50. यीसू वाप्स आहूँआं

लगभग 2,000 साला ले, संसारा मन्झ सभ जगहा पर ज्यादा ले ज्यादा लोक मसीह यीसू रे बारे मन्झ खरी खबर सुणेया करहा ऐ। कलीसिया बढ़ौतरी करेया करहा ई। यीसूए वायदा कितेया कि तेस संसारा रे आखरी मन्झ वाप्स आऊणा। हलांकि से ऐबे तक वाप्स नी आईरा, तेबे भी तेस आपणा वायदा जरुर पूरा करणा।

जेब्की आस्से यीसू रे वाप्स आऊणे रा इंतजार करेया करहा ऐ, परमेसर आस्सा ले एह्ड़ी तरीके री जिन्दगी जीणे री इच्छा करहा जो पवित्र ई होर जो तेसरी इज्जत करहा ई। जेबे यीसू धरती पर रैह्याँ था तेबे तिन्हें बोल्या, "मेरे चेले संसारा भरा मन्झ सभ जगहा रे लोका जो परमेसरा रे राज्य रे बारे मन्झ खरी खबरा रा प्रचार करणा, होर तेबे आखरी टैम आई जाणा।"

बौह्त सारी जातिया रे लोके ऐबे तक यीसू रे बारे मन्झ नी सुणेया। स्वर्गा जो वाप्स जाणे ले पैहले, यीसूए मसीही लोका किन्हें बोल्या कि जिन्हें कधी भी खुसी री खबर नी सुणी तिन्हा जो तुस्से खरी खबर सुणाया। तिन्हें बोल्या, "जाऊआ होर सभ जातिया रे लोका जो चेला बणाऊआ!" होर "कटाई करणे रे कठे डोर्हिया पक्की चुकिरी!"

यीसूए ये भी बोल्या, "कि कोई म्हाणुँ रा सेऊआदार आपणे माल्का ले बडा नी हुंदा। एस संसारा रे खास लोके मेरे किन्हें नफरत कीती, होर मेरी वजहा ले तिन्हा तुस्से भी तंग करणे होर मारी देणे। एस संसारा मन्झ तुस्से दुःखी हूंणें, पर मज़बूत बणा, क्यूंकि मैं एस संसार पर राज करणे वाला सैतान हराई दितेया। अगर तुस्से आखरी तक मेरे भरोसे रे लायक बणी रहो, ता परमेसरा तुस्से बचाणे!"

यीसूए आपणे चेले ये समझाणे रे कठे एक कहाणी सुणाई कि जेबे संसारा रा अंत हूंणां ता लोका साऊगी क्या हूंणां। तिन्हें बोल्या, "केसी म्हाणुँऐं आपणे डोर्हिया मन्झ खरा बीज बाह्या। जेबे से सई गया ता तेसरा दुस्मण आया होर कणका रे बीजा रे बीचा मन्झ जंगली बूटे रे बीज बाही दिते, होर फेरी से चली गया।"

जेबे बूटे जम्मी गए ता सेऊआदारे तेस म्हाणुँ किन्हें बोल्या, 'हे माल्क जी, तुस्से ता आपणी डोर्हिया मन्झ खरा बीज बाईरा था। ता फेरी एता मन्झ जंगली बूटे केथी ले आए?' तिन्हें म्हाणुँऐं जवाब दितेया, 'सिर्फ मेरा दुस्मण ई तिन्हा जो बाई सक्हा। ये मेरा कोई दुस्मण आ जिने एह्ड़ा कितेया।'

तिन्हें सेऊआ दारे आपणे माल्का जो जवाब दितेया, 'क्या आस्सा जो जंगली बूटे पटी देणे चहिए?' तिन्हें माल्के बोल्या, 'नी। अगर तुस्से एह्ड़ा करघे ता तुस्सा कुछ कणक भी पटी देणी। कटाई के टैमा तक इंतजार करा। तेबे जंगली बूटेया रे भारे बान्ही किन्हें कठे करी लया ताकि तुस्से तिन्हा जो फुकी सको। पर कणका जो मेरे गोदामा मन्झ लई किन्हें आऊआ।'

चेले एस्सा कहाणी रा मतलब नी समझी पाए, इधी कठे तिन्हें यीसू किन्हें तिन्हा जो समझाणे री अर्ज किती। यीसूए बोल्या, "खरा बीज बाहणे वाला म्हाणुँ मसीह जो दस्हा। डोर्हिया संसारा जो दस्हा ई। खरा बीज परमेसरा रे राज्य रे लोका जो दस्हा ई।"

जंगली बूटे तेस बुरे आदमी, सैताना रे लोका जो दस्हा ऐ। तेस म्हाणुँ रा दुस्मण सैताना जो दस्हा, जिने जंगली बूटे बाई दिते। कटाई एस संसारा रा अंत दस्हा ई, होर कटाई करणे वाले परमेसरा रे स्वर्गदूता जो दस्हा ऐ।

जेबे संसारा रा अंत हूंणां तेबे स्वर्गदूता स्यों सभ लोक कठे करणे जो सैताना रे ऐ। तिन्हा स्वर्गदूता स्यों एक बौह्त ही गर्म आगी मन्झ सटी देणे। तेथी तिन्हा लोका भयंकर तकलीफा मन्झ रोणा होर आपणे दांद किर्ड़णे। पर जो लोक धर्मी ऐ, जो यीसू रे पीछे चल्हा ऐ, तिन्हा तिन्हारे बापू परमेसरा रे राज्या मन्झ सूरजा साहीं चमकणा।

यीसूए ये भी बोल्या कि तेस संसारा रा अंत हूंणें ले पैहले धरती पर वाप्स आऊणा। तेस तेस ई तरीके ले वाप्स आऊणा जिहां से गया था। यानि, तेस वाले असली सरीर हूंणां, होर तेस सर्गा मन्झ बादला पर सुआर हुई किन्हें आऊणा। जेबे यीसूआ वाप्स आऊणा, ता हर एक मरी चुकिरे मसीह लोका जिऊन्दे हुई जाणा होर तेस किन्हें सर्गा मन्झ मिलणा।

तेबे जो मसीही ऐबे भी जिऊन्दे ऐ स्यों सर्गा मन्झ चकी दिते जाणे होर तिन्हा मुर्देया मंझा ले जिऊन्दे हूंणें वाले दूजे मसीहिया साऊगी सामिल हुई जाणा। स्यों सभ तेथी यीसू रे साऊगी हूंणें। तेता ले बाद, यीसूआ आपणे लोका साऊगी रैहणा। जेबे तिन्हा कठे मिली किन्हें रैहणा ता तिन्हा वाले हमेसा रे कठे पूरी सांति हूंणीं।

यीसूए तेस पर विस्वास करणे वाले हर एक आदमी जो एक ताज देणे रा वादा कितिरा। तिन्हा हमेसा रे कठे परमेसरा साऊगी हर एक चीजा पर राज करणा। तिन्हा वाले पूरी सांति हूंणीं।

पर परमेसरा तिन्हा सभिरा न्याय करणा जो यीसू पर विस्वास नी करदे। तेस स्यों नरका मन्झ पाई देणे। तेथी तिन्हा रोणा होर आपणे दांद किर्ड़णे, होर तिन्हा हमेसा दुःखी हुंदे रैहणा। कधी नी बुझणे वाली आगिया स्यों लगातार फुकदे रैहणे, होर तिन्हा जो खाणे वाले कीड़ेया कधी नी रुकणा।

जेबे यीसूआ वाप्स आऊणा, ता तेस पूरे तरीके ले सैतान होर तेसरा राज्य नास करी देणा। तेस सैतान नरका मन्झ पाई देणा। तेथी सैताना हमेसा रे कठे फुख्दे रैहणा, तिन्हा सभी साऊगी जिन्हें परमेसरा री गल्ला मन्नणे रे बजाए सैताना रे पीछे चलणे रा फैसला लया था।

क्यूंकि आदम होर हव्वे परमेसरा रा हुक्म नी मन्नेया था होर पाप एस संसारा मन्झ लई किन्हें आए थे, परमेसरे तेस जो स्राप दितेया होर तेस जो नास करणे रा फैसला कितेया। पर केसी ध्याड़े परमेसरा एक नंऊँऐं स्वर्ग होर एक नौंईं धरती री रचना करणी जो बिलकुल सही हूंणी।

यीसू होर तेसरे लोका तेस्सा नौंईं धरती पर रैहणा, होर तेस हमेसा रे कठे सभ चीजा पर राज करणा। तेस लोका री हाखिया ले हर एक आँसू मिटाई देणे। ऐबे कोई भी परेसान या दुःखी नी हूंणां। तिन्हा रोणा नी। तिन्हा बीमार नी हूंणां या मरणा नी। होर तेथी कुछ भी बुराई नी हूंणीं। यीसू आपणे राज्य पर सही न्याय करी किन्हें, होर सांति साऊगी राज करणा। तेस हमेसा रे कठे आपणे लोका साऊगी रैहणा।