5. वायदे रा म्हठा

अब्राहम होर सारा रे कनान देस पूजने ले दस साला ले बाद, हल्ली तक भी तिन्हारे कोई बच्चे नी थे। इधी कठे, अब्राहमा री लाड़ी सारे तेस किन्हें बोल्या, "क्यूंकि परमेसरे हल्ली तक हांऊँ बच्चे जो जम्मणे लायक नी बणाईरी होर ऐबे हांऊँ बच्चे जो जम्मणे रे कठे बौह्त खपरी हुई गईरी, देख, मेरी नकरयाण हाजिरा एथी ई। तेस्सा किन्हें भी ब्याह करी ले ताकि से मेरे कठे एक बच्चा जम्मी सके।"

इधी कठे अब्राहमे हाजिरा किन्हें ब्याह करी लया। हाजिरा रा एक म्हठा जम्या, होर अब्राहमे तेसरा नांऊँ इस्माएल रख्या। पर सारा हाजिरा किन्हें जहल्दी लगी। जेबे इस्माएल तेरहा साला रा था, परमेसरे द्बारा अब्राहमा किन्हें गल किती।

परमेसरे बोल्या, "हांऊँ सभी ले महान परमेसर आ। मां तेरे साऊगी एक वाचा बान्हणी।" तेबे अब्राहमे ज्मीना पर लम्बे पई किन्हें सजदा कितेया। परमेसरे अब्राहम तेस जो ये भी बोल्या, "तुध बौह्त सारी जातिया रा बापू बणना। मां तुजो होर तेरी पीढ़िया रे लोका जो तिन्हारी आपणी ज्मीना हूंणे रे कठे कनान देस देणा होर मां हमेसा रे कठे तिन्हारा परमेसर बणना। तुजो आपणे घरा रे हर मर्धा रा खतना करवाणा पऊणा।"

तेरी लाड़ी सारा एक म्हठा जणना– तेस वायदे रा वह म्हठा हूंणां। तेसरा नांऊँ इसहाक रख्या। मां तेस्सा साऊगी आपणी वाचा बणाए रखणी होर से ता एक बड़ी जाति बणी जाणी। मां इस्माएल भी एक बड़ी जाति बनाणी, पर मेरी वाचा इसहाका साऊगी बणी रैहणी। तेबे परमेसरे अब्रामा रा नांऊँ बदली किन्हें अब्राहम करी दितेया, जेसरा मतलब आ "कईया रा बापू"। परमेसरे सारा रा नांऊँ भी बदली किन्हें सारा करी दितेया, जेसरा मतलब आ "कईया री माऊ"।

तेस ध्याड़े अब्राहमे आपणे घरा रे सभ मर्धा रा खतना कितेया। लगभग एक साला ले बाद, जेबे अब्राहमा री उम्र 100 साल हुई होर सारा री उम्र 90 साल हुई, तेबे सारे अब्राहमा रे म्हठे जो जन्म दितेया। जेहड़ा परमेसरे तिन्हा जो बोल्या था तिन्हें तेसरा नांऊँ इसहाक रख्या।

जेबे इसहाक जुआन हुएया ता परमेसरे ये बोली किन्हें अब्राहमा रे विस्वासा री परखणी किती, "आपणे एकलौता म्हठा लई किन्हें, तेस जो मेरे कठे बलि रे रूपा मन्झ मारी दे।" द्बारा अब्राहमे परमेसरा री गल मन्नी होर आपणा म्हठा बलि करणे रे कठे त्यार कितेया।

जेबे अब्राहम होर इसहाक बलि चढ़ाणे री जगहा वखा जो जांदे लगे ता इसहाके पूछया, "हे बापू, आस्सा वाले बलि रे कठे लकड़िया ता हाई, पर बलि करणे रा गाभू केथी आ?" अब्राहमे जवाब दितेया, "हे मेरे बेटे, परमेसरा बलि करणे रे कठे गाभू रा इंतजाम आप्हुए करणा।"

जेबे स्यों बलि चढ़ाणे री जगहा पर पूजी गए, ता अब्राहमे इसहाक बान्ही किन्हें वेदी पर ल्टायाई दितेया। से आपणे म्हठे मारणे ई वाल्आ था कि परमेसरे बोल्या, "रुकी जा! बच्चे जो नुकसान मत पहुँचा! ऐबे हांऊँ जाणी गया कि तू मेरा डर मन्हा क्यूंकि तैं आपणा एकलौता म्हठा भी मेरे ले बचाई किन्हें भी नी रख्या।"

नेडे ई अब्राहमे एक गाभू देख्या जो झाड़िया मन्झ फस्सिरा था। इसहाका रे बदले बलि रे कठे परमेसरे गाभू रा इंतजाम कितेया था। अब्राहमे बौह्त खुसी किन्हें गाभू री बलि चढ़ाई दिती।

तेबे परमेसरे अब्राहमा किन्हें बोल्या, "क्यूंकि तू मेरे कठे सब कुछ देणे जो त्यार था, एथी तक कि आपणा एकलौता म्हठा भी, इधी कठे हांऊँ तुजो आसरीवाद देणे रा वायदा करहा। तेरी पीढ़िया रे लोक सर्गा रे तारेया ले भी ज्यादा हूंणे। क्यूंकि तैं मेरा हुक्म मन्निरा इधी कठे मां तेरे परिवारा रे ज्रीए संसारा रे सभ कुला जो आसीस देणी।"