20. बंधुआई होर वाप्स आऊणा

इस्राएला रे राज्य होर यहूदा रे राज्य दुहींऐं परमेसरा रे बरख्लाफ पाप कितेया। तिन्हें से वाचा तोड़ी दिती जो परमेसरे तिन्हा साऊगी सीनै नांऊँआं रे पहाड़ा पर बान्हीं थी। परमेसरे तिन्हा जो पस्चाताप करणे होर द्बारा तेसरी अराधना करणे होर तिन्हा जो खबरदार करणे रे कठे तिन्हा वाले आपणे नबी भेजे, पर तिन्हें तिन्हारी गल्ला मन्नणे ले नाहं किती।

इधी कठे परमेसरे तिन्हारे दुस्मणा जो एस लायक बणाया कि स्यों तिन्हा जो नास करे परमेसरे तिन्हारे दुस्मणा रे ज्रीए दुहीं राज्या जो सजा दिती। अस्सुर एक दूजा देस था जो बौह्त ताकतवर हुई गईरा था। स्यों दूजे देसा रे बारे मन्झ बौह्त निर्दयी भी थे। तिन्हें आई किन्हें इस्राएला रे राज्य नास करी दितेया। अस्सुरिए आई किन्हें इस्राएला रे राज्या मन्झ कई मारी दिते, जो चाहेया से लूटी लया, होर देसा रे कई हिस्से फुकी दिते।

अस्सुरिए सभ अगुवे, अमीर लोक, होर एह्ड़े लोक जो कीमती चीजा बणाई सक्हा ऐ थे तिन्हा जो कठा करी किन्हें आपणे साऊगी अस्सुर देसा जो लई गए। इस्राएला मन्झ सिर्फ कुछ गरीब इस्राएली ई बचे।

फेरी अस्सुरी लोक तेस देसा मन्झ रैहणे रे कठे विदेसी लोक लई आए। तिन्हें विदेसी लोके स्यों नगर द्बारा बणाए। जो इस्राएली तेथी बचीरे थे तिन्हा ले तिन्हें ब्याह कितेया। इन्हा लोका के बंस सामरी कहलाए।

यहूदा रे राज्य रे लोके देख्या कि कैसे परमेसरे तेस पर विस्वास नी करणे होर तेसरी गल्ला नी मन्नणे री वजहा ले इस्राएला रे राज्य रे लोका जो सजा दिती। पर तेबे भी तिन्हें कनानिया रे देऊआ री मुर्तिया री अराधना किती। परमेसरे तिन्हा जो खबरदार करणे रे कठे नबी भेजे, पर तिन्हें सुणने ले नाहं करी दिती।

लगभग 100 साला ले बाद अस्सुरिए इस्राएला रे राज्य को नास करी दितेया। परमेसरे बेबीलोना रे राजे, नबूकदनेस्सरा जो यहूदा रे राज्य पर हमला करणे रे कठे भेज्या। बेबीलोन एक ताकतवर देस था। यहूदा रा राजा नबूकदनेस्सरा रा दास बणने होर हर साल तेस जो बौह्त सारे ढब्बे देणे रे कठे मन्नी गया।

पर कुछ साला के बाद, यहूदा रे राजे बेबीलोना रे बरख्लाफ विरोध कितेया। इधी कठे बेबीलोना रे लोके वाप्स आई किन्हें यहूदा रे राज्य पर हमला करी दितेया। तिन्हें यरूस्लेम नगरा पर कब्जा करी लया, मन्दर नास करी दिते, होर नगर होर मन्दरा रे खजाने लूटी किन्हें लई गए।

विरोध करणे री वजहा ले यहूदा रे राजे जो सजा देणे रे कठे, नबूकदनेस्सरा रे स्पाहिए राजा रा म्हठा तेसरे साम्हणे मारी दितेया होर फेरी से काणा बणाई दितेया। एता ले बाद, स्यों राजे जो लई गए ताकि से बेबीलोना री जेल्हा मन्झ मरी जाए।

नबूकदनेस्सर होर तेसरी सेना रे लोके यहूदा रे राज्य रे लगभग सारे ई लोक बेबीलोन लई गए, सिर्फ सभी ले गरीब लोक ई पीछे रखी छाडे ताकि स्यों डोर्हिया मन्झ फसल बाहें। एस टैमा जो बंधुआई रा टैम बोल्या गया जेस मन्झ परमेसरा रे लोका जो वायदे रे देसा ले निकल्ई जाणे रे कठे मजबूर कितेया गया था।

भले ही परमेसरे आपणे लोका जो तिन्हारे पापा रे कठे बंधुआई मन्झ लई जाणे रे ज्रीए सजा दिती, तेबे भी से तिन्हा जो या आपणे वायदे नी भूलिरा था। परमेसरे आपणे लोका री देखभाल करणी जारी रखी होर आपणे नबिया रे ज्रीए तिन्हा ले गल्ला करदा रैह्या। तिने वायदे कीतिरा था कि सत्तर साला ले बाद, तिन्हा द्बारा वायदे रे देसा मन्झ वाप्स आऊणा।

लगभग सत्तर साला ले बाद, फारसा रे राजे कुस्रूए बेबीलोन हराई दितेया, इधी कठे बेबीलोना रे राज्या रे बजाए फारसा रे राजे कई देसा पर राज कितेया। इस्राएली लोका जो ऐबे यहूदी बोल्या गया। तिन्हा मंझा ले कईये आपणी पूरी जिन्दगी बेबीलोना मन्झ गुजारी दिती थी। सिर्फ बौह्त थोड़े स्याणे यहूदिया जो ई यहूदा रा देस याद था।

फारसी लोक बौह्त ताकतवर थे, पर तिन्हें आपणे जीतिरे लोका पर दया कीती थी। फारसी लोका रा राजा बणने रे थोड़े टैमा ले बाद, कुस्रूए एक हुक्म दितेया कि कोई भी यहूदी जो यहूदा जो वाप्स जाणा चाहें, स्यों फारसा ले निकली किन्हें वाप्स यहूदा जो जाई सक्हा। एथी तक कि तिने तिन्हा जो द्बारा मन्दर बनाणे रे कठे ढब्बे भी दिते। इधी कठे बंधुआई के सत्तर साला ले बाद, यहूदिया रा एक छोटा झूंड यहूदा मन्झ यरूस्लेम नगरा जो वाप्स आए।

जेबे स्यों लोक यरूस्लेम पूजे ता तिन्हें मन्दर होर नगरा रे चहुँ पासे री दीवाल द्बारा बणाई। फारसी लोक ऐबे भी तिन्हा पर राज करहा ऐ थे पर एक बार द्बारा स्यों वायदे रे देसा मन्झ रैह्या करहा ऐ थे होर मन्दरा मन्झ अराधना करेया करहा ऐ थे।