18. बंडीरा राज्य

दाऊद राजे चाल्ई साला तक राज कितेया। तब से मरी गया, होर तेसरे म्हठे सुलैमाने इस्राएला पर राज करणा सुर्हू कितेया। परमेसरे सुलैमाना किन्हें गल कीती होर तेसले पूछेया कि से सभी ले ज्यादा क्या चाहाँ कि परमेसर तेसरे कठे करे। सुलैमाने परमेसरा ले मांगेया कि से तेस जो बौह्त बुद्धिमान बणाई दे। एस गल्ले परमेसरा जो खुस कितेया, इधी कठे परमेसरे सुलैमाना जो संसारा रा सभी ले बुद्धिमान आदमी बणाई दितेया। सुलैमाने बौह्त सारी गल्ला सीखी होर से एक बुद्धिमान राजा था। परमेसरे से बौह्त अमीर भी बणाई दितेया था।

यरूस्लेमा मन्झ सुलैमाने से मन्दर बणाया जेसरे कठे तेसरे बापुए योजना बणाई थी होर समान कठा कितेया था। ऐबे लोक मिलाप वाले तंबू रे बजाए मन्दरा मन्झ परमेसरा री अराधना करहा ऐ थे होर तेसरे कठे बलि चढ़ाहें थे। परमेसर आई किन्हें मन्दरा मन्झ हाजर रैह्याँ था, होर तेथी से आपणे लोका साऊगी रैह्याँ था।

पर सुलैमाने दूजे देसा री ज्नानिया किन्हें प्यार कितेया। तिने बौह्त सारी, लगभग 1,000 ज्नानिया किन्हें ब्याह करी किन्हें परमेसरा रा हुक्म नी मन्नेया! इन्हा मंझा ले बौह्त सारी ज्नानिया पराए देसा ले आई होर आपणे साऊगी आपणे देऊआ जो लई आई होर तिन्हारी अराधना करणा जारी रख्या। जेबे सुलैमान स्याणा हुई गया ता तिने भी तिन्हारे देऊआ री अराधना कीती।

एस वजहा ले परमेसर सुलैमाना किन्हें गुस्सा था। तिने बोल्या कि तेस इस्राएल देस दो राज्या मन्झ बांडी किन्हें तेस जो सजा देणी। तेस सुलैमाना रे मरणे रे बाद एह्ड़ा करणा।

सुलैमाना रे मरणे ले बाद, रहबाम राजा बणेया। इस्राएल देसा रे सभ लोक तेस जो आपणे राजा के रूपा मन्झ मन्नणे करणे रे कठे मिली किन्हें साऊगी कठा हुए। तिन्हें रहबामा ले सिकायत कीती कि सुलैमाने तिन्हा ले बौह्त कठण मैहनत करवायी थी होर बौह्त सारे कर वसूले थे। तिन्हें रहबामा ले अर्ज किती कि तिन्हा ले कम काम करवाए।

पर रहबामे तिन्हा जो बौह्त ई स्यों वकूफी ले जवाब दितेया, "तुस्से बोल्हा ऐ कि मेरे बापू सुलैमाने तुस्सा ले कठण मैहनत करवायी। पर मां तुस्सा ले तेसले भी ज्यादा कठण मैहनत करवाणी, होर मां तुस्से तेसले भी ज्यादा दुःखी करणे"

जेबे लोके तेस जो एह्ड़ा बोल्दे सुणेया ता तिन्हा मंझा ले कईये तेसरे बरख्लाफ विरोध कितेया। दस गोत्रे से छाडी दितेया; तेस साऊगी ऐबे सिर्फ दो ई गोत्र बचे थे। इन्हें दो गोत्रे आपु जो यहूदा रा राज्य बोल्या।

बाकी रे दस गोत्रे यारोबाम नांऊँआं रे एक आदमी जो आपणा राजा बणाई लया। ये गोत्र देसा रे उत्तर-पूर्वी हिस्से मन्झ थे। तिन्हें आपु जो इस्राएला रा राज्य बोल्या।

पर यारोबामे परमेसरा रे बरख्लाफ विरोध कितेया होर लोका ले पाप करवाया। तिने आपणे लोका रे ज्रीए अराधना करणे के कठे दो मुर्तिया बणाई। स्यों ऐबे यहूदा रे राज्या मन्झ यरूस्लेमा मन्झ परमेसरा रे मन्दरा मन्झ तेसरी अराधना करणे रे कठे नी गए।

यहूदा होर इस्राएला रे राज्य दुस्मण बणी गए होर हमेसा एक दूजे रे बरख्लाफ लड़दे लगे।

इस्राएला रे नंऊँऐं राज्य मन्झ, सारे ई राजे बुरे थे। इन्हा मंझा ले कई राजा तिन्हारी जगहा पर राजा बणने री इच्छा रखणे वाले दूजे इस्राएलिया रे ज्रीए मारे गए थे।

इस्राएल राज्य रे सारे ई राजे होर ज्यादा ले ज्यादा लोके मुर्तिया री अराधना किती। जेबे तिन्हें एह्ड़ा कितेया, ता स्यों हमेसा वेस्या साऊगी सूते होर एथी तक कि कई बार मुर्तिया रे अगे बच्चे बलि भी किते।

यहूदा राज्य रे राजा, दाऊदा रे बंस थे। इन्हा राजेया मंझा ले कई भले म्हाणुँ थे जिन्हें सही न्याय करी किन्हें राज कितेया होर परमेसरा री अराधना किती। पर यहूदा रे बौह्त राजे बुरे थे। तिन्हें बुराई किन्हें राज कितेया, होर मुर्तिया री अराधना किती। एथी तक कि इन्हा मंझा ले कुछ राजे झूठे देऊआ रे अगे आपणे बच्चे भी बलि करी दिते। यहूदा रे बौह्त लोके भी परमेसरा रे बरख्लाफ विरोध कितेया होर दूजे देऊआ री अराधना किती।