8. परमेसर यूसुफ होर तेसरे परिवारा जो बचाहाँ

कई साला बाद, जेबे याकूब स्याणा हुई गया था, ता तिने आपणे प्यारे म्हठे यूसुफा जो तेसरे भाईया री देख रख करणे रे कठे भेज्या जो जानवरा रे झुंडा री देखभाल करेया करहा ऐ थे।

यूसुफा रे भाई तेस किन्हें हिर्ख करहा ऐ थे क्यूंकि तिन्हारा बापू तेस किन्हें ज्यादा प्यार करहा था होर इधी कठे भी कि यूसुफे सुपना देख्या था कि तेस तिन्हारा राजा बणी जाणा। जेबे यूसुफ आपणे भाईया वाले आया ता तिन्हें से बंधक बणाई लया होर तेस जो गुलाम बनाणे रा धंधा करणे वालेया जो बेची दितेया।

घर वाप्स आऊणे ले पैहले यूसुफा रे भाईये यूसुफा रे कपड़े छेकी किन्हें बकरी रे खूना मन्झ डबोई दितेया। फेरी तिन्हें से कपड़ा आपणे बापू जो दस्या ताकि तेस ये सोचणा कि केसी जंगली जानवरे यूसुफ मारी दितेया। याकूब बौह्त उदास था।

गुलाम बेचणे होर खरीदणे रा धंधा करणे वाले लोके यूसुफा जो मिस्र देस लई गए। नील नदी रे बाढे बस्सिरा मिस्र एक बड़ा होर ताकतवर देस था। तिन्हें गुलाम बेचणे होर खरीदणे रा धंधा करणे वाले लोके यूसुफा जो एक अमीर सरकारी हाक्मा जो गुलामा रे रूपा मन्झ बेची दितेया। यूसुफे आपणे माल्का री ठीक ढंगा किन्हें सेऊआ कीती, होर परमेसरे यूसुफा जो आसरीवाद दितेया।

तेसरे माल्का री लाड़िए यूसुफा साऊगी सऊणे री कोस्त किती, पर यूसुफे एस तरीके ले परमेसरा रे खिलाफ पाप करणे ले इनकार करी दितेया। से गुस्से हुई गई होर तेस्से यूसुफा पर झूठा इल्जाम लगाई दितेया, इधी कठे तेस जो पकड़ी किन्हें जेल्हा मन्झ भेजी दितेया। एथी तक कि जेल्हा मन्झ भी, यूसुफ परमेसरा रे बारे मन्झ सच्चा बणी रैह्या, होर परमेसरे तेस जो आसरीवाद दितेया।

दो साला ले बाद, यूसुफ अभी भी जेल्हा मन्झ था, चाहे से बेकसूर था। मिस्री लोक आपणे राजेया जो फिरौन बोल्हा ऐ थे, एक राती, फिरौने दो सुपने देखे जिन्हें से बौह्त परेसान करी दितेया। तेसरा कोई भी सलाहकार तेस जो तिन्हा सुपने रा मतलब नी दसी सक्या।

परमेसरे यूसुफा जो सुपने रा मतलब दसणे रा हुनर दितिरा था, इधी कठे फिरौने यूसुफ जेल्हा ले आपु वाले सादेया। यूसुफे तेस जो तिन्हा सुपने रा मतलब दस्या होर बोल्या, "परमेसर खूब फसला वाल्ऐ सात साला ले बाद अकाला रे सात साल भेजणे वाल्आ आ।"

फिरौना पर यूसुफा रा इतना असर हुएआ कि तिने से मिस्र देसा रा दूजा सभी ले ताकतवर आदमी नियुक्त करी दितेया।

यूसुफे लोका किन्हें खरी फसला वाले सात साला रे अंदर-अंदर बड़ी मात्रा मन्झ नाज जमा करणे रे कठे बोल्या। जेबे सात साला रा अकाल आया तेबे यूसुफे लोका जो से नाज बेच्या ताकि तिन्हा वाले खाणे रे कठे भतेरा हो।

से अकाल सिर्फ मिस्र देसा मन्झ ई नी, पर कनाना मन्झ भी बौह्त ज्यादा था जेथी याकूब होर तेसरा परिवार रैह्याँ था।

इधी कठे याकूबे आपणे सभी ले बड़े म्हठे जो नाज खरीदने रे कठे मिस्र देस भेज्या। जेबे स्यों नाज खरीदने रे कठे यूसुफा रे साम्हणे खड़े हुए ता तिन्हें भाईये यूसुफ नी पछ्याणेया। पर यूसुफे स्यों पछ्याणी लए।

ये पता करणे रे कठे कि क्या स्यों बदली गईरे तिन्हा जो परखणे ले बाद, यूसुफे तिन्हा किन्हें बोल्या, "हांऊँ तुस्सा रा भाई यूसुफ आ! डरा मत। जेबे तुस्से हांऊँ गुलामा रे रूपा मन्झ बेचीं दितेया था ता तुस्से बुरा करणे री सोची थी, पर परमेसरे से बुराई भलाई रे कठे इस्तेमाल किती! आऊआ होर मिस्र देसा मन्झ रहुआ ताकि हांऊँ तुस्सा रे होर तुस्सा रे परिवारा रे कठे खाणे रा इंतजाम करी सकूँ।"

जेबे यूसुफा रे भाई घर वाप्स आए होर आपणे बापू याकूबा जो दस्या कि यूसुफ हल्ली भी जिऊन्दा आ ता से बौह्त खुस हुएआ था।

हलांकि याकूब एक स्याणा म्हाणुँ था तेबे भी से आपणे पूरे परिवारा साऊगी मिस्र देसा जो चली गया, होर स्यों तेथी बसी गए। याकूबा रे मरणे ले पैहले, तिने आपणे हरेक म्हठे जो आसरीवाद दितेया।

वाचा रे ये वायदे जो परमेसरे अब्राहमा किन्हें कितिरी थे स्यों ऐबे इसहाका पर होर तेसरे बाद याकूबा पर, होर तेसरे बाद तेसरे बारह म्हठे पर होर तिन्हारे परिवारा पर आई गईरे थे। स्यों बारा म्हठे रे बंस इस्राएला रे बारा गोत्र बणी गए।