42. यीसू स्वर्गा जो वाप्स जाहाँ

जेस ध्याड़े परमेसरे यीसू मरणे ले बाद जिऊन्दा कितेया था, तेसरे दो चेले नेडे रे गाऊँआं मन्झ जाया करहा ऐ थे। चलदे-चलदे स्यों यीसू साऊगी जो हुएआ था। तेसरे बारे मन्झ गल्ला करेया करहा ऐ थे, तिन्हा जो आस थी कि से मसीह था, पर तेबे भी से मारी दितेया गया था। ऐबे स्यों ज्नानिया बोल्हा ई कि से दबारा जिऊन्दा हुई गईरा। स्यों नी जाणदे थे कि केस गल्ला पर विस्वास करे।

यीसूए तिन्हा वाले आई किन्हें तिन्हा साऊगी चलना सुर्हू कितेया, पर स्यों तेस जो पछ्याणी नी सके। तिन्हें पूछेया कि स्यों केस बारे मन्झ गल्ला करेया करहा ऐ थे। तिन्हें तेस जो पिछले ध्याड़े यीसू साऊगी हुई सारी घटना के बारे मन्झ दस्या। तिन्हें सोच्या कि स्यों केसी परदेसी किन्हें गल्ला करेया करहा ऐ थे जो नी जाणदा था कि यरूस्लेम सैहरा मन्झ क्या हुएआ था।

तेबे यीसूए तिन्हा जो समझाया कि परमेसरा रा वचन मसीह रे बारे मन्झ क्या बोल्हा। बौह्त पैहले, नबिए बोल्या था कि बुरे लोका मसीह दुःखी करणा होर मारी देणा। पर नबिए ये भी बोल्या था कि तेस तरीजे ध्याड़े ले बाद द्बारा जिऊन्दे हुई जाणा।

जेबे स्यों तेस नगरा मन्झ पूजे जेथी स्यों दो आदमी रुकणा चाहें थे, तेबे तक लगभग सांझ हुई गईरी थी। तिन्हें यीसू जो तिन्हा साऊगी रुकणे रे कठे सादेया, इधी कठे से तिन्हा साऊगी एक घरा मन्झ गया। आपणे सान्झ्का खाणा खाणे रे कठे स्यों बैठी गए। यीसूए एक रोटी लई किन्हें तेता रे कठे परमेसरा रा धन्यवाद दितेया, होर फेरी से रोटी तोड़ी। अचानक, तिन्हें जाणी लया कि से यीसू था। पर तेस ई टैम, से तिन्हारे साम्हणे ले गायब हुई गया।

तिन्हें दो म्हाणुँऐं एक दूजे किन्हें बोल्या, "से यीसू था! इधी कठे जेबे तिन्हें आस्सा जो परमेसरा रा वचन समझाया था ता आस्से बौह्त खुस थे!" एकदम ही, स्यों निकली किन्हें वाप्स यरूस्लेम सैहरा जो गए। जेबे स्यों पूजे ता तिन्हें चेले दस्या, "यीसू जिऊन्दा आ! आस्से से देख्या!"

जेबे चेले गल्ला करेया करहा ऐ थे, यीसू अचानक तेस कमरे मन्झ तिन्हारे बीचा मन्झ प्रकट हुएआ। तिन्हें बोल्या, "तुस्सा जो सांति मिले!" चेले सोच्या कि से कोई भूत था, पर यीसूए बोल्या, "तुस्से कि डरहा ऐ? तुस्से ये कि नी सोच्दे कि ये सच्हे हांऊँ, यीसू आ? मेरे हाथ होर पैर देखा। भूता वाले एह्ड़ा सरीर नी हुंदा जिहां मेरे वाले आ।" ये दसणे रे कठे कि से कोई भूत नी था, तिन्हें खाणे रे कठे कुछ मांगेया। तिन्हें तेस जो मच्छी रा एक टुकड़ा दितेया, होर तिन्हें से खाई लया।

यीसूए बोल्या, "मेरे बारे मन्झ परमेसरा रा वचन जो कुछ भी बोल्हा से जरुर पूरा हूंणां। मैं तुस्सा जो दसी दितिरा था कि एह्ड़ा हूंणां जरूरी आ।"तेबे यीसूए तिन्हा जो परमेसरा रा वचन ठीक ढंगा किन्हें समझाया। तिन्हें बोल्या, "बौह्त पैहले नबिए लिख्या था कि मेरे, मसीहा जो दुःख चकणा पऊणां, मरणा पऊणां होर फेरी मरणे ले तरीजे ध्याड़े बाद जिऊन्दे हुई जाणा।"

तिन्हें नबिए ये भी लिख्या था कि मेरे चेलेया परमेसरा रे वचना रा एलान करणा। तिन्हा हर एकी जो पस्चाताप करणे रे कठे दसणा। अगर स्यों एह्ड़ा करघे ता परमेसरा तिन्हारे पाप माफ करणे। मेरे चेलेया एस खबरा रा प्रचार यरूस्लेम सैहरा ले सुर्हू करणा। तेबे तिन्हा सभ जगहा सभ जातिया मन्झ जाणा। तुस्से लोक मेरी बोलिरी हर एकी गल्ला होर कितिरे कामा रे गुआह ऐ, होर मेरे साऊगी हुईरी सभी गल्ला रे भी गुआह ऐ।

अगले चाल्ई ध्याड़े रे बीच, यीसू आपणे चेलेया पर कई बार प्रकट हुएआ। एक बार ता से एक ई टैमा पर 500 ले ज्यादा लोका पर प्रकट हुएआ! तिन्हें आपणे चेलेया पर कई तरीके किन्हें साबित कितेया कि से जिऊन्दा था, होर तिन्हें तिन्हा जो परमेसरा रे राज्या रे बारे मन्झ उपदेस दितेया।

यीसूए आपणे चेले किन्हें बोल्या, "परमेसरे मुंजो स्वर्ग होर धरती रे हर एक आदमी पर राज करणे रा हक दितिरा। इधी कठे ऐबे हांऊँ तुस्सा किन्हें बोल्हा: जाई किन्हें सभ जातिया रे लोका जो चेला बणाऊआ। एह्ड़ा करणे रे कठे, तुस्से तिन्हा जो बापू परमेसर, म्हठा परमेसर, होर पवित्र आत्मा परमेसरा रे नांऊँआं ले बप्तिस्मा देआ। जो कुछ भी मैं तुस्सा जो हुक्मा दितिरा स्यों सभ गल्ला तुस्से तिन्हा जो मन्नणा सिखाऊआ। याद रखा, मां हमेसा तुस्सा साऊगी रैहणा।"

यीसू रे मरी किन्हें जिऊन्दे हूंणे रे चाल्ई ध्याड़े ले बाद, तिन्हें आपणे चेले किन्हें बोल्या, "जेबे तक कि मेरा बापू परमेसर तुस्सा जो सामर्थ नी दे तेबे तक यरूस्लेम सैहरा मन्झ रुकिरे रैह्या। तेस तुस्सा पर पवित्र आत्मा भेजणे रे ज्रीए एह्ड़ा करणा।" तेबे यीसू स्वर्गा मन्झ चली गया, होर एक बादले से तिन्हारी नजरा ले ल्कोई लितेया। स्वर्गा मन्झ यीसू सभ चीजा पर राज करणे वाले परमेसरा री सिधी वखा जो बैठी गया।