41. परमेसर यीसू जो मरणे ले बाद जिऊन्दा करहा

जेबे स्पाही यीसू जो क्रूसा पर चढ़ाई बैठे, यहूदी अगुवे पिलातुसा किन्हें बोल्या, "तिने झूठे, यीसूए बोल्या था कि तेस मरणे रे तरीजे ध्याड़े ले बाद दबारा जिऊन्दे हुई जाणा। केसी जो एस्सा कबरा री देखरेख जरुर करणी पऊणी ताकि तेसरे चेले तेसरा सरीर चुराई नी सके। अगर स्यों एह्ड़ा करघे ता तिन्हा बोलणा कि से मरी किन्हें दबारा जिऊन्दा हुई गईरा।"

पिलातुसे बोल्या, "कुछ स्पाही लई जाऊआ, होर जिहां तुस्से करी सको तिहां कब्रा री देखरेख करा।" इधी कठे तिन्हें तेस्सा कब्रा पर लाईरे पात्थरा पर एक मोहर लगाई दीती। तिन्हें पक्का इंतजाम करी किन्हें तेथी स्पाही भी बैठाई दिते ताकि कोई भी तेसरा सरीर चुराई नी सके।

यीसू रे मरणे ले बादा रा ध्याड़ा अरामा रा ध्याड़ा था। कोई भी अरामा रे ध्याड़े काम नी करी सक्दा था, इधी कठे यीसू रा कोई भी दोस्त कब्रा पर नी आया था। पर अरामा रे ध्याड़े ले बाद, भ्यागा तड़के ही, कुछ ज्नानिया यीसू री कब्रा पर जाणे रे कठे त्यार हुई। स्यों तेसरे सरीरा पर होर भी खूसबुदार मसाले लगाणा चाहीं थी।

तिन्हा ज्नानिया ले पूजणे ले पैहले, कब्रा पर एक बड़ा हिलण हुएआ। स्वर्गा ले एक स्वर्गदूते आई किन्हें से पात्थर लुढ़काई दितेया जो कब्रा रा दुराजा बंद करणे रे कठे लगाईरा था होर से तेस पात्थरा पर बैठी गया। ये स्वर्गदूत प्रयासे साहीं चमक्या करहा था। कब्रा पर जो स्पाही थे तिन्हें से देख्या। स्यों इतना डरी गए थे कि स्यों मुर्देया साहीं जमीना पर पई गए।

जेबे स्यों ज्नानिया कब्रा पर पूजी ता तिने स्वर्गदूते तिन्हा किन्हें बोल्या, "मत डरा। यीसू एथी नी आ। से मरणे ले बाद जिऊन्दा हुई गईरा, जिहां कि तिने बोलिरा था कि तेस जिऊन्दे हुई जाणा! कब्रा मन्झ तोपा होर देखा।" तिन्हें ज्नानिए कब्रा रे अंदर होर जेथी यीसू रा सरीर रखिरा था तेथी छानबीण किती होर देख्या कि तेसरा सरीर तेथी नी था!

तेबे तिने स्वर्गदूते तिन्हा ज्नानिया किन्हें बोल्या, "जाई किन्हें तेसरे चेले जो दसा, 'कि यीसू मरणे ले बाद जिऊन्दा हुई गईरा होर तेस तुस्सा ले पैहले गलील जिले जो चली जाणा।'"

स्यों ज्नानिया हैरान हुई होर बौह्त खुस हुई। स्यों चेलेया जो ये खरी खबर सूनाणे रे कठे दौड़ी।

जेबे स्यों ज्नानिया चेलेया जो ये खरी खबर दसणे रे कठे आपणे पैंडे पर जाया करहा ई थी, ता यीसू तिन्हा पर प्रकट हुएआ। स्यों तेसरे पैरा पर पई गई। तेबे यीसूए बोल्या, "मत डरा। जाई किन्हें मेरे चेलेया जो गलील जिल्ले मञ्झ जाणे जो बोला। मां तिन्हा जो तेथी मिलणा।"