6. परमेसर इसहाका रे कठे इंतजाम करहा

जेबे अब्राहम बौह्त खपरा हुई गया था तेबे तेसरा म्हठा, इसहाक, एक मर्धा री उम्रा रा हुई गईरा था। इधी कठे अब्राहमे आपणे एक सेऊआदारा जो आपणे म्हठे इसहाका रे कठे तेस देसा ले एक लाड़ी ल्याऊणे रे कठे भेज्या जेथी तेसरे रिस्तेदार रैह्याँ ऐं थे।

जेथी अब्राहमा रे रिस्तेदार रैह्याँ थे तेस देसा जो जाणे री एक बड़े लंबे सफरा ले बाद परमेसरे तेस सेऊआदारा री मुलाकात रिबका साऊगी करवायी। से अब्राहमा रे भाई री पोत्री थी।

रिबका आपणे परिवारा जो छाडी किन्हें तेस सेऊआदारा साऊगी वाप्स जाणे रे कठे मन्नी गई। जिहां ईं स्यों पूजे इसहाके तेस्सा किन्हें ब्याह करी लया।

एक लंबे टैमा ले बाद, अब्राहम मरी गया। तेबे परमेसरे अब्राहमा रे म्हठे इसहाका जो, अब्राहमा साऊगी बान्हिरी वाचा री वजहा ले आसरीवा दितेया। तेस वाचा मन्झ परमेसरा रा एक वायदा था कि अब्राहमा रे बेहिसाब बंस हूंणे। पर इसहाका री लाड़ी रिबका रे बच्चे नी जम्मे।

इसहाके रिबका रे कठे प्रार्थना किती, होर परमेसरे तेस्सा जो जुड़वा बच्चेया रा गर्भ धारण करणे रे लायक बणाया। जेस टैम स्यों बच्चे रिबका रे गर्भा मन्झ ई थे स्यों आपु मन्झ लड़ने लगे, इधी कठे जो कुछ हुएआ करहा था रिबके से परमेसरा जो दसी दितेया।

परमेसरे रिबका किन्हें बोल्या, "तुध दो म्हठेया जो जन्म देणा। तिन्हारे बंस दो लग-लग जातिया बणनी। तिन्हा एकी दूजे किन्हें लड़ना। पर बड़े म्हठे ले जम्मणे वाली जाति जो छोटे म्हठे ले आऊणे वाली जाति रा हुक्म मन्नणे पऊणा।"

जेबे रिबका रे बच्चेया रा जन्म हुएआ, तो बड़ा म्हठा लाल होर बाल्आ वाला था, होर तिन्हें तेसरा नांऊँ एसाव रख्या। तेबे छोटा म्हठा एसावा री आडी पकड़ी किन्हें जम्मेया, होर तिन्हें तेसरा नांऊँ याकूब रख्या।