13. इस्राएला साऊगी परमेसरा री वाचा

इस्राएलिया जो लाल समुद्रा ले पार लई जाई जाणे ले बाद, परमेसरा तिन्हा जो रेगिस्तानी इलाके ले हुई किन्हें सीनै नांऊँआं रे पहाड़ा वखा जो लई जाई किन्हें चल्या। ये सेई पहाड़ था जेथी मूसे भख्दी झाड़ी देखी थी। तिन्हें लोके तेस पहाड़ा हेठ आपणे तम्बु खड़े किते।

परमेसरे मूसा किन्हें होर इस्राएला रे सभ लोका किन्हें बोल्या, "तुस्से हमेसा मेरी गल्ला मन्या होर मेरे साऊगी बान्हिरी वाचा जो मेरे किन्हें बणाए रख्या। अगर तुस्से एह्ड़ा करघे, ता तुस्सा मेरा इनाम कीमती धन, याजका रा राज्य, होर एक पवित्र जाति बणना।"

परमेसरा रे ज्रीए तिन्हा आऊणे वाले रे कठे लोके तीन ध्याड़े तक आपु जो त्यार कितेया। तेबे परमेसर सीनै पहाड़ा री चोटी ले हेठ उतरेया। जेबे से आया ता हिल्लण हुएआ, बिजलिया चमकी, धूँआ उठेया, होर तुरहिया री जोरदार अवाज हुई। तेबे मूसा आप्हुए ऊपर पहाड़ा पर चढ़ी गया।

तेबे परमेसरे लोका साऊगी एक वाचा बान्ही। तिने बोल्या, "मैं तुस्सा रा यहोवा परमेसर आ। मैं ईं आं जिने तुस्से मिस्र देसा री गुलामी ले छुड़ाया। केसी दूजे देऊआ री अराधना मत करणा।"

मुर्तिया मत बनाणा होर तिन्हारी अराधना मत करणा, क्यूंकि मैं, यहोवा, तुस्सा रा सिर्फ एक ई परमेसर आ। मेरा नांऊँ बेकार गल्ला मन्झ इस्तेमाल मत करणा। सब्ता रा ध्याड़ा पवित्र मनणे रे कठे याद रखणा। दूजे सब्दा मन्झ, छेह ध्याड़े मन्झ ता आपणे सारे काम करणा, पर सातुआ ध्याड़ा तुस्सा रे कठे अराम करणे होर मुंजो याद करणे रे कठे आ।

आपणे माऊ-बाबा री इज्जत करणा। हत्या नी करणा। व्यभिचार नी करणा। चोरी नी करणा। आपणे पड़ोसी री लाड़ी, तेसरे घर, या तेसरे केसी भी चीजा पाणे री इच्छा मत करणा।

तेबे परमेसरे ये दस हुक्म पात्थर दो पटिया पर लिखी किन्हें मूसा जो देई दिते। परमेसरे पालन करणे रे कठे लोका जो होर भी कई नियम दिते। अगर स्यों इन्हा हुक्मा रा पालन करघे ता परमेसरा तिन्हा लोका जो आसरीवाद देणा होर तिन्हारी हिफाजत करणी पर तिने बोल्या कि अगर तिन्हें इन्हा रा पालन नी कितेया ता तेस तिन्हा जो सजा देणी।

परमेसरे इस्राएलिया जो एक बडा तंबू –मिलाप वाला तंबू बनाणे रे कठे भी बोल्या। तिने तिन्हा जो ठीक कि दस्या कि ये तंबू को किहाँ बनाणा, होर तेसरे अंदर क्या-क्या चीजा रखणी। तिने तिन्हा जो तंबू जो दो कमरे मन्झ बांडणे करणे रे कठे एक बडा पर्दा बनाणे रे कठे भी बोल्या। परमेसर तेस पर्दे रे पीछे वाले कमरे मन्झ आऊणा होर तेथी रैहणा। जेथी परमेसर था तेस कमरे मन्झ जाणे री इजाजत सिर्फ महायाजका जो थी।

तिन्हा लोका जो तेस मिलाप वाले तंबू रे साम्हणे एक वेदी बनाणी पऊणी। कोई भी जो परमेसरा री व्यवस्था नी मन्ने से तेस्सा वेदी पर एक जानवर लई जाई किन्हें आए। तेबे याजक से बलि करे होर वेदी पर परमेसरा रे कठे बलि रे रूपा मन्झ जलाए। परमेसरे बोल्या कि तेस जानवरा रे खूना तेस म्हाणुँ रे पाप ढकी देणे। एस तरीके ले, ऐबे परमेसरा से पाप नी देखणा। से म्हाणुँ परमेसरा री नजरा मन्झ "सुद्ध" बणना। परमेसरे मूसा रे भाई हारुना जो होर हारूना रे बंसा जो आपणे याजक हूंणे रे कठे चुणेया।

परमेसरे तिन्हा लोका जो, जो नियम दितिरे थे स्यों तिन्हारा पालन करणे रे कठे राजी हुए। स्यों सिर्फ परमेसरा रे लोक हूंणे जो होर सिर्फ तेसरी आराधना करणे रे कठे राजी हुए।

कई ध्याड़े तक, मूसे सीनै पहाड़ा री चोटी पर ई रैह्या। से परमेसरा किन्हें गल्ला करेया करहा था। पर लोक तिन्हा वाले वाप्स आऊणे रा इंतजार करदे-करदे थकी गए। इधी कठे स्यों हारूना वाले सोना लई आए होर तेस ले एक मूर्ति बनाणे रे कठे बोल्या ताकि स्यों परमेसरा रे बजाए तेसरी आराधना कर सके। एस तरीके ले, तिन्हें बौह्त बुरे तरीके ले परमेसरा रे बरख्लाफ पाप कितेया।

हारूने बछु साहीं एक सोने री एक मूर्ति बणाई। तिन्हें लोके तेस्सा मूर्ति री अराधना करणा सुर्हू करी दिती होर तेस जो बलि चढ़ाई! तिन्हा लोका रे पापा री वजहा ले परमेसर तिन्हा लोका किन्हें बौह्त गुस्से हुएआ था। से तिन्हा जो नास करी देणा चाहाँ था। पर मूसे तिन्हा जो नी मारणे रे कठे परमेसरा ले अर्ज किती। परमेसरे तेसरी अर्ज सुणी होर स्यों नास नी किते।

आखरी मन्झ मूसा सीनै पहाड़ा ले हेठ उतरेया। से तिन्हा लोका रे कठे दो पात्थरा री पटिया लई किन्हें आया करहा था जिन्हा पर परमेसरे दस हुक्म लिखिरे थे। फेरी तिने से मूर्ति देखी। से इतना ज्यादा गुस्सा हुएआ कि तिने स्यों पटिया तोड़ी किन्हें टुकड़े-टुकड़े करी दिती।

फेरी मूसे से मूर्ति टुकड़े-टुकड़े पीसी किन्हें तेता रा बुरादा बणाई दितेया, होर तेस बुरादे जो पाणी मन्झ मिलाई किन्हें तिन्हा लोका जो से पाणी प्यायी दितेया। परमेसरे तिन्हा लोका पर एक विपदा भेजी होर तिन्हा मंझा ले बौह्त लोक मरी गए।

जो पटिया मूसे तोड़ी दिती थी तिन्हारे बदले मूसे द्बारा दस हुक्मा वाली पात्थरा री नौंईं पटिया बणवाई। तेबे से द्बारा पहाड़ा पर चढ़ी गया होर प्रार्थना कीती कि परमेसरा तिन्हा लोका जो माफ करे। परमेसरे मूसा री सुणी होर स्यों माफ करी दिते। नौंईं पटिया पर दस हुक्मा रे कठे हुए मूसा पहाड़ा ले हेठ उतरी आया। तेबे परमेसरे सीनै पहाड़ा ले लई किन्हें वायदे रे देसा तक इस्राएलिया री अगुवाई कीती।