7. परमेसर याकूबा जो आसरीवाद देहां

जेबे स्यों बच्चे बड़े हुए ता याकूबा जो घरा रैहणा खरा लग्या, पर एसावा जो जानवरा रा सिकार करणा खरा लग्या। रिबके याकूबा किन्हें प्यार कितेया, लग्या इसहाके एसावा किन्हें प्यार रख्या।

एक ध्याड़े, जेबे एसाव सिकार करी किन्हें वाप्स आया ता से बौह्त भूखा था। एसावे याकूबा किन्हें बोल्या, "जो तैं पकाईरा तेता मंझा ले थोड़ा जे खाणा मुंजो दे।" याकूबे जवाब दितेया, "पैहले मेरे किन्हें ये वायदा कर कि पहलौठा हूंणें री वजहा ले हर एक चीज जो तुजो मिलणी चहिए, से सभ तू मुंजो देआ।" इधी कठे एसावे स्यों सभ चीजा याकूबा जो देणे रा वायदा करी दितेया। तेबे याकूबे तेस जो कुछ खाणा दितेया।

इसहाक एसावा जो आसरीवाद देणा चाहाँ था। पर एता ले पैहले कि तिने एह्ड़ा कितेया, रिबका होर याकूबे याकूबा रा एसाव हूंणें रा ढोंग करी किन्हें तेस साऊगी धोखा कितेया। इसहाक स्याणा था होर ऐबे देखी नी पांदा था। इधी कठे याकूबे एसावा रे कपड़े पैहने होर बकरी री खाल आपणे गल्ऐ होर हाथा पर लपेटी दिती।

याकूब इसहाका वाले आया होर बोल्या, "हांऊँ एसाव आ। हांऊँ इधी कठे आईरा कि तू मुंजो आसरीवाद दे।" जेबे इसहाके बकरी रे बाल्अ मैहसूस किते होर कपड़े सिंघे, ता तिने सोच्या कि से एसाव आ होर तेस जो आसरीवाद दितेया।

एसावे याकूबा किन्हें हिर्ख कीती क्योंकि याकूबे तेसरे पैहले म्हठे रा हक होर एता साऊगी ई तेसरे आसरीवाद भी चुराई लईरे थे। इधी कठे तिने आपणे बापू रे मरणे ले बाद याकूबा जो मारी देणे री सलाह बणाई।

पर रिबके एसावा री सलाह सुणी लई। इधी कठे तेस्से होर इसहाके याकूबा जो तेसरे रिस्तेदारा साऊगी रैहणे रे कठे बौह्त दूर भेजी दितेया।

याकूब कई साला तक रिबका रे रिस्तेदारा साऊगी रैह्या। तेस टैमा रे अंदर-अंदर तिने ब्याह कितेया होर बारा म्हठे होर एक म्हठी को जन्म दितेया। परमेसरे से बौह्त अमीर बणाई दितेया।

बीह साला तक कनाना मन्झ आपणे घरा ले दूर रैहणे ले बाद, याकूब आपणे परिवार, आपणे सेऊआदारा, होर आपणे जानवरा रे सारे झुंडा साऊगी तेथी वाप्स आया।

याकूब इधी कठे बौह्त डरी गईरा था क्योंकि तिने सोच्या कि एसाव ऐबे भी तेस जो मारणा चाहाँ था। इधी कठे तिने इनामा रे तौरा पर जानवरा रे झुंड एसावा वाले भेजे। जो सेऊआदार तिन्हा झुंडा जो लई किन्हें गईरे थे तिन्हें बोल्या, "तेरा दास याकूब, ये जानवर तुजो देहां। से आपु जल्दी ई आऊन्दा लगिरा।"

पर एसाव ऐबे याकूबा जो नुकसान पहुँचाना नी चाहन्दा था। एता रे बजाए, से तेस जो एक बार द्बारा देखी किन्हें बौह्त खुस था। तेता ले बाद याकूब कनाना मन्झ बड़ी सांति किन्हें रैह्या। फेरी इसहाक मरी गया होर याकूब होर एसावे से दफनाई दितेया। वाचा रे वायदे जो परमेसरे अब्राहमा किन्हें कितिरे थे स्यों ऐबे इसहाका ले याकूबा पर आई गईरे थे।