14. जंगला मन्झ भटकणा

परमेसरे इस्राएलिया जो स्यों नियम दसणे बंद किते जिन्हारा तिन्हा जो बान्ही गईरी तेस्सा वाचा री वजहा ले पालन करणा था। फेरी तिने सीनै पहाड़ा ले अगे तिन्हारी अगुवाई किती। से तिन्हा जो वायदा कितिरे देसा मन्झ लई जाणा चाहाँ था। एस देसा जो कनान भी बोल्या जाहाँ था। परमेसर बादला रे खम्भे मन्झ तिन्हारे अगे-अगे चल्या, होर स्यों तेसरे पीछे-पीछे चले।

परमेसरे अब्राहम, इसहाक होर याकूबा किन्हें वायदा कितिरा था कि तेस वायदे रा से देस तिन्हारे बंसा जो देणा, पर एस टैम तेथी बौह्त सारी जातिया रैह्या करहा ई थी। तिन्हा जो कनानी बोल्या जाहाँ था। ये कनानी लोक परमेसरा री आराधना नी करदे थे होर तेसरे हुक्म नी मन्नदे थे। स्यों झूठे देऊआ री अराधना करहा ऐ थे होर बौह्त सारे बुरे काम करहा ऐ थे।

परमेसरे इस्राएलिया किन्हें बोल्या, "जेबे तुस्से तेस वाचा रे देसा मन्झ जाओ ता तेथी रे सभ कनानिया ले छुटकारा पाई लया। तिन्हा लोका जो साऊगी मेल मिलाप मत करणा होर तिन्हा किन्हें ब्याह मत करणा। तुस्से तिन्हारी सभ मूर्तिया पूरी तरह ले नास करी देआ। अगर तुस्से मेरे हुक्म नी मन्नघे, ता तुस्सा मेरे बजाए तिन्हारे देऊआ री अराधना करणी सुर्हू करी देणी।"

जेबे इस्राएली कनाना री हदा वाले पूजे, ता मूसे इस्राएला रे हरेक गोत्रा मंझा ले एक-एक करी किन्हें बारा म्हाणुँ छांटे। तिने जाई किन्हें तेस देसा री जासूसी करणे रे हुक्म दिते कि देख्हा ऐ कि से केहड़ा देस आ। तिन्हा कनानिया री जासूसी भी करणी थी कि देख्हा ऐ कि स्यों ताकतवर ऐ कि कमजोर।

तिन्हें बारा म्हाणुँऐं पूरे कनाना ले हुंदे हुए चाली ध्याड़े रा सफर कितेया होर फेरी स्यों वाप्स आई गए। तिन्हें लोका जो दस्या कि, "से देस बौह्त पजाऊ आ होर फसल बौह्त ज्यादा ई!" पर दस जासूसे बोल्या, "तिन्हारे नगर बौह्त मजबूत ऐ होर स्यों लोक लंबे-चौड़े ऐ! अगर आस्से तिन्हा लोका जो पर हमला करे, ता तिन्हा आस्से पक्का हराई देणे होर आस्से मारी देणे।"

झटपट ई कालेब होर यहोसू होर बाकि दो जासूसे बोल्या, "ये सच आ कि कनाना रे लोक लंबे होर ताकतवर ऐ, पर जरुर आस्से तिन्हा जो हराई सक्हा ऐ! परमेसरा आस्सा रे कठे लड़णा!"

पर लोके कालेब होर यहोसू री नी सुणी। स्यों मूसा होर हारून पर गुस्से हुए होर बोल्या, "तुस्से आस्सा जो एस खतरनाक जगहा पर कि लई आईरे? आस्सा जो मिस्र देसा मन्झ ई रैहणा चहिए था। अगर आस्से तेस देसा जो चली जाईऐ ता आस्सा युद्धा मन्झ मारी दिते जाणे, होर कनाना रे लोका आस्सा री लाड़िया होर बच्चे गुलाम बणाई लैणे।" स्यों लोक वाप्स मिस्र देसा मन्झ जाणे रे कठे एक होर अगुवा छांटणा चाहें थे।

जेबे तिन्हा लोका जो लोके एह्ड़ा बोल्या ता परमेसर बौह्त गुस्से हुई गया। से मिलाप वाले तंबू मन्झ आया होर बोल्या, "तुस्से मेरे खिलाफ विद्रोह कितेया, इधी कठे तुस्से सभी जो एस रेगिस्थाना मन्झ भटकणा पऊणा। हर एक आदमी जो बीह साल या तेता ले ज्यादा उम्रा रे हो तिन्हा तेथी मरी जाणा होर कधी भी तेस देसा मन्झ नी जाई पाणा जो मैं तुस्सा जो देणे वाला था। सिर्फ कालेब होर यहोसूआ ही तेथी जाई पाणा।"

जेबे लोके परमेसरा जो एह्ड़ा बोल्दे सुणेया, ता स्यों दुखी हुए क्यूंकि तिन्हें पाप कितेया था। इधी कठे तिन्हें कनाना रे लोका पर हमला करणे रा फैसला कितेया। मूसे तिन्हा जो नी जाणे रे कठे खबरदार कितेया था क्यूंकि परमेसरे बोलिरा था कि तेस तिन्हा लोका साऊगी नी जाणा, पर तिन्हें तेसरी गल नी सुणी।

परमेसर एस युद्धा मन्झ तिन्हा लोका साऊगी नी गया था, इधी कठे कनानिए स्यों हराई दिते होर तिन्हा मंझा ले बहुत मारी दिते। तेबे इस्राएली लोक कनाना ले वाप्स आई गए। अगले चाली सालों तक, तिन्हा रेगिस्थाना मन्झ ओरे-परे भटकणा।

इस्राएली लोक रेगिस्थाना मन्झ चाली साल तक भटक्दे रहे होर तेस टैम, परमेसरे तिन्हारी जरुरता पूरी किती। तिने तिन्हा जो स्वर्गा ले "मन्ना" बोली जाणे वाली रोटी दीती। तिने बटेरा रे झुंड भी (जो कि न ज्यादा बडे होर ना ज्यादा छोटे हूंहाँ ऐं) तिन्हारे डेरे मन्झ भेजे ताकि तिन्हा वाले खाणे रे कठे मास हो। तेस पूरे टैम, परमेसरे तिन्हारे कपड़े होर जूते फटणे नी दिते।

एथी तक कि परमेसरे तिन्हारे पीणे रे कठे नौखे तरीके ले चट्टाना मंझा ले पाणी काढेया। पर इन्हा सभी चीजा ले बाद, इस्राएली लोके परमेसरा रे खिलाफ होर मूसा रे खिलाफ सिकायत कीती होर कुड़कुड़ाए। तेबे भी, परमेसर भरोसे लायक था। तिने जो वायदा अब्राहम, इसहाक, होर याकूबा रे बंसा रे कठे कितिरा था तिने तेहड़ा ई कितेया।

एक होर बारी जेबे तिन्हा लोका वाले पाणी नी था, परमेसरे मूसा किन्हें बोल्या, "चट्टाना किन्हें गल्ला कर, होर तेस ले पाणी निकलणा।" पर मूसे चट्टाना साऊगी गल्ला नी कीती। पर एता रे बजाए, तिने छट्टी किन्हें चट्टाना पर दो बारी मारी। एस तरीके ले तिने परमेसरा री बेज्जती किती। सभी रे पीणे रे कठे चट्टाना ले पाणी ता निकल्ई गया, पर परमेसर मूसा किन्हें गुस्सा हुई गया। तिने बोल्या, "क्यूंकि तैं एह्ड़ा कितेया, इधी कठे तुध वायदे कीतिरे देसा मन्झ नी जाई पाणा।"

जेबे इस्राएली लोक चाली साला तक रेगिस्थाना मन्झ भटकी चुकिरे थे, तेबे जिन्हें परमेसरा रे खिलाफ विद्रोह कितिरा था स्यों सभ मरी गए। तेबे परमेसर तिन्हा लोका जो द्बारा तेस वायदे कितिरे देसा रे हदा तक लई गया। अब मूसा बौह्त स्याणा हुई गईरा था, इधी कठे परमेसरे लोका री अगुवाई करणे मन्झ तेसरी मदद करणे रे कठे यहोसू चुणी लया। परमेसरे मूसा किन्हें ये वायदा भी कितिरा था कि एक ध्याड़े तेस तिन्हा लोका वाले मूसा साहीं एक नबी भेजणा।

तेबे परमेसरे मूसा जो एक पहाड़ा री चोटी पर जाणे रे कठे बोल्या ताकि से वायदे रा देस देखी सके। मूसे से वायदे रा देस ता देख्या पर परमेसरे तेस जो तेस देसा मन्झ जाणे री इजाजत नी दीती। तेबे मूसा मरी गया, होर इस्राएलिए तीह ध्याड़े तक दुःख मनाया। यहोसू तिन्हारा नंऊँआं अगुवा बणी गया। यहोसू एक अच्छा अगुवा था क्यूंकि तिने परमेसरा पर भरोसा कितेया होर तेसरी गल्ला मन्नी।