16. छुड़ाणे वाल्ऐ

यहोसू रे मरणे ले बाद इस्राएलिए परमेसरा रे हुक्म नी मन्ने। तिन्हें परमेसरा रे नियमा रा पालन नी कितेया, होर तिन्हें तेस वाचा रे देसा ले बचिरे कनानी बाहर नी काढे। इस्राएलिए आपणे सच्चे परमेसर, यहोवा जो छाडी किन्हें कनानिया रे देऊआ री अराधना करणी सुर्हू किती। इस्राएलिया वाले जो ई राजा नी था, इधी कठे जेस जो सही लग्या तिने तेहड़ा कितेया।

परमेसरा रा हुक्म नी मनणे ले इस्राएलिए एक परम्परा सुर्हू करी दिती जो कई बारी दुबारा होर बार- बार किती गई। ये परम्परा एस तरीके ले चली: कुछ साला तक इस्राएलिया परमेसरा रे हुक्म नी मन्नणे, तेबे तेस स्यों तिन्हारे दुस्मणा रे ज्रीए हराई देणे। इन्हा दुस्मणा इस्राएलिया ले तिन्हारी चीजा लूटी लैणी, तिन्हारी जायदाद बर्बाद करी देणी, होर तिन्हा मंझा ले कई मारी देणे। फेरी जेबे इस्राएलिया रे दुस्मण तिन्हा पर कई साला तक अत्याचार करणा, तेता ले बाद इस्राएलिया आपणे पापा रा पस्चाताप करणा होर परमेसरा ले तिन्हा जो बचाणे रे कठे प्रार्थना करणी।

हर बार जेबे इस्राएलिया पस्चाताप करणा तेबे परमेसरा स्यों बचाणे। तेस एक छुड़ाणे वाले रे ज्रीए एह्ड़ा करणा– एक एह्ड़ा म्हाणुँ जेस तिन्हारे दुस्मणा रे खिलाफ लड़णा होर स्यों हराणे। तेबे देसा मन्झ सांति हूंणीं होर तेस छुड़ाणे वाले तिन्हा पर ठीक ढंगा किन्हें राज करणा। परमेसरे तिन्हा लोका जो बचाणे रे कठे बौह्त सारे छुड़ाणे वाले भेजे। परमेसरे तिन्हारे रे नेडे रैहणे वाली दुस्मण जाति, मिद्यानिया रे ज्रीए इस्राएलिया जो हराणे रे कठे द्बारा एह्ड़ा कितेया।

मिद्यानिए सात साला तक इस्राएलिया री फसला लूटी। इस्राएली लोक बौह्त डरी गईरे थे, होर स्यों गुफा मन्झ ल्हुखी गए ताकि मिद्यानी लोक तिन्हा जो तोपी नी सके। बादा मन्झ, तिन्हें बचणे रे कठे परमेसर पुकारेया।

गिदोन नांऊँआं रा एक इस्राएली आदमी था। एक ध्याड़े, से एक गुप्त जगहा मन्झ कणक गाह्या करहा था ताकि मिद्यानी लोक तेता जो नी चुराई सके। यहोवा परमेसरा रे स्वर्गदूते गिदोना वाले आई किन्हें तेस किन्हें बोल्या, "हे सूरवीर सूरमा, परमेसर तेरे साऊगी आ। जा होर इस्राएलिया जो मिद्यानिया ले बचा।"

गिदोना रे बापू वाले एक स्यों दी थी जो मूर्ति रे कठे समर्पित कितिरी थी। सभी ले पैहली गल जो परमेसरे गिदोना जो करणे रे कठे बोली से थी तेस्सा स्यों दी जो तोड़ने री गल। पर गिदोन लोका ले डरहा था, इधी कठे तिने रात हूंणे रा इंतजार कितेया। तेबे तिने से स्यों दी तोड़ी किन्हें टुकड़े-टुकड़े करी दीती। तिने परमेसरा रे कठे एक नई स्यों दी बणाई होर तेता पर परमेसरा रे कठे बलि चढ़ाई।

दूजे ध्याड़े भ्यागा लोके देख्या कि केसिए स्यों दी तोड़ी किन्हें टुकड़े-टुकड़े करी दितिरी थी, इधी कठे स्यों बौह्त गुस्से हुए। स्यों गिदोन जो मारी देणे रे कठे तेसरे घरा गए, पर गिदोना रे बापुए बोल्या, "तुस्से कि आपणे देऊआ री मदद करणे री कोस्त करेया करहा ऐ? अगर से देऊ आ ता तेस जो आपणी हिफाजत आप्हुए करणे देआ!" क्यूंकि तिने एह्ड़ा बोल्या इधी कठे लोके गिदोन नी मारेया।

तेबे इस्राएलिया जो लूटने रे कठे मिद्यानी लोक दबारा आए। स्यों इतने सारे थे कि तिन्हारी गिणती भी नी कीती जाई सक्हा ई थी। गिदोने तिन्हारे खिलाफ लड़ने रे कठे इस्राएली कठे हुई किन्हें सादे। गिदोने परमेसरा ले दो सबूत मांगे ताकि तेस जो विस्वास हुई जाए कि परमेसर सच्हे तेस जो इस्राएलिया जो बचाणे रे कठे बोल्या करहा।

पैहले सबूता रे कठे, गिदोने भेडा री ऊन ज्मीना पर रखी किन्हें परमेसरा किन्हें बोल्या कि भ्यागा रा पाल्आ सिर्फ भेडा री तेस्सा ऊना पर पए होर ज्मीना पर नी पए। परमेसरे एह्ड़ा ई कितेया। अगली राती, तिने परमेसरा किन्हें बोल्या कि जमीन सघी जाए पर भेडा री ऊन सुकी रहे। परमेसरे एह्ड़ा ई कितेया। इन्हा दो सबूता री वजहा ले, गिदोने विस्वास कितेया कि परमेसरा सच्हे चाहाँ कि से इस्राएलिया जो मिद्यानिया ले बचाए।

तेबे गिदोने स्पाही आपणे वाले सादे होर 32,000 आदमी आए। पर परमेसरे तेसले बोल्या कि इतने बौह्त ज्यादा ऐ। इधी कठे गिदोने तिन्हा मंझा ले 22,000 घर वाप्स भेजी दिते जो लड़ने ले डरहा ऐ थे। परमेसरे गिदोना किन्हें बोल्या कि इतने आदमी हल्ली भी बौह्त ज्यादा ऐ थे। इधी कठे गिदोने 300 स्पाहिया जो छाडी किन्हें बाकि सभ घर भेजी दिते।

तेस राती परमेसरे गिदोना किन्हें बोल्या, "मिद्यानिया रे तम्बू मन्झ जा होर तिन्हा जो ग्लान्दे सुण। जेबे तू सुणे कि स्यों क्या गल्ला करेया करहा ऐ ता तू तिन्हा पर हमला करणे ले नी डरणा।" इधी कठे तेस राती, गिदोन हेठ तिन्हारे तम्बू मन्झ गया होर तिने एक मिद्यानी स्पाही जो आपणे दोस्ता किन्हें गल दस्दे हुए सुणेया जो तिने सुपने मन्झ देखी थी। तेस आदमी रे दोस्ते बोल्या, "एस सुपने रा मतलब येआ कि गिदोना री सेना आस्सा री मिद्यानी सेना हराई देणी!" जेबे गिदोने ये सुणेया ता तिने परमेसरा री बड़ाई कीती।

तेबे गिदोन आपणे स्पाहिया वाले वाप्स आया होर तिन्हा मंझा ले हरेकी जो एक-एक नरसिंगा, एक घड़ा, होर एक-एक म्साल दीती। तिन्हें से छावनी घेरी लई जेथी मिद्यानी स्पाही सया करहा ऐ थे। गिदोना रे 300 स्पाहिए आपणी म्साले घड़े मन्झ ढकीरी थी इधी कठे मिद्यानी लोक तिन्हा म्साला रा प्रयासा नी देखी सके थे।

तेबे गिदोना रे सभ स्पाहिए आपणे घड़े एक ई टैमा पर तोड़ी किन्हें अचानक भखिरी म्साला काढी दिती। तिन्हें आपणे नरसिंगे बजाए होर चिल्लाए, "यहोवा परमेसरा री होर गिदोना री तलवार!"

परमेसरे मिद्यानी डराई दिते, इधी कठे स्यों एक दूसरे जो मारदे लगे। जल्दी ई, गिदोने आपणे खबरी भेजी किन्हें बाकि इस्राएली सादी लये ताकि स्यों मिद्यानिया रा पीछा करणे मन्झ तिन्हारी मदद करे। तिन्हें तिन्हा मंझा ले बौह्त मारी दिते होर बाकिया रा पीछा करी किन्हें स्यों इस्राएल देसा ले बाहर काढी दिते। तेस ध्याड़े 1,20,000 मिद्यानी मारे गए। एस तरीके ले परमेसरे इस्राएल बचाया।

स्यों लोक गिदोना जो आपणा राजा बनाणा चाहें थे, पर गिदोने तिन्हा जो एह्ड़ा नी करणे दितेया, लेकिन तिने तिन्हा ले स्यों सोने रे गैहणे मांगी लये जो तिन्हा मंझा ले हरेकिए मिद्यानिया ले लूटी लईरे थे। तिन्हें लोके बौह्त ज्यादा गिदोन जो सोना दितेया।

तेबे गिदोने तेस सोने ले एक खास कपड़ा बणाया जेहड़ा महायाजक पैन्हा ऐ थे। पर लोके मूर्ति साहीं तेस कपड़े री पूजा करणी सुर्हू करी दिती। तेबे परमेसरे इस्राएला जो सजा दिती क्यूंकि तिन्हें मूर्ति री पूजा किती थी। परमेसरे तिन्हारे दुस्मणा जो तिन्हा जो हराणे मन्झ तिन्हारी मदद किती। आखरी मन्झ तिन्हें दबारा परमेसरा ले मदद पाणे रे कठे प्रार्थना कीती, होर परमेसरे तिन्हा वाले तिन्हा जो बचाणे रे कठे एक होर छुड़ाणे वाल्आ भेज्या।

येई गल कई बार हुई: इस्राएली लोका पाप करणा, होर परमेसरा तिन्हा जो सजा देणी, तिन्हा पस्चाताप करणा, होर परमेसरा तिन्हा जो छुड़ाणे रे कठे कोई भेजणा। कई साला तक, परमेसरे बौह्त सारे छुड़ाणे वाल्ऐ भेजे जिन्हें इस्राएली तिन्हारे दुस्मणा ले बचाए।

आखरी मन्झ, तिन्हें लोके दूजे देसा साहीं परमेसरा ले आपणे कठे एक राजा मांगेया। स्यों एक एह्ड़ा राजा चाहें थे जो लंबा होर ताकतवर हो, होर जो युद्धा मन्झ तिन्हारी अगुवाई कर सके। परमेसरा जो ये अर्ज पसंद नी आई, पर तिने तिन्हा जो तेहड़ा राजा दितेया जेह्ड़ी तिन्हें माँग कितिरी थी।