12. निकलणा

इस्राएली लोक मिस्र देसा ले निकली किन्हें बौह्त खुस थे। स्यों ऐबे गुलाम नी थे, होर स्यों वायदे कितिरे देसा जो जाया करहा ऐ थे! जो कुछ भी इस्राएलिए मांगेया, मिस्रिए तिन्हा जो से सभ कुछ देई दितेया, एथी तक कि सोना होर चाँदी होर बाकि कीमती चीजा। दूजे देसा रे लोके परमेसरा पर विस्वास कितेया होर जेबे इस्राएली लोक मिस्र देसा ले निकले ता स्यों भी तिन्हा साऊगी चली पये।

पुरे ध्याड़े बादला रा एक बडा खम्भा तेसरे अगे-अगे चलया। होर रातके टैम ये आगी रा खम्भा बणी गया। परमेसरा जो कि तेस बादला रे खम्भे मन्झ होर आगी रे खम्भे मन्झ था, हमेसा तिन्हा साऊगी था होर तिने सफर करदे टैम तिन्हारी अगुवाई किती। तिन्हा जो सिर्फ तेसरे पीछे पीछे चलना था।

थोड़े टैमा ले बाद, फिरौन होर तेसरे लोके आपणे मन बदली दितेया। स्यों इस्राएलिया जो द्बारा आपणा गुलाम बनाणा चाहें थे। इधी कठे तिन्हें इस्राएलिया रा पीछा कितेया। ये परमेसर ई था जिने तिन्हारे मन बदली दिते थे। तिने एह्ड़ा इधी कठे कितेया क्यूंकि से चाहाँ था कि हर कोई ये जाणी ले कि फिरौना ले होर मिस्रिया रे सभ देऊआ ले से, यहोवा परमेसर, ज्यादा ताकतवर आ।

जेबे इस्राएलिए मिस्र देसा री सेना आऊन्दी देखी ता तिन्हा जो पता चल्या कि स्यों फिरौना री सेना होर लाल समुद्रा रे बीच फसी गए। स्यों बौह्त डरी गए होर रोंदे लगे, "आस्से मिस्र देस कि छाडेया? आस्से मरणे वाले ऐ!"

मूसे इस्राएलिया किन्हें बोल्या, "डरणा बंद करा! परमेसरा आज तुस्सा रे कठे लड़णा होर तुस्से बचाणे।" तेबे परमेसरे मूसा किन्हें बोल्या, "इन्हा लोका किन्हें बोल कि स्यों लाल समुद्रा वखा जो बढ़ी जाऊआ।"

तेबे परमेसरे से बादला रा खम्भा इस्राएलिया होर मिस्रिया रे बीच रखी दितेया ताकि मिस्री लोक इस्राएलिया जो देखी नी सके।

परमेसरे मूसा किन्हें समुद्रा पर आपणा हाथ बढ़ाणे रे कठे बोल्या। फेरी परमेसरे हऊआ किन्हें समुद्रा रा पाणी बाईं होर दाईं तरफ करी दितेया, ताकि समुद्रा ले हुई किन्हें एक पैंडा बणी सको।

इस्राएली लोक आपणी दुहीं तरफ बणिरी पाणी री कान्धा रे सहारे सुकी ज्मीना पर समुद्रा ले हुई किन्हें अगे चलदे गए।

तेबे परमेसरे तेस पैंडे ले बादल चकी लया ताकि मिस्री लोक इस्राएलिया जो बची किन्हें जांदे हुए देखी सके। मिस्रिए तिन्हा जो पकड़ने रे कठे तिन्हारा पीछा करणे रा फैसला लया।

इधी कठे तिन्हें समुद्रा रे ज्रीए तेस पैंडे पर इस्राएलिया रा पीछा कितेया, पर परमेसरे मिस्री डराई दिते होर तिन्हारे रथ अटकाई दिते। स्यों चिल्लान्दे लगे, "भगा! इस्राएलिया री वखा ले परमेसर लड़ेया करहा!"

सारे इस्राएली समुद्रा री दूजी तरफ पूजी गए। तेबे परमेसरे मूसा किन्हें बोल्या कि से दबारा पाणी पर आपणा हाथ बढ़ाए। जेबे मूसे एह्ड़ा कितेया, ता पाणी मिस्री सेना पर पई गया होर पाणी द्बारा जेह्ड़ा का तेहड़ा हुई गया। सारी मिस्री सेना डूबी गई।

जेबे इस्राएलिए देख्या कि मिस्री लोक मरी गए ता तिन्हें परमेसरा पर विस्वास कितेया। तिन्हें विस्वास कितेया कि मूसा परमेसरा री वखा ले नबी आ।

इस्राएली लोक इधी कठे भी बौह्त खुस थे क्यूंकि परमेसरे स्यों मरणे ले होर गुलाम बणने ले बचाई लईरे थे। अब स्यों परमेसरा री आराधना करणे होर तेसरे हुक्मा रा पालन करणे रे कठे अजाद थे। इस्राएलिए आपणी अजादी रा जसन मनाणे रे कठे होर परमेसरा री बड़ाई करणे रे कठे कई गीत गाये क्यूंकि तिने स्यों मिस्रिया री सेना ले बचाईरे थे।

परमेसरे इस्राएलिया जो हर साल एक साजा मनाणे रा हुक्म दितेया ये याद करणे रे कठे कि किहाँ परमेसरे मिस्री हराई दिते होर स्यों गुलाम बणने ले अजाद किते। एस जो फसह रा साजा बोल्या गया। एता मन्झ तिन्हा जो एसरा साजा मनाणे रे कठे एक भले चंगे मेमने री बलि करणी थी, तेस्सा बलि रा मास भूनणा था, होर से बगैर खमीर वाली रोटी साऊगी खाणा था।