4. अब्रामा साऊगी परमेसरा री वाचा

बाढ़ा रे कई साला बाद, संसारा मन्झ बौह्त सारे लोक रैह्याँ ऐं थे, होर तिन्हें द्बारा परमेसरा रे होर एक दूजे रे खिलाफ पाप कितेया। क्यूंकि स्यों सभ एक ई भासा बोल्हा ऐ थे, इधी कठे स्यों कठे हुए होर तिन्हें परमेसरा रे हुक्मा रे मुताबक संसारा जो म्हाणुआं किन्हें भरणे रे बजाए एक नगर बणाया।

स्यों बौह्त घमण्डी थे, होर तिन्हा जो केह्ड़ी जिन्दगी जीणी चहिए एस बारे मन्झ स्यों परमेसरा रे हुक्मा रा पालन करणा नी चाह्न्दे थे। एथी तक कि तिन्हें एक एह्ड़ी मीनार बनाणी सुर्हू किती जो स्वर्गा तक पुजणी। परमेसरे देख्या कि अगर स्यों कट्ठे मिली किन्हें बुराई करदे रैहणा, ता स्यों बौह्त पापा रे काम करी सक्हा ऐ।

इधी कठे परमेसरे तिन्हारी भासा बौह्त सारी लग-लग भासा मन्झ बदली दितेया होर तिन्हा लोका जो सारे संसारा मन्झ फैल्हाई दितेया। जो नगर तिन्हें बनाणा सुर्हू कितेया था तेस नगरा जो बाबेल बोल्या गया, जेसरा मतलब आ "गड़बड़ी"।

कई सौ साला ले बाद, परमेसरे अब्राम नांऊँआं रे एक म्हाणुँ किन्हें गल किती। परमेसरे तेस किन्हें बोल्या, "आपणे देस होर परिवारा जो छाडी किन्हें तेस देसा जो चली जा जो मां तुजो दसणा। मां तुजो आसरीवाद देणा होर तेरे ले एक बड़ा समाज बनाणा। मां तेरा नांऊँ बौह्त बढ़ाणा। जो तुजो आसरीवाद दे तेस जो मां आसरीवाद देणा, होर जो तुजो स्राप दे तेस जो मां स्राप देणा। तेरी वजहा ले संसारा रे सारे कुला जो आसरीवाद मिलणा।"

इधी कठे अब्रामे परमेसरा री गल मन्नी। से आपणे सारे सेउआदार होर आपणी सारी जायदाद होर आपणी लाड़ी साऊगी लई किन्हें, कनान देसा जो चली गया जो परमेसरे तेस जो दस्या था।

जेबे अब्राम कनान देस पूजेया ता परमेसरे तेस किन्हें बोल्या, "आपणे चहुँ पासे देख। मां तुजो ये सारा देस देणा होर तेरे बंस हमेसा रे कठे एता पर हक रखणा।" तेबे अब्राम तेस देसा मन्झ बसी गया।

मलिकिसिदक नांऊँआं रा एक आदमी था जो महान परमेसरा रा याजक था। एक ध्याड़े अब्राम युद्ध करणे ले बाद आया करहा था ता से होर अब्राम आपु मन्झ मिले। मलिकिसिदके अब्रामा जो आसरीवाद दितेया होर बोल्या "महान परमेसर जो स्वर्ग होर धरती रा माल्क आ से तुजो आसरीवाद दे।" फेरी अब्रामे युद्धा मन्झ जितिरी सभ चीजा रा दसुआं हिस्सा मलिकिसिदका जो दितेया।

बौह्त साल गुजरी गए, पर हल्ली भी अब्राम होर सारा रे कोई म्हठा नी था। परमेसरे अब्रामा किन्हें गल किती होर द्बारा वादा कितेया कि तेसरा एक म्हठा जमणा होर जिहां सर्गा मन्झ अब्रामे युद्धा ऐ तिहां ईं तेसरे बौह्त सारी पीढ़िया हूंणीं। अब्रामे परमेसरा रे वादे पर विस्वास कितेया। परमेसरे एलान कितेया कि अब्राम एक धर्मी म्हाणुँ था क्यूंकि तिने परमेसरा रे वादे पर विस्वास कितेया था

तेबे परमेसरे अब्रामा किन्हें एक वाचा बान्ही। आमतौरा पर, एक वाचा दो गुटा रे बीचा मन्झ एक दूजे रे कठे काम करणे रा एक समझौता हूंहाँ। परमेसरे अब्रामा किन्हें से वादा तेबे कितेया था जेबे अब्राम सया करहा था, पर से तेबे भी परमेसरा जो सुणी सक्हा था। परमेसरे बोल्या, "मां तेरे सरीरा ले जम्मिरा एक म्हठा तुजो देणा। हांऊँ तेरे बंसा रे लोका जो ये कनान देस देहां।" पर ऐबे भी अब्रामा रा कोई म्हठा नी था।