38. यीसू पकड़वाया जाहाँ

हर साल, यहूदी लोक फसहा रा साजा मनाहें थे। ये साजा इधी कठे मनाया जाहाँ था कि कई हजार साल पैहले परमेसरे तिन्हारे स्याणे मिस्र देसा री गुलामी ले छुड़ाएथे। लगभग तीन साला ले बाद यीसूए खुल्ही किन्हें सभी रे साम्हणे प्रचार करणा होर उपदेस देणा सुर्हू कितेया। यीसूए आपणे चेलेया जो दस्या कि से तिन्हा साऊगी यरूस्लेम सैहरा मन्झ फसह रा साजा मनाणा चाहाँ, होर ये भी दस्या कि से तेथी मारी दितेया जाणा।

यीसू रे चेले मन्झ एक यहूदा नांऊँआं रा म्हाणुँ था। यहूदा प्रेरिता रे ढब्बेया री थैली सम्भालणे वाला म्हाणुँ था, पर हमेसा से तेस्सा थैली मंझा ले ढब्बे काढी लैहां था। यीसू होर चेले रे यरूस्लेम सैहरा मन्झ पूजणे ले बाद यहूदा यहूदी धर्मा रे गुरुआ वाले गया। तिने ढब्बे रे बदले मन्झ यीसू जो तिन्हारे हाथ पकड़वाणे री गल किती। से जाणहां था कि यहूदी अगुवे नी मन्नदे कि यीसू ई मसीह था। से जाणहां था कि स्यों तेस जो मारी देणा चाहें थे।

महायाजका रे बोलणे पर यहूदी अगुवे यीसू जो तिन्हारे हाथा मन्झ पकड़वाणे रे कठे यहूदा जो तीह चाँदी रे सिक्के दिते। ये ठीक तिहां ईं हुएआ जिहां कि नबिए बोलिरा था। यहूदा मन्नी गया होर ढब्बे लई किन्हें चली गया। से यीसू जो गिरफ्तार करणे मन्झ तिन्हारी मदद करणे रे कठे केसी मौके रा इंतजार करेया करहा था।

यरूस्लेमा मन्झ, यीसूए आपणे चेले साऊगी फसहा रा साजा मनाया। फसहा रे खाणे रे बीच, यीसूए रोटी लई किन्हें तोड़ी। तिने बोल्या, "एता जो लऊआ होर खाऊआ। ये मेरा सरीर आ जो हांऊँ तुस्सा रे कठे देहां। एता जो मेरी यादा मन्झ करेया।" एस तरीके ले, यीसूए बोल्या कि तेस तिन्हारे कठे मरी जाणा, यानि तिन्हारे कठे तेस आपणा सरीर बलि चढ़ाई देणा।

फेरी यीसूए एक दाखरसा रा प्याला लया होर बोल्या, "एता जो पी लेऊआ। ये नौंईं वाचा रा मेरा खून आ जो कि मां दलणा ताकि परमेसर तुस्सा रे पापा माफ करे। हर बार एता जो पींदे टैम मेरी यादा मन्झ एह्ड़ा करेया जो हांऊँ ऐबे करेया करहा।"

तेबे यीसूए आपणे चेले किन्हें बोल्या, "तुस्सा मंझा ले एक आदमिया हांऊँ पकड़वाणा।" चेले हैरान हुई गए, होर पूछदे लगे कि केस एह्ड़ा काम करणा। यीसूए बोल्या, "मेरा पकड़वाणे वाला म्हाणुँ से आ जेस जो मैं ये रोटी रा ग्राह देणा।" तेबे तिने से रोटी यहूदा जो दीती।

तेस्सा रोटी जो लेणे ले बाद, यहूदा मन्झ सैतान समाई गया। यहूदा निकली किन्हें यीसू जो गिरफ्तार करवाणे रे कठे यहूदी धर्म गुरुआ री मदद करणे रे कठे चली गया। ये रातका टैम था।

खाणा खाणे ले बाद, यीसू होर तेसरे चेले जैतून पहाड़ा जो चली गए। यीसूए बोल्या, "तुस्से सभिया आज राती हांऊँ छाडी देणा। ये लिखीरा, 'मां पुहाल मारणा होर सारी भेडा ओरे परे बिखरी जाणा।'"

पतरसे जवाब दितेया, "भले ई बाकी सभ तुस्सा जो छाडी दे, पर मां तुस्से नी छाडणे!" तेबे यीसूए पतरसा किन्हें बोल्या, "सैतान तुस्सा सभी जो लई लैणा चाहाँ, पर हे पतरस, मैं तेरे कठे प्रार्थना कितिरी ताकि तू विस्वासा ले भटकी नी जाए। फेरी भी, आज राती, कुक्कड़ा री बांग देणे ले पैहले तुध तीन बारी नाहं करणी कि तू मुंजो नी जाणदा।"

पतरसे तेबे यीसू किन्हें बोल्या, "चाहे हांऊँ मरी भी जाऊँ, मां कधी भी तुस्सा री नाहं नी करणी!" बाकी रे सभ चेले भी एह्ड़ा ई बोल्या।

तेबे यीसू आपणे चेले साऊगी गतसमनी नांऊँआं री जगहा पर गया। यीसूए आपणे चेले किन्हें प्रार्थना करणे रे कठे बोल्या ताकि सैतान तिन्हारी परखणी नी करे। तेबे यीसू आप्हुए प्रार्थना करणे रे कठे चली गया।

यीसूए तीन बारी प्रार्थना कीती, "हे मेरे बापू परमेसर, अगर हुई सके ता दया करी किन्हें ये दुःखा रा प्याला पीणे रे कठे मुंजो मत दे। पर अगर लोका रे पाप माफ किते जाणे रे कठे कोई होर पैंडा नी आ, ता तेरी ई इच्छा पूरी हुई जाए।" यीसू बौह्त परेसान था होर तेसरा पसीना खूना रे टेपे साहीं पया करहा था। तेस जो सामर्थ देणे रे कठे परमेसरे एक स्वर्गदूत भेज्या।

हर बार प्रार्थना ले बाद, यीसू आपणे चेले वाले वाप्स आया, पर स्यों सई गईरे थे। जेबे यीसू त्रीजी बारी वाप्स आया ता यीसूए बोल्या, "जागी जाऊआ! मेरा पकड़वाणे वाला एथी पूजी गईरा।"

यहूदी धर्मा रे गुरु, स्पाही, होर एक बडी भीड़ा साऊगी यहूदा तेथी आया। तिन्हें तलवारिया होर डंडे ल्यान्दिरे थे। यहूदे यीसू वाले आई किन्हें तेस किन्हें बोल्या, "हे गुरु जी, नमस्कार," होर तिने से गले लगाई किन्हें चूमी लया। तिने एह्ड़ा इधी कठे कितेया ताकि से यहूदी धर्मा रे गुरुआ जो दसी सके कि गिरफ्तार किते जाणे वाला म्हाणुँ कुणहां। तेबे यीसूए बोल्या, "हे यहूदा, क्या तू एक चुम्बन लई किन्हें मुंजो पकड़वाया करहा?"

जेबे स्यों स्पाही यीसू जो पकड़ेया करहा ऐ थे, ता पतरसे आपणी तलवार काढी, होर महायाजका रे एक सेऊआदारा रा कान काटी दितेया। यीसूए बोल्या, "तलवार दूर हटाई दे! हांऊँ आपणे बापू परमेसरा ले आपणा बचाव करणे रे कठे स्वर्गदूता री एक सेना रे कठे अर्ज करी सक्हा। पर मुंजो मेरे बापू री गल्ला मनणी जरूरी ई।" तेबे यीसूए तेस म्हाणुँ रा कान ठीक करी दितेया। तेबे सारे चेले भगी गए।