10. दस विपदा

परमेसरे मूसा होर हारूना जो खबरदार कितिरा था कि फिरौना जिद्दी बणी जाणा। जेबे स्यों फिरौना वाले गए ता तिन्हें बोल्या, "इस्राएला रा परमेसर एह्ड़ा बोल्हा, 'मेरे लोका जो जाणे दे!'" पर फिरौने तिन्हारी गल नी सुणी होर इस्राएलिया जो जाणे रे कठे अजाद करणे रे बजाए तिने तिन्हा जो होर सख्त मैहनत करणे रे कठे मजबूर कितेया।

फिरौन तिन्हा लोका जो जाणे देणे ले लगातार इनकार करदा रैह्या, इधी कठे परमेसरे मिस्र देसा पर दस भयंकर विपदा भेजी। इन विपदा रे ज्रीए, परमेसरे फिरौना जो दस्या कि से फिरौन होर मिस्र देसा रे देऊआ ले ज्यादा ताकतवर आ।

परमेसरे नील नदी जो खूना मन्झ बदली दितेया, पर फिरौने हल्ली भी इस्राएलिया जो जाणे नी दितेया।

परमेसरे सारे मिस्र देसा मन्झ मिनके भेजे। फिरौने मिनके दूर करणे रे कठे मूसा ले अर्ज किती। पर सभ मिनके मर जाणे ले बाद, फिरौने आपणा मन सख्त करी लया होर इस्राएलिया जो मिस्र देसा ले निकलणे नी दितेया।

इधी कठे परमेसरे मच्छरा री विपदा भेजी। तेता ले बाद तिने माहूँ री विपदा भेजी। फिरौने मूसा होर हारून बुलाए होर तिन्हा किन्हें बोल्या कि अगर स्यों से विपदा रोकी दे ता इस्राएली मिस्र देस छाडी किन्हें जाई सक्हा ऐ। जेबे मूसे प्रार्थना किती ता परमेसरे मिस्र देसा ले माहूँ हटाई दिते। पर फिरौने आपणा मन सख्त करी लया होर तिन्हा लोका जो अजाद हुई किन्हें जाणे नी दितेया।

इसके आगे, परमेसरे मिस्रिया रे सभ पालतू जानवर बीमार हुई किन्हें मरी जाणे दिते। पर फिरौना रा मन सख्त हुई गईरा था होर तिने इस्राएली जाणे नी दिते।

तेबे परमेसरे मूसा किन्हें फिरौना रे साम्पणे हऊआ मन्झ सुआह सटणे रे कठे बोल्या। जेबे तिने एह्ड़ा कितेया ता मिस्र देसा रे लोका री चमड़ी पर पीड़ हूंणें वाले फोड़े निकल्ऐ, पर इस्राएलिया जो कुछ नी हुएआ। परमेसरे फिरौना रा मन सख्त करी दितेया, होर फिरौने इस्राएलिया जो अजाद हुई किन्हें जाणे नी दितेया।

एता ले बाद, परमेसरे सल्वाट बरसाए होर मिस्र देसा री बौह्त ज्यादा फसल तबाह करी दिती होर जो कोई भी बाहर निकल्या से मारी दितेया। फिरौने मूसा होर हारून सादे होर तिन्हा किन्हें बोल्या, "मैं पाप कितेया। तुस्से लोक जाई सक्हा ऐ।" इधी कठे मूसे प्रार्थना किती, होर सर्गा ले सल्वाट पऊणे रुकी गए।

पर फिरौने द्बारा पाप कितेया होर आपणा मन सख्त करी लया। तिने इस्राएली अजाद हुई किन्हें जाणे नी दिते।

इधी कठे परमेसरे मिस्र देसा पर टिटले रे झुण्ड भेजे। इन्हें टिटले तिन्हारी सारी फसल खाई दिती जो सल्वाटा ले नास हूंणे ले बची गईरी थी।

फेरी परमेसरे न्ह्यारा करी दितेया जो तीन ध्याड़े तक बणी रैह्या। ये इतना घणा न्ह्यारा था कि मिस्री लोक आपणे घरा ले नी निकली सके। पर जेथी इस्राएली लोक रैह्याँ ऐं थे तेथी प्रयासा था।

ये नौ विपदा ले बाद भी, फिरौने इस्राएलिया जो अजाद हुई किन्हें जाणे ले नाहं करी दिती। क्यूंकि फिरौने नी सुणी इधी कठे परमेसरे एक आखरी विपदा भेजणे री सलाह बणाई। एस्सा विपदा फिरौना रा मन बदली देणा।