11. फसहा रा साजा

परमेसरे मूसा होर हारुना जो फिरौना वाले ये बोलणे रे कठे भेज्या कि इस्राएलिया जो जाणे दे। तिन्हें तेस जो खबरदार कितेया कि अगर से तिन्हा जो नी जाणे देंघा, ता परमेसरा मिस्र देस देसा रे लोका रे होर जानवरा रे सभ पैहलौठे मारी देणे। फिरौने ये सुणी किन्हें भी परमेसरा पर विस्वास करणे ले होर तेसरी गल मन्नणे ले इनकार करी दितेया।

परमेसरे तेस पर विस्वास करणे वाले केसी रे भी पहलौठे म्हठे जो बचाणे रे कठे एक उपाय सोच्या। हरेक परिवारा जो एक सुद्ध मेमना मारणा जरूरी था।

परमेसरे इस्राएलिया किन्हें बोल्या कि स्यों तेस मेमने रा खून लई किन्हें आपणे घरा रे दरवाजे पर लगाणे रे कठे बोल्या। तिन्हा जो तेस मेमने रा मास भूनणा था होर फेरी तिन्हा जो से अखमीरी रोटी साऊगी से जल्दी-जल्दी खाणा था। से खाणा खाणे ले बाद तिने तिन्हा जो झटपट मिस्र देस छाडणे रे कठे त्यार रैहणे रे कठे बोल्या।

जेह्ड़ा करणे रे कठे परमेसरे इस्राएलिया जो हुक्म दितेया था तिन्हें तेसरे मुताबक सभ कुछ कितेया। आधी राती, परमेसर हर एक पहलौठे म्हठे जो मारदे हुए मिस्र देसा रे बीचा ले हुई किन्हें गुजरेया।

इस्राएलिया रे हर एक घरा रे दरवाजे पर खून लगिरा था, इधी कठे परमेसरे स्यों घर छाडी दिते। तिन्हा घरा रे अंदर सभ लोक सही सलामत थे। स्यों मेमने रे खूना री वजहा ले बची गईरे थे।

लेकिन मिस्री लोके परमेसरा पर विस्वास नी कितेया होर तेसरे हुक्म नी मन्नेया। इधी कठे परमेसरे तिन्हारे घर नी छाडे। परमेसरे मिस्रिया रे हर एक पैहलौठे म्हठे मारी दिते।

जेल्हा रे कैदिया रे पैहलौठे ले लई किन्हें, फिरौना रे पैहलौठे तक, हर एक पहलौठा नर मरी गया। आपणे बौह्त दुःखा री वजहा ले मिस्र देसा रे बौह्त सारे लोक रोया करहा ऐ थे।

तेस ई रात, फिरौने मूसा होर हारून सादे होर बोल्या, "इस्राएलिया जो लई जाई किन्हें ऐबे ई मिस्र देसा ले निकली जाऊआ!" मिस्र देसा रे लोके भी इस्राएलिया जो तेथी ले जल्दी निकलणे री अर्ज किती।