21. परमेसर मसीह रे आऊणे रा वादा करहा

जेबे परमेसरे संसारा री रचना कीती थी, से जाणहां था कि तेस जो बादा मन्झ केसी ध्याड़े मसीह भेजणा पऊणा। तिने आदम होर हव्वा किन्हें वायदा कीतिरा था कि तेस एह्ड़ा करणा। तिने बोल्या कि हव्वा ले एक बंस पैदा हुणा जेस सर्पा रा मूंड जिक्कणा। जिने सर्पे हव्वा जो धोखा दितेया से पकका सैतान था। परमेसरा रा मतलब था कि मसीहा पूरी तरह ले सैतान हराई देणा।

परमेसरे अब्राहमा किन्हें वादा कीतिरा था कि तेसरे ज्रीए संसारा री सारी जातिया आसरीवाद पाणा। परमेसरे बादा मन्झ केसी टैमा पर मसीह जो भेजणे रे ज्रीए ये वादा पूरा करणा। तेस मसीहा संसारा रे हर एक जातिया रे लोका जो, तिन्हारे पापा ले छुड़ाणा।

परमेसरे मूसा किन्हें वादा कीतिरा था कि आऊणे वाले टैमा मन्झ तेस मूसा साहीं एक दूजा नबी भेजणा। ये नबी मसीह हूंणां। एस तरीके ले, परमेसरे द्बारा वादा कितेया कि तेस मसीह भेजणा।

परमेसरे राजा दाऊदा किन्हें वादा कितेया था कि तेसरा एक बंस मसीह हूंणां। तेस राजा हूंणां होर परमेसर रे लोका पर सदा रे कठे राज करणा।

परमेसरे यिर्मयाह नबी किन्हें गल्ला कीती होर बोल्या कि एक ध्याड़े तेस एक नौंईं वाचा बान्हणी। से नौंईं वाचा इस्राएला साऊगी सीनै पहाड़ा पर बान्ही गईरी पूराणी वाचा साहीं नी हूंणीं। जेबे लोका साऊगी तेस आपणी नौंईं वाचा को बान्हणी, ता तेस तिन्हा पर आपु जो निजी तौरा पर जाहिर करणा। हर एक आदमिया तेस किन्हें प्यार करणा होर तेसरी व्यवस्था रा पालन करणे री इच्छा रखणी। परमेसरे बोल्या कि ये तेसरी व्यवस्था रा तिन्हारे दिला पर लिखणे साहीं हूंणां। स्यों तेसरे लोक हूंणे, होर परमेसरा तिन्हारे पाप माफ करणे। तेस मसीह हूंणां जेस तिन्हा साऊगी से नौंईं वाचा बान्हणी।

परमेसरा रे नबिए ये भी बोल्या कि मसीह एक नबी हूंणां। एक नबी से म्हाणुँ आं जो परमेसरा रे वचन सुणहां होर फेरी लोका पर परमेसरा रे संदेसा रा एलान करहा। जेस जो भेजणे रा परमेसरे वादा कीतिरा था तेस मसीहा एक सिद्ध नबी बणना। यानि तेस मसीहा परमेसरा रा संदेस ठीक ढंगा किन्हें सुणना, होर तेस लोका जो स्यों संदेस ठीक ढंगा किन्हें स्खाणे।

इस्राएली याजके लोका रे कठे परमेसरा रे अगे बलिदान चढ़ाणा जारी रख्या। ये बलिदान लोका रे पापा रे कठे तिन्हा जो परमेसर रे ज्रीए सजा दिते जाणे रे बदले मन्झ चढ़ाए गईरे थे। याजके लोका रे कठे प्रार्थना भी कीती। पर, तेस मसीह सिद्ध महायाजक हूंणां जो परमेसरा जो देणे रे कठे एक सिद्ध बलि के रूपा मन्झ आपणे आप जो आप्हुए चढ़ाई देणा। यानि, तेस कधी पाप नी करणा, होर जेबे तेस आपु जो बलि हूंणें रे कठे देणा, ता संसारा री कोई भी दूजी बलि जरूरी नी हूंणीं।

लोका रे झुंडा पर राजे होर प्रधान राज करहा ऐ, होर कधी-कधी स्यों गलतिया करहा ऐ। राजा दाऊदे सिर्फ इस्राएलिया पर राज कितेया, पर राजा दाऊदा रे बंस मसीहा पूरे संसारा पर राज करणा, होर तेस हमेसा रे कठे राज करणा। एता रे अलावा, तेस हमेसा सही तरीके ले राज करणा, होर सही फैसले लेपणे।

परमेसरा रे नबिए मसीह रे बारे मन्झ बौह्त सारी गल्ला बोली। उदाहरणा रे कठे, मलाकिए बोल्या कि मसीह रे आऊणे ले पैहले एक दूजे नबी आऊणा। से नबी बौह्त खास हूंणां। एता रे अलावा, यसायाह नबिए लिख्या कि मसीह एक कुआरी ले जम्मणा। होर मीका नबिए बोल्या कि मसीह बैतलेहम नगरा मन्झ जम्मणा।

यसायाह नबिए बोल्या कि मसीहा गलील नांऊँआं री जगहा मन्झ रैह्या करणा। जो लोक बौह्त दुःखी ऐ मसीहा तिन्हा जो सांति देणी। तेस कैदी भी अजाद करणे। मसीहा बीमार, टौणे, काणे, टाटे, होर लंगड़े भी ठीक करणे।

यसायाह नबिए ये भी बोल्या कि लोका मसीह किन्हें नफरत करणी होर तेस जो मन्नणे ले नाहं करी देणी। दूजे नबिए बोल्या कि मसीह रा एक साथी तेसरे बरख्लाफ उठणा। जकर्याह नबिए बोल्या कि तेसरा ये साथी एह्ड़ा करणे रे कठे दूजे लोका ले चाँदी रे तीह सिक्के लैणे। एता रे अलावा, कुछ नबिए बोल्या कि लोका मसीह मारी देणा, होर ये कि तिन्हा तेसरे कपड़े रे कठे जुआ खेलणा।

नबिए ये भी दस्या कि मसीहा किहाँ मरणा। यसायाहे भविस्यवाणी कीती कि लोका मसीहा पर थूकणा, तेसरा मजाक डुआणा, होर से कुटणा। तिन्हा से मेखा री धांसा किन्हें छेदणा होर तेस बड़ी पीड़ा होर दुःखा मन्झ मरी जाणा, जेबकि तिने कुछ भी गलत नी कितिरा हूंणां।

नबिए ये भी दस्या कि मसीहा पाप नी करणा। तेस सिद्ध हूंणां। पर तेस इधी कठे मरणा क्यूंकि परमेसरा तेस जो दूजे लोका रे पापा री वजहा ले सजा देणी। तेसरे मरणे ले लोका परमेसरा साऊगी मेल मिलाप करणे रे लायक बणना। इधी कठे परमेसर चाहाँ कि मसीह मरे।

नबिए ये भी दस्या कि परमेसरा मसीह मरिरे लोका मंझा ले जिऊन्दा करणा। ये दस्हा कि ये सभ नौंईं वाचा जो बान्हणे री परमेसरा री योजना थी, ताकि से तिन्हा लोका जो बचाई सके जिन्हें तेसरे बरख्लाफ पाप कितिरा।

परमेसरे नबिया पर मसीह रे बारे मन्झ बौह्त सारी गल्ला दसी, पर मसीह तिन्हा नबी मंझा ले केसी रे भी जिन्दगी जीणे रे टैम कधी नी आईरा था। ये भविस्यवाणिया देणे जाणे रे 400 साला रे बाद, सही टैमा पर, परमेसरा मसीह एस संसारा मन्झ भेजणा।