19. नबी

परमेसरा हमेसा इस्राएलिया वाले नबी भेज्दा रैह्याँ था। नबी परमेसरा ले संदेस सुणहां ऐं थे होर फेरी तेस संदेसा जो लोका जो दस्हा ऐ थे।

जेबे अहाब इस्राएल राज्या रा राजा था ता तेस टैम एलिय्याह नबी था। अहाब एक बुरा म्हाणुँ था। तिने झूठे बाल देऊआ री अराधना करवाणे रे कठे लोक मजबूर किते थे। इधी कठे एलिय्याहे अहाबा किन्हें बोल्या कि परमेसर तिन्हा लोका जो सजा देणे जाया करहा। तिने तेस किन्हें बोल्या, "जेबे तक मैं द्बारा बरखा हूंणें रे कठे नी बोलूँ तेबे तक इस्राएला रे राज्या मन्झ न बरखा हूंणीं होर ना ई पाल्आ पऊणा।" एस गल्ला ले अहाबा जो इतना गुस्सा करी दितेया कि तिने एलिय्याहा जो मारणे रा फैसला कितेया।

इधी कठे परमेसरे एलिय्याहा किन्हें बोल्या कि से जंगला मन्झ जाई किन्हें अहाबा ले ल्हुखी जाए। एलिय्याह जंगला मन्झ तेस पाणी रे चस्मे वाले गया जेथी जाणे रे कठे परमेसरे तेस जो दस्या था। हर भ्यागा होर हर सांझा, पंछी एलिय्याह रे कठे रोटी होर मास लई किन्हें आहूँआं ऐं थे। एस पुरे टैमा, अहाब होर तेसरी सेना एलिय्याहा जो तोपेया करहा ऐ थे, पर स्यों तेस जो नी तोपी सके।

बरखा नी हूंणें ले कुछ टैमा ले बाद से पाणी रा चस्मा सुकी गया। इधी कठे एलिय्याह नेडे रे ई एक देसा मन्झ चली गया। तेस देसा मन्झ एक गरीब विधवा थी जेस्सा रा एक म्हठा था। तिन्हा वाले खाणा लगभग मुकी चुकिरा था क्यूंकि तेथी कोई फसल नी हुई थी। पर फेरी भी, तेस्से ज्नाने एलिय्याहा री देखभाल कीती, इधी कठे परमेसरे तेसरी होर तेसरे म्हठे री जरूरत पूरी किती, एस वजहा ले तेस्सा रे आटे रा भांडा होर तेस्सा रे तेला री कुप्पी कधी खाली नी हुई। तेस पूरे अकाला रे बीच तिन्हा वाले खाणा था। एलिय्याह कुछ साला तक तेथी रैह्या।

साढ़े तीन साला ले बाद, परमेसरे एलिय्याहा किन्हें बोल्या कि से द्बारा बरखा करणा चाहाँ। तिने एलिय्याहा किन्हें वाप्स इस्राएला रे राज्या मन्झ जाई किन्हें अहाबा किन्हें गल्ला करणे रे कठे बोल्या। इधी कठे एलिय्याह अहाबा वाले गया। जेबे अहाबे से देख्या ता तिने बोल्या, "अच्छा तू आ, परेसानी खड़ी करणे वाला!" एलिय्याहे जवाब दितेया, "परेसानी खड़ी करणे वाल्आ ता तू आपु आ! तैं यहोवा परमेसर छाडी दितेया। सेई सच्चा परमेसरा आ, पर तू बाल देऊआ री अराधना करेया करहा। ऐबे तुजो इस्राएल राज्य रे सभ लोका जो कर्मेल पहाड़ा पर लई किन्हें आऊणा पऊणा।"

इधी कठे सभ लोक कर्मेल पहाड़ा जो गए। स्यों आदमी भी आए जो बोल्हा ऐ थे कि स्यों बाल देऊआ रे संदेस बोल्हा ऐ। ये बाल देऊआ रे नबी थे। स्यों सभ 450 थे। एलिय्याहे लोका किन्हें बोल्या, "केभे तक तुस्से तुस्से णे मन भटकाई रखणे? अगर यहोवा परमेसरा आ ता तेसरी अराधना करा! अगर बाल परमेसरा आ ता तेसरी अराधना करा!"

तेबे एलिय्याहे बाल देऊआ रे नबिया किन्हें बोल्या, "एक जानवरा जो बलि करी किन्हें तेसरा मास बलिदान हूंणें रे कठे एक वेदी पर रखा, पर आग मत लगाणा। तेता ले बाद मां भी तेहड़ा ई करणा, होर एक अलग वेदी पर मां से मास रखणा। तेबे अगर परमेसर वेदी पर आग बरसाए ता तुस्सा जाणी लैणा कि से सच्चा परमेसरा आ।" तेबे बाल देऊआ रे नबिए एक बलि त्यार किती पर आग नी लगाई।

तेबे बाल देऊआ रे नबिए बाल देऊआ ले प्रार्थना कीती, "हे बाल, आस्सा री सुण!" पूरे ध्याड़े तिन्हें प्रार्थना कीती होर चिल्लाए होर एथी तक कि आपु जो चाकुआ किन्हें काटदे लगे, पर बाल देऊए कोई जवाब नी दितेया, होर तिने कोई आग नी बरसाई।

बाल देऊआ रे नबिए बाल देऊआ ले प्रार्थना करणे मन्झ लगभग पूरा ध्याड़ा बिता दितेया। बादा मन्झ तिन्हें प्रार्थना करणी बंद करी दिती। तेबे एलिय्याहे दूजे जानवरा रा मास परमेसरा री वेदी पर रख्या। तेता ले बाद, तिने लोका किन्हें पाणी रे बडे भांडे जो तेस्सा बलि पर तेबे तक दलणे रे कठे बोल्या जेबे तक कि मास, लकड़िया, होर एथी तक कि वेदी रे नेडे री जमीन पूरी तरह ले सघी नी गई।

तेबे एलिय्याहे प्रार्थना कीती, "हे यहोवा परमेसर, अब्राहम, इसहाक, होर याकूबा रे परमेसर, आस्सा जो दसा कि तुस्से इस्राएला रे परमेसर ऐ होर ये कि हांऊँ तुस्सा रा दास आ। मुंजो जवाब देआ ताकि ये लोक जाणी जाए कि तुस्से ई सच्चे परमेसर ऐ।"

तेस ई टैम, सर्गा ले आग पई होर तिने मास, लकड़िया, चट्टानें, मिट्टी, होर एथी तक कि वेदी रा ओरले परले पासे रा पाणी भी फुकी दितेया। जेबे लोके ये देख्या, ता स्यों जमीन पर पई गए होर बोले, "यहोवा ई परमेसर आ! यहोवा ई परमेसर आ!"

तेबे एलिय्याहे बोल्या, "बाल देऊआ रा एक भी नबी बची किन्हें नी जाणे पाए!" इधी कठे लोके बाल देऊआ रे नबी पकड़ी लए होर तिन्हा जो तेथी ले लग लई गए होर स्यों मारी दिते।

तेबे एलिय्याहे अहाब राजे किन्हें बोल्या, "झटपट तुस्से आपणे घरा जो भगी जाऊआ, क्यूंकि बौह्त बरखा हूंणें वाली ई।" एकदम ई बादल घणे हुई गए, होर भारी बरखा सुर्हू हुई गई। यहोवा परमेसर इतने साला रा सूखापन खत्म करेया करहा था। एता ले ये जाहिर हुएआ कि यहोवा ई सच्चा परमेसरा आ।

जेबे एलिय्याहे आपणा काम पूरा करी किन्हें मुकाई दितेया, ता परमेसरे एलिसा नांऊँआं रे एक आदमी जो नबी हूंणें रे कठे चुणेया। परमेसरे एलिसा रे ज्रीए बौह्त सारे चमत्कार किते। एक चमत्कार नामाना साऊगी हुएआ। से एक दुस्मणा री सेना रा मुखिया था, पर तेस जो चमड़ी री एक बुरी ब्मारी हुई गईरी थी। नामाने एलिसा के बारे मन्झ सुणेया था, इधी कठे से एलिसा वाले आया होर तेसले तेस जो ठीक करणे रे कठे अर्ज किती। एलिसे नामाना किन्हें बोल्या कि जाई किन्हें यरदन नदी रे पाणी मन्झ सात बार डुबकी लगाई ले।

नामान गुस्से हुई गया। तिने एह्ड़ा करणे ले नाहं किती, क्यूंकि ये तेस जो वेवकूफी रा काम लग्या। पर बादा मन्झ तेस आदमी रा मन बदली गया होर तिने जाई किन्हें यरदन नदी रे पाणी मन्झ सात बार डुबकी लगाई। जेबे आखरी बारी से पाणी ले बाहर निकल्या ता परमेसरे से ठीक करी दितेया।

परमेसरे इस्राएला रे लोका वाले दूजे बौह्त सारे नबी भेजे। तिन्हें सभिए लोका किन्हें मुर्तिया री अराधना करणा बंद कर देणे रे कठे बोल्या। एता रे बजाए, तिन्हा जो एक दूजे साऊगी सही न्याय करी किन्हें व्यवहार करणा चहिए होर एक दूजे पर दया करणी चहिए। तिन्हें नबिए लोक खबरदार किते कि तिन्हा जो बुरे काम करणे बंद करणे पऊणे होर एता रे बजाए परमेसरा री गल्ला रा पालन करणा पऊणा। अगर तिन्हें लोके एह्ड़ा नी कितेया ता परमेसरा तिन्हा जो दोसी मन्नी किन्हें तिन्हारा न्याय करणा, होर तिन्हा जो सजा देणी।

ज्यादा टैम, तिन्हें लोके परमेसरा रे हुक्मा रा पालन नी कितेया। हमेसा तिन्हें नबिया साऊगी बुरा व्यवहार कितेया होर एथी तक कि कधी-कधी स्यों मारी दिते। एक बार, तिन्हें यिर्मयाह नबी जो सुके कुएँ मन्झ पाई दितेया होर से तेथी मरणे रे कठे छाडी दितेया। से कुएँ रे अंदर चिकड़ा मन्झ फसी गया। पर तेबे राजे जो तेस पर दया आई होर तिने आपणे स्पाहिया जो हुक्म दितेया कि यिर्मयाहा रे मरणे ले पैहले तेस जो कुएँ ले बाहर काढी दे।

नबिए परमेसरा री वखा ले बोलणा जारी रख्या भले ई लोके तिन्हा ले नफरत कीती। तिने लोक खबरदार किते कि अगर तिन्हें पस्चाताप नी कितेया ता परमेसरा स्यों नास करी देणे। तिन्हें लोका जो ये भी याद कराया कि परमेसरे तिन्हारे कठे मसीह भेजणे रा वायदा कितिरा।