9. परमेसर मूसा जो साद्हा

यूसुफा रे मरणे ले बाद तेसरे सभ रिस्तेदार मिस्र देसा मन्झ बसी गए। स्यों होर तिन्हारे बंस कई साला तक मिस्र देसा मन्झ ई रहे होर तिन्हारे बौह्त बाल बच्चे हुए। तिन्हा जो इस्राएली बोल्या गया।

कई सौ साला ले बाद, इस्राएलिया री गिणती बौह्त बढ़ी गईरी थी। होर मिस्री लोक ऐबे एस गल्ला रे कठे धन्यवादी नी थे कि तिन्हारी मदद करणे रे कठे यूसुफे बौह्त कुछ कितेया था। स्यों इस्राएलिया ले डरी गए क्यूंकि स्यों गिणती मन्झ तिन्हा ले बौह्त ज्यादा थे। इधी कठे तेस टैम मिस्र देसा पर राज करणे वाले फिरौने इस्राएलिया जो मिस्रिया रा गुलाम बणाई दितेया।

मिस्रिए इस्राएलिया जो बौह्त सारे भवन होर एथी तक कि कई नगरा जो बनाणे रे कठे मजबूर कितेया। तेस्सा सख्त मैहनता री वजहा ले तिन्हारी जिन्दगी बौह्त दुःख देणे वाली बणी गई, पर परमेसरे तिन्हा जो आसरीवाद दितेया होर तिन्हारे ज्रीए होर ज्यादा बाल बच्चे जम्मे।

फिरौने देख्या कि इस्राएलिया रे बौह्त बाल बच्चे जम्मेया करहा ऐ थे, इधी कठे तिन्हें आपणे लोका जो ये हुक्म दितेया कि स्यों इस्राएलिया रे सभ नर बच्चे जो नील नदी मन्झ सटी किन्हें मारी दे।

एक इस्राएली ज्नानिये एक नर बच्चे को जन्म दितेया। तेस्से होर तेस्सा रे लाड़े जितना तिन्हा ले हुई सक्या से बच्चा ल्कोई किन्हें रख्या।

जेबे तेस बच्चे रे माऊ-बाब तेस जो होर ज्यादा नी ल्कोई सके, ता तिन्हें से मारे जाणे ले बचाणे रे कठे एक तैरणे वाली टोकरी मन्झ नील नदी रे बाढे सरकंडेया रे बीच रखी दितेया। तेसरी बड़ी बैहणिए ये देखणे रे कठे तेसरी निगराणी किती कि तेस साऊगी क्या हूंणां।

फिरौना री म्हठिए तेस्सा टोकरी जो देखी किन्हें तेता रे अंदर देख्या। जेबे तेस्से एक बच्चा देख्या ता तेस्से से आपणे बच्चे रे रूपा मन्झ अपनाई लया। तेस्से एक इस्राएली ज्नाने जो तेस जो दूध प्याणे रे कठे कामा पर रखी लया, बगैर ये जाणे कि से तेस बच्चे री असली माऊ थी। जेबे से बच्चा इतना बड़ा हुई गया कि ऐबे तेस जो आपणी माऊआ रे दूधा री जरूरत नी थी, ता तेस्से से फिरौना री म्हठी वाले वाप्स भेजी दितेया, तेसरा नांऊँ मूसा था।

एक ध्याड़े, जेबे मूसा बड़ा हुई गया, ता तिने देख्या कि एक मिस्री एक इस्राएली म्हाणु जो पिटेया करहा था। मूसे आपणे साथी इस्राएली जो बचाणे री कोस्त किती।

जेबे मूसे सोच्या कि से केसिया नी देखणा ता तिने से मिस्री मारी दितेया होर तेसरी ल्हास दफन करी दिती। पर मूसे जो कितेया था तेस जो केसिए देखी लईरा था।

फिरौना जो पता चली गया कि मूसे क्या कितिरा। तिने तेस जो मारणे री कोस्त किती, पर मूसा मिस्र देसा ले रेगिस्थाना रे इलाके मन्झ भगी गया। फिरौना रे स्पाही तेस जो तेथी तोपी नी सके।

मिस्र देसा ले दूर रेगिस्थाना रे इलाके मन्झ मूसा एक पुहाल बणी गईरा था। तिने तेथी एक ज्नाने किन्हें ब्याह करी लया होर तेसरे दो म्हठे जम्मे।

मूसा आपणे सौहरे री भेडा रे झुंडा रा ख्याल रख्हा था। एक ध्याड़े, तिने एक भखिरी झाड़ी देखी जो भस्म हुए बगैर भख्या करहा ई थी। तेस्सा झाड़ी जो देखणे रे कठे से तेस्सा झाड़ी रे नेडे गया। जेबे से तेस्सा झाड़ी रे बौह्त नेडे था ता परमेसरे तेस किन्हें गल किती। तिने बोल्या, "हे मूसा, आपणे चप्पलिया तुआरी दे। तू एक पवित्र जगहा पर खड़हिरा।"

परमेसरे बोल्या, "मैं आपणे लोका रे दुःख देखिरे। मां तू फिरौना वाले भेजणा ताकि तू इस्राएलिया जो मिस्र देसा री गुलामी ले काढी किन्हें लई आए। मां तिन्हा जो कनान देस देणा, जेसरे बारे मन्झ मैं अब्राहम, इसहाक होर याकूबा किन्हें वायदा कितिरा।"

मूसे पूछ्या, "अगर लोके जाणना चाहेया कि हांऊँ कुन्ने भेजिरा ता हांऊँ क्या बोलूँ?" परमेसरे बोल्या, "जो हांऊँ आं से हांऊँ आं। तिन्हा किन्हें बोल, कि जेसरा नांऊँ 'हांऊँ आं तिने हांऊँ तुस्सा वाले भेजिरा।' तिन्हा किन्हें ये भी बोल्या, 'कि हांऊँ तुस्सा रे स्याणेया रा यानि अब्राहम, इसहाक होर याकूबा रा परमेसर यहोवा आ।' मेरा ये नांऊँ हमेसा रा आ।"

मूसा डरहा था होर फिरौना वाले जाणा नी चाहन्दा था क्यूंकि तिने सोच्या कि तेस ठीक ढंगा किन्हें नी बोली पाणा, इधी कठे परमेसरे मूसा रा भाई, हारून, तेसरी मदद करणे रे कठे भेज्या।