40. यीसू जो क्रूसा पर चढ़ाया जाहाँ

यीसू रा मजाक करणे ले बाद, स्पाही तेस जो क्रूसा पर चढ़ाणे रे कठे लई गए। तिन्हें से क्रूस तेसले ई चकाया जेस पर से मरणे वाला था।

स्यों स्पाही यीसू जो तेस जगहा पर लई किन्हें आए जेस जो "खोपड़ी" बोल्हा ऐ होर तेसरे हाथा होर पैरा पर कीला ठोकी दिती होर क्रूसा पर लटकाई दिता। पर यीसूए बोल्या, "हे बापू, इन्हा जो माफ कर, क्यूंकि ये नी जाणदे कि ये क्या करेया करहा ऐ।" तिन्हें एक फटा भी तेसरे मूंडा ऊपर टांगी दितेया। तेस पर लिखिरा था, "यहूदिया रा राजा।" पिलातुसे तिन्हा किन्हें येई लिखणे रे कठे बोल्या था।

तेबे स्पाहिए यीसू रे कपड़ेया रे कठे चिट्ठिया पाई। जेबे तिन्हें एह्ड़ा कितेया ता तिन्हें से भविस्यवाणी पूरी किती जो बोल्हा ई थी, "तिन्हें मेरे कपड़े आपु मन्झ बांडी लये, होर मेरे कपड़ेया रे कठे चिट्ठिया पाई।"

तेथी तेस जगहा पर दो डाकू भी थे, जिन्हा जो स्पाहिए तेस ई टैम क्रूसा पर चढ़ाईरा था। तिन्हें स्यों यीसू रे ओरेले होर परली वखो क्रुसा पर चढ़ाईरे थे। तिन्हा मंझा ले एक डाकूए यीसू रा मजाक डुआया, पर दूजे बोल्या, "क्या तू नी डरदा कि परमेसरा तुजो सजा देणी? आस्से बौह्त सारे बुरे काम करणे रे अपराधी ऐ, पर ये म्हाणुँ ता बेकसूर आ।" फेरी तिन्हें यीसू किन्हें बोल्या, "जेबे तू आपणे राज्या मन्झ आए ता दया करी किन्हें मुंजो याद रख्या।" यीसूए जवाब दितेया, "तुध आज ई मेरे साऊगी स्वर्ग लोका मन्झ हूंणां।"

यहूदी अगुवे होर भीड़ा रे दूजे लोके यीसू रा मजाक डुआया। तिन्हें तेस किन्हें बोल्या, "अगर तू परमेसरा रा म्हठा आ, ता क्रूसा ले हेठ उतरी जा होर आपु जो बचाई ले! तेबे आस्सा तेरे पर विस्वास करणा।"

तेबे तेस पुरे देसा रा सर्ग पूरी तरह ले काला हुई गया, से भर दपैहरा रा टैम था। ये भर दपैहरा रा टैम न्याहरे किन्हें काला हुई गया होर तीन घंटे तक एह्ड़ा ई रैह्या।

तेबे यीसूए पुकारी किन्हें बोल्या, "पूरा हुएआ! हे बापू, हांऊँ आपणी आत्मा तेरे हाथा मन्झ देई देहां।" तेबे तिन्हें आपणा मूंड झुकाई दितेया होर आपणे प्राण छाडी दिते। जेबे से मरेया ता एक भूकम्प आया। से बड़ा पर्दा जो परमेसरा री मौजूदगी ले लोका जो लग करहा था से ऊपरा ले हेठा तक फटी किन्हें दो हिस्से हुई गया।

आपणी मौता रे ज्रीए, यीसूए लोका रे कठे परमेसरा वाले आऊणे रा पैंडा खोल्ही दितेया। जेबे यीसू री देखरेख करणे वाले एक स्पाहिए जो कुछ हुएआ था ये सभ कुछ देख्या ता तिन्हें बोल्या, "जरुर, ये म्हाणुँ ता बेकसूर था। ये परमेसरा रा म्हठा आ।"

तेबे यूसुफ होर नीकुदेमुस नांऊँआं रे दो यहूदी अगुवे आए। स्यों विस्वास करहा ऐ थे कि यीसू ई मसीह था। तिन्हें पिलातुसा ले यीसू रा सरीर मांगेया। तिन्हें तेसरा सरीर कपड़े मन्झ लपेटया। तेबे स्यों तेस जो एक एह्ड़ी कबरा मन्झ लई गए जो चट्टान काटी किन्हें बणाई गईरी थी होर तिन्हें से तेता अंदर रखी दितेया। तेबे तिन्हें तेस्सा कबरा रा दुराजा बंद करणे रे कठे एक बडा पात्थर लुढ़काई किन्हें लगाई दितेया।