39. यीसू पर मुकद्दमा चल्हा

ऐबे ये आधी राती रा टैम था। स्यों स्पाही यीसू जो महायाजका रे घर लई आए, क्यूंकि से यीसू किन्हें सुआल करणा चाहाँ था। पतरस दूरा ले तिन्हारा पीछा करेया करहा था। जेबे स्पाही यीसू जो घरा मन्झ लई गए, ता पतरस आपु बाहर रुकी किन्हें आग तफ्दा लग्या।

घरा रे अंदर, यहूदी अगुवे यीसू पर मुकद्दमा चलाया। स्यों तेसरे बरख्लाफ झूठी गल्ला बोलणे रे कठे बौह्त सारे झूठे गुआह लई किन्हें आए। हलांकि, तिन्हारी गल्ला एक दूजे किन्हें मेल नी खांदी थी, इधी कठे यहूदी अगुवे ये साबित नी करी सके कि से केसी भी गल्ला रा दोसी था। यीसूए कुछ नी बोल्या।

आखरी मन्झ, महायाजके सीधे यीसू वखा जो देखी किन्हें बोल्या, "आस्सा जो दस कि क्या तू ई जिऊन्दे परमेसरा रा म्हठा मसीह आ?"

यीसूए बोल्या, "हांऊँ आं, होर तुस्सा हांऊँ परमेसरा साऊगी बैठिरा होर स्वर्गा ले आऊन्दा भी देखणा।" महायाजके आपणे कपड़े छेकी दिते क्यूंकि से यीसू री बोलिरी गल्ला पर बौह्त गुस्सा था। से दूजे धर्म गुरुआ पर चिल्लाया, "आस्सा जो ये दसणे रे कठे केसी होर गुआहा री जरूरत नी ई कि इने म्हाणुँऐं क्या कितेया! तुस्से आप्हुए तेस जो ये बोल्दे हुए सुणी लया कि से परमेसरा रा म्हठा आ। तेसरे बारे मन्झ तुस्सा रा क्या फैसला आ?"

सभ यहूदी अगुवे महायाजका जो जवाब दितेया, "से मरणे रे लायक आ!" तेबे तिन्हें यीसू री हाखिया पर पट्टी बान्ही दीती, तेस पर थूक्या, से मारेया, होर तेसरा मजाक डुआया।

होर, जेबे पतरस घरा रे बाहर इंतजार करेया करहा था। तेबे एक नकरयाणिए से देख्या। तेस्से तेस किन्हें बोल्या, "तू भी यीसू साऊगी था!" पतरसे नाहं करी दिती। बादा मन्झ, केसी दूजी नकरयाणिए येई गल बोली, होर पतरसे दबारा नाहं करी दिती। आखरी मन्झ, कुछ लोके बोल्या, "आस्से जाणहां ऐं कि तू यीसू साऊगी था क्यूंकि तुस्से दुहें गलीला ले ऐ।"

तेबे पतरसे बोल्या, "अगर हांऊँ एस म्हाणुँ जो जाणदा हुंदा ता परमेसर मुंजो स्राप दे!" एकदम ई पतरसा रे एस तरीके री कसम खाणे ले बाद, एक कुक्कड़े बांग दिती। यीसूए पीछे मुड़ी किन्हें पतरसा जो देख्या।

पतरस तेथी ले चली गया होर सिसकी-सिसकी किन्हें रोया। तेस ई टैम, यीसू जो पकड़वाणे वाले यहूदे देख्या कि यहूदी अगुवे यीसू जो मौता री सजा दिती। यहूदा बौह्त दुःखी हुई गया होर जाई किन्हें तिन्हें आत्महत्या करी दिती।

ऐबे तेस देसा रा राज्यपाल पिलातुस था। से रोमी सरकारा रे कठे काम करहा था। यहूदी अगुवे यीसू जो तेस वाले लई किन्हें आए। स्यों चाहें थे कि पिलातुस तेस जो मौता री सजा दे होर तेस जो मारी दे। तेबे पिलातुसे यीसू ले पूछेया, "क्या तू यहूदिया रा राजा आ?"

यीसूए जवाब दितेया, "तैं सच ई बोल्या। पर मेरा राज्य एथी धरती रा नी आ। अगर हुंदा ता मेरे दास मेरे कठे युद्ध करदे। हांऊँ धरती पर परमेसरा रे बारे मन्झ सच दसणे रे कठे आईरा। हर एक आदमी जो सच्चाई किन्हें प्यार करहा से मेरी सुणहां।" पिलातुसे बोल्या, "ता सच क्या आ?"

यीसू साऊगी गल्ला करणे ले बाद, पिलातुसे बाहर भीड़ा वाले जाई किन्हें बोल्या, "हांऊँ एह्ड़ी कोई वजहा नी देख्दा कि ये म्हाणुँ मौता री सजा रे लायक हो।" पर यहूदी अगुवे होर भीड़ा रे लोके चिल्लाई किन्हें बोल्या, "तेस जो क्रूसा पर चढ़ाई देआ!" पिलातुसे जवाब दितेया, "से कुछ भी गलत करणे रा अपराधी नी आ।" पर स्यों होर भी ऊची अवाजा मन्झ चिल्लान्दे लगे। तेबे पिलातुसे त्रीजी बारी बोल्या, "कि से अपराधी नी आ!"

पिलातुस डरी गया कि तेस्सा भीड़ा रे लोका दंगा सुर्हू कर देणा, इधी कठे से आपणे स्पाहिया रे ज्रीए यीसू जो क्रूसा पर चढ़ाणे रे कठे मन्नी गया। रोमी स्पाहिए यीसू जो कोड़े लगाए, होर तेस जो राजे साहीं कपड़े पनह्याये, होर तेसरे मूंडा पर कान्डेया रा बणिरा ताज रख्या। तेबे स्यों ये बोली किन्हें तेसरा मजाक डुआन्दे लगे, "देखा, यहूदिया रा राजा!"