15. वायदे रा देस

आखरी मन्झ, ऐबे से टैम आई गईरा था कि इस्राएली लोक वायदे रे देस, कनाना मन्झ दाखल हो। तेस देसा मन्झ यरीहो नांऊँआं रा एक नगर था। तेसरी हिफाजता रे कठे तेसरे चहुँ पासे मजबूत कान्धा थी। यहोसुए तेस नगरा मन्झ दो जासूस भेजे। तेस नगरा मन्झ राहाब नांऊँआं री एक वेस्या थी। तेस्से ये जासूस ल्कोए, होर फेरी बादा मन्झ तिने तिन्हारी नगरा ले बची किन्हें निकलणे मन्झ मदद कीती। तिने एह्ड़ा इधी कठे कितेया क्यूंकि से परमेसरा मन्झ विस्वास करहा ई थी। जेस टैम इस्राएली लोक यरीहो सैहर नास करणा तेबे तिन्हें राहाब होर तेसरे परिवारा री हिफाजत करणे रा वायदा कितिरा था।

इस्राएली लोका जो वायदे रे देसा मन्झ दाखल हूंणे रे कठे यरदन नदी पार करनी थी। परमेसरे यहोसू किन्हें बोल्या, "याजका जो पैहले जाणे दे।" जेबे याजके यरदन नदी मन्झ आपणे पैर रखे ता पाणी री धारा बैहणी रुकी गई, ताकि इस्राएली लोक नदी री दूजी तरफ सुकी ज्मीना पर पार जाई सके।

तिन्हा लोके यरदन नदी पार करी लई ता परमेसरे यहोसू किन्हें बोल्या कि यरीहो पर हमला करणे रे कठे त्यार रहुआ, जेब्की से बौह्त मजबूत नगर था। परमेसरे तिन्हा लोका किन्हें बोल्या कि तिन्हा याजका होर स्पाहिया जो छेह ध्याड़े तक तेस नगरा रे चहुँ पासे चक्कर लगाणे पऊणे। इधी कठे याजके होर स्पाहिए एह्ड़ा ई कितेया।

तेबे सातुए ध्याड़े, इस्राएलिए तेस नगरा रे चहुँ पासे सात बार होर चक्कर लगाए। तिन्हारे नगरा रे चहुँ पासे सातुई बार चक्कर लगाणे ले बाद, याजके आपणी तुरहिया बजाई होर स्पाहिए बौह्त जोरा री अवाज किती।

तेबे यरीहो रे चहुँ पासे री कान्धा पई गईं! जेह्ड़ा परमेसरे हुक्म दितिरा था इस्राएलिए नगरा री हर एक चीज नास करी दिती। तिन्हें सिर्फ राहाब होर तेस्सा रा परिवार छाडी दितेया, जो इस्राएलिया रे हिस्से बणी गए थे। जेबे कनाना मन्झ रैहणे वाले बाकि लोके सुणेया कि इस्राएलिए यरीहो नास करी दितेया, ता स्यों डरी गए कि इस्राएली लोका तिन्हा पर भी हमला करी देणा।

परमेसरे इस्राएलिया जो हुक्म दितिरा था कि कनाना मन्झ रैहणे वाली केसी भी जाति साऊगी मेल मिलाप देख्या करदे। पर गिबोनिया नांऊँआं री एक कनानी जातिए यहोसू किन्हें झूठ बोल्या कि स्यों कनाना ले दूर एक जगहा रे रैहणे वाले ऐ। तिन्हें यहोसू किन्हें तिन्हा साऊगी मेल मिलाप करणे री अर्ज किती। यहोसू होर बाकि इस्राएली अगुवे परमेसरा ले नी पूछेया कि तिन्हा जो क्या करणा चहिए। एता रे बजाए, तिन्हें गिबोनिया साऊगी मेल मिलाप करी लया।

तीन ध्याड़े बाद, इस्राएलिया जो पता चल्या कि गिबोनी लोक कनाना मन्झ ई रैह्याँ ऐ थे। स्यों गुस्से हुई गए क्यूंकि गिबोनिए तिन्हा जो धोखा दितेया था। पर तिन्हें तिन्हा साऊगी कितिरा मेल मिलाप बणाई रख्या क्यूंकि से परमेसरा रे साम्हणे कितिरा था। तेबे कुछ टैमा ले बाद, कनाना मन्झ रैहणे वाली एक दूजी जाति, एमोरिया रे राजे सुणेया कि गिबोनिए इस्राएलिया किन्हें मेल मिलाप करी लईरा, इधी कठे तिन्हें आपणी-आपणी सेना एक करी किन्हें एक बड़ी सेना बणाई होर बोना पर हमला करी दितेया। गिबोनिए तिन्हा री मदद करणे रे कठे यहोसू वाले एक खबर भेजी।

इधी कठे यहोसुए इस्राएलिया री सेना कठा किती होर गिबोनिया वाले पूजणे रे कठे स्यों पूरी रात चले। भ्यागा तड़के तिन्हें एमोरिया री सेना हैरान हुई गई होर तिन्हा पर हमला करी दितेया।

तेस ध्याड़े परमेसर इस्राएलिया रे कठे लड़या। तिने एमोरी डराई दिते होर तिने बड़े-बड़े सल्वाट बरसाई किन्हें बौह्त एमोरी मारी दिते।

परमेसरे सूरज भी सर्गा मन्झ एक जगहा पर रोकी दितेया ताकि इस्राएलिया जो भतेरा टैम मिली जाए कि एमोरिया जो पूरी तरह ले हराई दे। तेस ध्याड़े, परमेसरे इस्राएलिया रे कठे एक बड़ी जीत हासल किती।

जेबे परमेसरे स्यों सेना हराणे ले बाद, बौह्त सारे कनानी जाति रे लोक इस्राएला पर हमला करणे रे कठे कठा हुए। यहोसू होर इस्राएलिए हमला करी किन्हें तिन्हारा सत्यनास करी दितेया।

इन्हा युद्धा ले बाद, परमेसरे इस्राएला रे हरेक गोत्रा जो वायदे रे तेस देसा मन्झ तिन्हारा हिस्सा दितेया। तेबे परमेसरे इस्राएला री सारे हद होर बन्ने पर सांति दिती।

जेबे यहोसू बूढ़ा हुई गया ता तिने इस्राएला रे सभ लोका जो कठे सादेया। तेबे यहोसुए तिन्हा लोका जो याद कराया कि तिने तेस्सा वाचा रा पालन करणे रा वायदा कितिरा था जो परमेसरे तिन्हा साऊगी सीनै पहाड़ा पर बान्हिरी थी। तिन्हें लोके परमेसरा रे बारे मन्झ भरोसे लायक रैहणे होर तेसरे हुक्मा रा पालन करणे रा वायदा कितेया।