43. कलीसियारी सुरुआत

यीसू रे स्वर्ग वाप्स जाणे ले बाद, चेले यरूस्लेम सैहरा मन्झ ई रुकिरे रहे जेह्ड़ा यीसूए तिन्हा जो करणे रा हुक्म दितिरा था। तेथी रे विस्वासी लोक लगातार प्रार्थना करणे रे कठे, कठे हुंदे रैह्याँ ऐं थे।

हर साल, फसहा रे साजे रे 50 ध्याड़े ले बाद, यहूदी लोक पैन्तिकोस्त नांऊँआं रा एक खास ध्याड़ा साजे रे रूपा मन्झ मनाहें थे। पैन्तिकोस्ता रा टैम से टैम था जेबे यहूदी लोक कणका री फसल कटाई रा जसन मनाहें थे। सारे संसारा ले यहूदी लोक पैन्तिकोस्ता रा ध्याड़ा कठे हुई किन्हें मनाणे रे कठे यरूस्लेम सैहरा मन्झ आईरे थे। एस साल, पैन्तिकोस्त मनाणे रा टैम यीसू रे स्वर्गा जो चले जाणे रे लगभग एक हफ्ते ले बाद आया था।

जेस टैम सारे विस्वासी लोक कठे हुईरे थे, ता जेस घरा मन्झ स्यों थे अचानक से घर तेज हाऊआ साहीं अवाजा किन्हें भर्ही गया। तेबे आगा री चन्गारिया साहीं सूझणे वाला कुछ सभ विस्वासिया रे मूंडा ऊपर प्रकट हुएआ। स्यों सभ पवित्र आत्मा किन्हें भर्ही गए होर तिन्हें दूजी भासा मन्झ परमेसरा री बड़ाई कीती। ये स्यों भासा थी जिन्हा जो बोलणे रे कठे पवित्र आत्मे स्यों लायक बणाए थे।

जेबे यरूस्लेमा मन्झ रैहणे वाले लोके से हाल्ला सुणेया, ता स्यों भीड़ा रे रूपा मन्झ ये देखणे रे कठे, कट्ठे हुए कि क्या हुएया करहा। तिन्हें विस्वासिया जो परमेसरा रे ज्रीए किते गईरे बडे-बडे कामा रा एलान करदे सुणेया। स्यों हैरान थे क्यूंकि स्यों तिन्हा कामा जो आपणी ई भासा मन्झ सुणेया करहा ऐ थे।

इन्हा मंझा ले कुछ लोके बोल्या कि स्यों चेले नसे मन्झ ऐ। पर पतरस खड़ा हुएआ होर तिन्हा किन्हें बोल्या, "मेरी गल्ला सुणा! ये लोक नसे मन्झ नी ऐ! एता रे बजाए, जो तुस्से देख्हा ऐ से सेई आ जो योएल नबिए हूंणें रे कठे बोल्या था: परमेसरे बोल्या, 'आखरी ध्याड़े मन्झ, मां आपणा आत्मा दलणा।'"

हे इस्राएली लोको, यीसू एक एह्ड़ा म्हाणुँ था जिने ये दसणे रे कठे कि से कुणहां ये बौह्त सारे नौखे काम किते थे। तिने परमेसरा रे सक्ति ले बौह्त सारे नौखे काम किते। तुस्से ये जाणहां ऐं, क्यूंकि तुस्से ये काम देखे। पर तुस्से से क्रूसा पर चढ़ाई दितेया!

यीसू मरी गया पर परमेसरे से मरणे ले बाद जिऊन्दा करी दितेया। युहन्ने ये गल पूरी करी दिती जो एक नबिए लिखिरी थी: 'तुध आपणा पवित्र आदमी कब्रा मन्झ सड़ने नी देणा।' आस्से गुआह ऐ कि परमेसरे यीसू दबारा जिऊन्दा करी दितेया।

परमेसर बापुए ऐबे यीसू जो आपणी सिधि वखा जो बैठाई किन्हें तेस जो इज्जत दिती। होर यीसूए आपणे वादे रे मुताबक आस्सा रे कठे पवित्र आत्मा भेजी। पवित्र आत्मा ई ये सारे काम हूंणें देया करहा जो तुस्से देख्या होर सुणेया करहा ऐ।

तुस्से से म्हाणुँ, यीसू क्रूसा पर चढ़ाई दितेया। पर पक्का जाणी लऊआ कि परमेसरे यीसू जो सभ चीजा पर प्रभु होर मसीह बणाईरा!

पतरसा री गल्ला सुणने वाले लोक अंदरा तक हिली गए थे। इधी कठे तिन्हें पतरस होर चेलेया ले पूछेया, "हे भाइयो, आस्सा जो क्या करणा चहिए?"

पतरसे तिन्हा जो जवाब दितेया, "तुस्सा मंझा ले हर एक आपणे पापा रे कठे पस्चाताप करा ताकि परमेसर तुस्सा रे पाप माफ करे, होर यीसू मसीह रे नांऊँआं ले बप्तिस्मा लेया। तेबे तेस तुस्सा जो पवित्र आत्मा रा वरदान भी देणा।"

पतरसा री बोलिरी गल्ला पर लगभग 3,000 लोके विस्वास कितेया होर यीसू रे चेले बणी गए। तिन्हें बप्तिस्मा लया होर यरूस्लेम सैहरा री कलीसिया रे भागीदार बणी गए।

जेबे प्रेरिते तिन्हा जो उपदेस दितेया ता विस्वासिए लगातार सुणेया। स्यों हमेसा मिल्दे रैह्याँ ऐं थे होर कठे हुई किन्हें खाणा खाहें थे, होर तिन्हें हमेसा एक दूजे रे कठे प्रार्थना कीती। तिन्हें मिली जुली किन्हें परमेसरा री बड़ाई कीती होर जो कुछ भी तिन्हा वाले था तिन्हें एक दूजे साऊगी बांडेया। नगरा रा हर एक म्हाणुँ तिन्हारे कठे खरी सोच रख्हा ऐ थे। हर ध्याड़े, ज्यादा ले ज्यादा लोक विस्वासी बणदे गए।