37. यीसू लाजरा जो मुर्देया मंझा ले जिऊन्दा करहा

लाज़र नांऊँआं रा एक म्हाणुँ था। तेसरी दो बैहणिया थी जिन्हारे नांऊँ मरियम होर मार्था थे। स्यों सभ यीसू रे पक्के दोस्त थे। एक ध्याड़े, केसीए यीसू जो दस्या कि लाज़र बौह्त बीमार आ। जेबे यीसूए ये सुणेया ता तिन्हें बोल्या, "ये ब्मारी लाजरा रे मरणे साऊगी नी मुकणी। एता रे बजाए, एस्सा ब्मारिया लोक परमेसरा री इज्जत करणे रे कठे प्रेरित करणे।"

यीसू आपणे दोस्ता किन्हें प्यार करहा था, पर जेथी जे से था तेथी तिन्हें दो ध्याड़े तक इंतजार कीतेया। तिन्हा दो ध्याड़े ले बाद, तिन्हें आपणे चेले किन्हें बोल्या, "आऊआ, यहूदिया जिल्ले जो वाप्स चल्हा ऐ।" चेले जवाब दितेया, "पर हे गुरु, ऐबे कुछ ई टैम पैहले तेथी रे लोक तुस्सा जो मारणा चाहें थे!" यीसूए बोल्या, "आस्सा रा दोस्त लाज़र सया करहा, होर मां से जगाणा।"

यीसू रे चेले जवाब दितेया, "हे प्रभु, अगर लाज़र सया करहा, ता तेस ठीक हुई जाणा।" तेबे यीसूए तिन्हा किन्हें साफ बोली दितेया, "कि लाज़र मरी गईरा। हांऊँ खुस आ कि हांऊँ तेथी नी था, ताकि तुस्से मेरे पर विस्वास करी सको।"

जेबे यीसू लाजरा रे गाऊं पूजे ता लाजरा जो मरीरे चार ध्याड़े हुई चुकिरे थे। मार्था यीसू किन्हें मिलणे रे कठे बाहर आई होर बोल्या, "हे प्रभु, अगर तू एथी हुंदा ता मेरा भाई नी मरदा। पर हांऊँ विस्वास करहा ई कि जो कुछ भी तू परमेसरा ले माँगे तेस तुस्सा जो देणा।"

यीसूए जवाब दितेया, "पुनरुत्थान होर जिन्दगी हांऊँ आ। जो कोई मेरे पर विस्वास करहा अगर से मरी भी जाए तेबे भी तेस जीणा। जो कोई मेरे पर विस्वास करहा तेस कधी नी मरणा। क्या तू एस गल्ला पर विस्वास करहा ई?" मार्थे जवाब दितेया, "हे प्रभु, हांऊँ विस्वास करहा ई कि तू परमेसरा रा म्हठा मसीह आ।"

तेबे मरियम आई। तेस्से यीसू रे पैरा पर पई किन्हें बोल्या, "हे प्रभु, अगर तुस्से एथी हुंदे ता मेरा भाई नी मरदा।" यीसूए तेस्सा ले पूछेया, "तुस्से लाजर केथी रखिरा?" तिन्हें तेस जो दस्या, "कि से कबरा मन्झ आ। आऊआ होर देखी लऊआ।" तेबे यीसू रोंदा लग्या।

से कब्र एक गुफा थी जेसरे दरवाजे पर एक पात्थर लुढ़काई किन्हें रख्या गईरा था। जेबे यीसू कबरा पर पुजेया ता तिन्हें तिन्हा किन्हें बोल्या, "पात्थरा जो हटाई देआ।" पर मार्थे बोल्या, "तेस जो मरिरे चार ध्याड़े हुई चुकिरे। तेस मंझा ले ता बास आऊन्दी लगिरी हूंणीं।"

यीसूए जवाब दितेया, "क्या मैं तुस्सा किन्हें नी बोलिरा था कि अगर तुस्से मेरे पर विस्वास करघे ता तुस्सा परमेसरा री सामर्थ देखणी?" इधी कठे तिन्हें पात्थर टाही दितेया।

तेबे यीसूए ऊपर स्वर्ग वखा जो देखी किन्हें बोल्या, "हे बापू, मेरी अर्ज सुणी लैणे रे कठे हांऊँ तुस्सा रा धन्यवाद करहा। हांऊँ जाणहां कि तू हमेसा मेरी सुणहां, पर मैं एथी खड़ीरे इन्हा सभ लोका री मदद करणे रे कठे बोलिरा ताकि ये विस्वास करे कि तैं हांऊँ भेजिरा।" तेबे यीसूए अवाज लगाई, "हे लाज़र, बाहर निकली जा!"

इधी कठे लाज़र बाहर निकली आया! से ऐबे भी कफना रे कपड़े मन्झ ल्पेठिरा था। यीसूए तिन्हा किन्हें बोल्या, "एस कफना जो काढणे मन्झ तेसरी मदद करा होर तेस जो अजाद करा।" एस चमत्कारा री वजहा ले बौह्त सारे यहूदी लोके यीसू पर विस्वास कितेया।

पर यहूदी लोका रे धर्म गुरु यीसू किन्हें जहल्दे लगे, इधी कठे स्यों योजना बनाणे रे कठे सभ मिली किन्हें कठा हुए ताकि किहाँ यीसू होर लाजरा जो मारी सके।