17. दाऊदा साऊगी परमेसरा री वाचा

साऊल इस्राएला रा पैहला राजा था। से लंबा होर बांका था, जेह्ड़ा स्यों लोक चाहें थे एकदम तेहड़ा। इस्राएला पर राज करणे रे टैमा मन्झ कुछ साला तक साऊल एक बांका राजा था। पर बादा मंझा ले एक बुरा म्हाणुँ बणी गया जिने परमेसरा री गल नी मन्नी, इधी कठे परमेसरे एक दूजा म्हाणुँ चुणी लया जेस एक ध्याड़े तेसरी जगहा पर राजा बणना।

परमेसरे दाऊद नांऊँआं रा एक जुआन इस्राएली आदमी चुणी किन्हें तेस जो एक ध्याड़े साऊला री जगहा पर राजा हूंणें रे कठे त्यार करणा सुर्हू कितेया। दाऊद बैतलहम नगरा रा एक पुहाल था। कई बार, दाऊदे सेर होर भालू दुहें मारी दिते थे क्यूंकि जेबे दाऊद रखवाली करेया करहा था ता तेसरे बापू री भेडा पर तिन्हें हमला कितेया था। दाऊद एक नम्र होर धर्मी म्हाणुँ था। तिने परमेसरा पर भरोसा कितेया होर तेसरी गल मन्नी।

जेबे दाऊद हल्ली जुआन आदमी ही था, तिने लंबे-चौड़े गोलियता रे खिलाफ लड़ाई कीती। गोलियत एक बौह्त खरा स्पाही था। से बौह्त मजबूत होर लगभग तीन मीटर लंबा था! पर परमेसरे गोलियता जो मारणे होर इस्राएला जो बचाणे मन्झ दाऊदा री मदद कीती। एता ले बाद, दाऊदे इस्राएल के दुस्मणा पर कई बार जीत हासल कीती। दाऊद एक बड़ा स्पाही बणी गया, होर तिने बौह्त सारे युद्धा मन्झ इस्राएली सेना री अगुवाई कीती। लोके तेसरी बौह्त बड़ाई कीती।

लोके दाऊदा किन्हें इतना प्यार कितेया कि साऊल तेसले जहल्दा लग्या। बादा मन्झ साऊल तेस जो मारी देणा चाहाँ था, इधी कठे दाऊद तेसले होर तेसरे स्पाहिया ले ल्हुखणे रे कठे जंगला मन्झ भगी गया। एक ध्याड़े, जेबे साऊल होर तेसरे स्पाही दाऊदा री ता पा मन्झ थे ता साऊल एक गुफा मन्झ गया। ये सेई गुफा थी जेस मन्झ दाऊद ल्हुखी रा था, पर साऊले से नी देख्या। दाऊद साऊल के पीछे तेसरे बौह्त नेडे चल्या गया होर तेसरे कपड़े ले एक टुकड़ा काटी लया। बादा मन्झ, जेबे साऊल तेस गुफा ले निकल्या ता दाऊदे तेस जो हाका पाई किन्हें से काटिरा कपड़े रा टुकड़ा दस्या। एस तरीके ले, साऊल जाणी गया कि दाऊद तेस जो मारी किन्हें राजा नी बणना चाहन्दा था।

कुछ टैमा ले बाद, साऊल युद्ध मन्झ मरी गया, होर दाऊद इस्राएला रा राजा बणी गया। से एक खरा राजा था, होर लोके तेस किन्हें प्यार रख्या। परमेसरे दाऊदा जो आसरीवाद दितेया होर से कामयाब बणाया। दाऊदे कई युद्ध लड़े, होर परमेसरे इस्राएला रे दुस्मण हराणे मन्झ तेसरी मदद कीती। दाऊदे यरूस्लेम नगर जीती किन्हें से आपणी राजधानी बणाई, जेथी से रैह्या होर राज कितेया। दाऊद चाल्ई साला तक राजा रैह्या। एस टैमा रे बीच, इस्राएल ताकतवर होर अमीर बणी गया।

दाऊद एक मन्दर बनाणा चाहाँ था जेथी सारे इस्राएली परमेसरा री अराधना कर सके होर तेसरे कठे बलिदान चढ़ाई सके। लगभग 400 साला ले, स्यों लोक मूसा रे बणाईरे मिलाप वाले तंबू मन्झ परमेसरा री अराधना करेया करहा ऐ थे होर तेसरे कठे बलिदान चढ़ाया करहा ऐ थे।

पर तेथी नातान नांऊँआं रा एक नबी था। परमेसरे तेस जो दाऊदा किन्हें ये बोलणे रे कठे भेज्या: "तैं बौह्त सारे युद्ध लड़िरे, इधी कठे तुध मेरे कठे ये मन्दर नी बणाई पाणा। तेरे म्हठे ये मन्दर बनाणा। तेबे भी, मैं तुजो बौह्त ज्यादा आसरीवाद देणा। तेरा एक बंस सदा रे कठे मेरे लोका पर राजे रे रूपा मन्झ राज करणा।" सदा रे कठे राज करणे वाला से दाऊदा रा सिर्फ एक बंस मसीह था। मसीह परमेसरा रा चुणिरा आदमी था जेस संसारा रे लोक तिन्हारे पापा ले बचाणे।

जेबे दाऊदे नातान के संदेस सुणेया ता तिने परमेसरा रा धन्यवाद कितेया होर तेसरी बड़ाई कीती। परमेसर तेसरी इज्जत बढ़ाया करहा था होर तेस जो बौह्त सारा आसरीवाद देया करहा था। जरुर, दाऊद नी जाणदा था कि परमेसरा ये गल्ला केभे करणी। एस टैम आस्से जाणहां ऐं कि इस्राएलिया जो एक लंबे टैमा तक, लगभग 1,000 साला तक मसीह रे आऊणे रा इंतजार करणा पऊणा।

दाऊदे कई साला तक सही न्याय करी किन्हें आपणे लोका पर राज कितेया। तिने बड़ी खराई किन्हें परमेसरा री गल्ला मन्नी होर परमेसरे तेस जो आसरीवाद दितेया। हलांकि, आपणी जिन्दगी रे आखरी टैमा मन्झ तिने परमेसरा रे खिलाफ बौहत गंदा पाप कितेया था।

एक ध्याड़े दाऊदे आपणे मैहला ले बाहर देख्या होर एक बांकी ज्नाने नहान्दी देखी। से तेस्सा जो नी जाणदा था, पर तिने पता करी लया कि तेस्सा रा नांऊँ बतसेबा था।

आपणी नजर हटाणे रे बजाए, दाऊदे से आपु वाले सादणे रे कठे कोई भेज्या। से तेस्सा साऊगी सुतेया होर तेस जो वाप्स घर भेजी दितेया। थोड़े टैमा ले बाद बतसेबे ये बोली किन्हें दाऊदा वाले संदेस भेज्या कि तेस्से गर्भ धारण करी लईरा।

बतसेबा रा लाड़ा ऊरिय्याह नांऊँआं रा एक म्हाणुँ था। से दाऊदा रे सभी ले खरे स्पाहिया मंझा ले एक था। एस टैमा से युद्ध लड़णे रे कठे बाहर गईरा था। दाऊदे ऊरिय्याहा जो युद्धा ले वाप्स सादी किन्हें तेस जो आपणी लाड़ी साऊगी रैहणे रे कठे बोल्या। पर दूजे स्पाही युद्धा मन्झ थे इधी कठे ऊरिय्याहे घर जाणे जो जो नाहं किती। इधी कठे दाऊदे ऊरिय्याह जो वाप्स युद्धा मन्झ भेजी दितेया होर सेनापति किन्हें तेस जो युद्धा मन्झ एह्ड़ी जगहा पर रखणे रे कठे बोल्या जेथी दुस्मण सभी ले ताकतवर हो ताकि से मारेया जाए। ता एह्ड़ा हुएआ कि ऊरिय्याह युद्धा मन्झ मारेया गया।

ऊरिय्याहा रे युद्धा मन्झ मरी जाणे ले बाद दाऊदे बतसेबा किन्हें ब्याह करी लया। बादा मन्झ, तेस्से दाऊदा रे म्हठे जो जन्म दितेया। दाऊदे जो कितेया तेसले परमेसर बौह्त गुस्सा था, इधी कठे तिने नातान नबी दाऊदा जो ये दसणे रे कठे भेज्या कि तेसरा पाप कितना बुरा था। दाऊदे आपणे पापा रा पस्चाताप कितेया होर परमेसरे से माफ करी दितेया। आपणी बाकि री जिन्दगी मन्झ, आपणे कठण टैमा मन्झ भी दाऊद परमेसरा रे पीछे-पीछे चल्या होर तेसरी गल्ला मन्नी।

पर दाऊदा रा बच्चा मरी गया। एस तरीके ले परमेसरे दाऊदा जो सजा दिती। एता रे अलावा, दाऊदा रे मरणे तक, तेसरे आपणे परिवारा रे कुछ लोके तेसरे खिलाफ लड़ाई, होर दाऊदा री आपणी सक्ति कम हुई गई थी। पर परमेसर भरोसे लायक था होर ऐबे भी तिने तेहड़ा कितेया जो तिने दाऊदा किन्हें करणे का वायदा कितेया था कि तेस से करणा, भले ही दाऊदे तेसरा हुक्म नी मन्नेया था। बादा मन्झ, दाऊद होर बतसेबा रा दूजा बच्चा हुएआ, होर तिन्हें तेसरा नांऊँ सुलैमान रख्या।