36. रूपान्तरण

एक ध्याड़े, यीसू आपणे तीन चेले, पतरस, याकूब, होर यूहन्ने जो आपणे साऊगी लई गया। (ये यूहन्ना नांऊँआं रा चेला सेई म्हाणुँ नी आ जिने यीसू जो बप्तिस्मा दितेया था।) स्यों प्रार्थना करणे रे कठे एक ऊचे पहाड़ा पर गए।

जेबे यीसू प्रार्थना करेया करहा था ता तेसरा चेहरा सूरजा साहीं चमकदार हुई गया। धरती पर कोई भी इतने चीटे कपड़े नी करी सक्दा जितने चीटे तेसरे कपड़े प्रयासे साहीं चीटे हुई गए।

तेबे मूसा होर एलिय्याह नबी प्रकट हुए। ये आदमी एस्सा धरती पर एस टैमा ले कई सौ साल पैहले रैह्या करहा ऐ थे। तिन्हें यीसू किन्हें तेसरी मौता रे बारे मन्झ गल्ला कीती, क्यूंकि से जल्दी ई यरूस्लेम सैहरा मन्झ मरणे वाला था।

जेबे मूसा होर एलिय्याह यीसू किन्हें गल्ला करेया करहा ऐ थे तेबे पतरसे यीसू किन्हें बोल्या, "आस्सा रे कठे एथी हूंणां खरा आ। आस्सा तीन मंडप बनाणे, एक तेरे कठे, एक मूसा रे कठे, होर एक एलिय्याह रे कठे।" पर पतरस नी जाणदा था कि से क्या बोल्या करहा।

जेबे पतरस गल्ला करेया करहा था, ता एक चमकदार बादल हेठ आई किन्हें तिन्हा पर छाई गया। फेरी तिन्हें बादला मंझा ले एक अवाज आऊन्दी सुणी। तिने बोल्या, "ये मेरा म्हठा आ जेस किन्हें हांऊँ प्यार करहा। हांऊँ तेस किन्हें खुस आ। तेसरी सुणा।" स्यों तीनों चेले डरी गए होर जमीना पर लेटी गए।

तेबे यीसूए स्यों छुहे होर बोल्या, "डरा मत। उठा।" जेबे तिन्हें चहुँ पासे देख्या, ता तेथी सिर्फ यीसू था।

यीसू होर स्यों तीनों चेले तेस पहाड़ा ले वाप्स हेठ उतरेया करहा ऐ थे। तेबे यीसूए तिन्हा किन्हें बोल्या, "ऐबे जो एथी हुएआ तेता री गल्ला देख्या केसी किन्हें दसदे। मां जल्दी ई मरी जाणा होर दबारा जिऊन्दे हुई जाणा। तेता ले बाद, तुस्से लोका जो ये दसी सक्हा ऐ।"