म्हठा जम्मणा। तू तेसरा नांऊँ यूहन्ना रख्या। परमेसरा से पवित्र आत्मा किन्हें भरणा, होर यूहन्नेया लोका जो मसीह जो अपनाणे रे कठे त्यार करणा।" जकर्याहे जवाब दितेया, "हांऊँ होर मेरी लाड़ी बच्चे जम्मणे रे कठे बौह्त स्याणे ऐं! मुंजो किहाँ पता चलणा कि तुस्से मेरे किन्हें सच बोल्या करहा ऐ?"

तिन्हें स्वर्गदूते जकर्याहा जो जवाब दितेया, "परमेसरे हांऊँ तेरे वाले ये खरी खबर देणे रे कठे भेजिरा। क्यूंकि तैं मेरे पर विस्वास नी कितेया, इधी कठे बच्चे रे पैदा हुणे तक तुध टाटे हुईरे रेहणा।" तेस ई टैम, जकर्याह बोलणे रे लायक नई रेया था। तेबे से स्वर्गदूत जकर्याह वाले ले चली गया। एता ले बाद, जकर्याह घरा जो वाप्स आई गया होर तेसरी लाड़ीए गर्भ धारण कितेया।

जेबे एलीसिबा छेह महीने री गर्भवती थी, ता सेई स्वर्गदूत अचानक एलीसिबा री रिस्तेदारना पर जाहिर हुएआ, जेस्सा रा नांऊँ मरियम था। मरियम कुआरी थी होर ब्याह हूंणें रे कठे यूसुफ नांऊँआं रे आदमी साऊगी तेस्सा री मांगणी हुई बैठिरी थी। स्वर्गदूते बोल्या, "तुध गर्भ धारण करणा होर एक म्हठा जम्मणा। तू तेसरा नांऊँ यीसू रख्या। तेस सभी ले-सक्ति मान परमेसरा रा म्हठा हूंणां होर हमेसा रे कठे राज करणा।"

मरियमे जवाब दितेया, "ये किहाँ हूंणां, क्यूंकि हांऊँ ता कुआरी ई?" तिन्हें स्वर्गदूते समझाया, "पवित्र आत्मा तेरे पर आऊणा, होर परमेसरा री सामर्थ तेरे पर छाया करणी। इधी कठे से बच्चा पवित्र हूंणां, होर से परमेसरा रा म्हठा हूंणां।" मरियमे तेस स्वर्गदूता री गल्ला पर विस्वास कितेया।

ये हूंणें ले झटपट बाद, मरियमे जाई किन्हें एलीसिबा साऊगी मुलाकात कीती। जिहां ईं मरियमे तेस्सा जो नमस्कार कितेया, एलीसिबा रा बच्चा तेस्सा रे पेटा रे अंदर हिलकेया। तिन्हारे कठे परमेसरे जो कितेया था तेता रे बारे मन्झ स्यों तेस ज्नानिया रे कठे मिली किन्हें खुस हुई। एलीसिबा साऊगी तीन महीने रैहणे ले बाद, मरियम घरा जो वाप्स आई गई।

एता ले बाद, एलीसिबे आपणे बच्चे जो जन्म दितेया। जकर्याह होर एलीसिबे तेस बच्चे रा नांऊँ यूहन्ना रख्या, जिहां कि तिन्हें स्वर्गदूते हुक्म दितिरा था। तेबे परमेसरे जकर्याहा जो बोलणे रे लायक बनाया। जकर्याहे बोल्या, "परमेसरा री बडयाई हो, क्यूंकि तिन्हें आपणे लोका री मदद करणे री गल याद रखी! हे मेरे बच्चे, तुध सभी ले -सक्ति मान परमेसरा रा नबी हूंणां। तुध लोका जो दसणा कि स्यों किहाँ आपणे पापा रे कठे माफी हासल करी सक्हा ऐ! "