49. परमेसरा री नौंईं वाचा

एक स्वर्गदूते एक जुआन ज्नाने मरियमा किन्हें बोल्या कि तेस्सा परमेसरा रे म्हठे जो जन्म देणा। से हल्ली कुआरी थी, पर पवित्र आत्मा तेस्सा वाले आई होर से गर्भवती हुई। तेस्से एक म्हठे जो जन्म दितेया जेसरा नांऊँ तेस्से यीसू रख्या। इधी कठे, यीसू परमेसर होर म्हाणुँ दोनों आ।

यीसूए बौह्त सारे चमत्कार किते जो ये दस्हा ऐ कि से परमेसर आ। से पाणी पर चल्या होर आँधी जो सांत किती। तिन्हें बौह्त सारे बीमार लोक ठीक किते होर बौह्त सारे लोका मंझा ले दुष्ट आत्मा काढी। तिन्हें मरीरे लोक जिऊन्दे करी दिते, होर तिन्हें पांज रोटी होर दो मछिया 5,000 लोका जो खुआणे रे कठे भतेरे खाणे मन्झ बदली दितेया।

यीसू एक महान गुरु भी थे। जो कुछ भी तिन्हें स्खाया, से तिन्हें ठीक ढंगा किन्हें सही स्खाया। जो से लोका जो करणे रे कठे बोल्हा से तिन्हा जो करणा चहिए क्यूंकि से परमेसरा रा म्हठा आ। उदाहरणा रे कठे, तिन्हें स्खाया कि तुस्सा जो दूजे लोका किन्हें तेस ई तरीके ले प्यार करणे री जरूरत ई जिहां तुस्से आपु जो प्यार करहा ऐ।

तिन्हें ये भी स्खाया कि तुस्सा जो सभ चीजा ले ज्यादा होर आपणी जायदादा ले भी ज्यादा परमेसरा जो प्यार करणा चहिए।

यीसूए बोल्या कि संसारा मन्झ कोई भी चीज हासल करणे ले ज्यादा खरा आ परमेसरा रा राज्य हासल करणा। तेसरे राज्या मन्झ तुस्सा रा दाखल हूंणां बौह्त जरूरी आ ताकि परमेसर तुस्सा जो तुस्सा रे पापा ले बचाए।

यीसूए बोल्या कि कुछ लोका से ग्रैहण करणा। परमेसरा स्यों लोक बचाणे। पर दूजे लोका से ग्रैहण नी करणा। तिन्हें ये भी बोल्या कि कुछ लोक खरी जमीना साहीं ऐं, क्यूंकि स्यों यीसू रे बारे मन्झ खरी खबर ग्रैहण करी लैहां ऐं, होर परमेसर तिन्हा जो ब्चाहाँ। पर कुछ लोक पैंडे री काठी जमीना साहीं ऐं। परमेसरा रा वचन बीजा साहीं पैंडे पर पई ता जाहाँ, पर तेथी कुछ भी नी जमदा। ये लोक यीसू रे बारे मन्झ खरी खबर ग्रैहण नी करदे। स्यों तेसरे राज्या मन्झ जाणे ले नाहं करी देहां ऐं।

यीसूए स्खाया कि परमेसर पापिया किन्हें बौह्त प्यार करहा। से तिन्हा जो माफ करणा चाहाँ होर तिन्हा जो आपणे बच्चे बनाणा चाहाँ।

यीसूए ये भी दस्या कि परमेसर पापा ले नफरत करहा ऐ। क्यूंकि आदम होर हव्वे पाप कितेया, इधी कठे तिन्हारे सारे बंसा रे लोके भी पाप कितेया। एस संसारा मन्झ रैहणे वाला हर एक आदमी पाप करहा होर परमेसरा ले दूर आ। हर एक आदमी परमेसरा रा दुस्मण आ।

पर परमेसरे एस संसारा मन्झ रैहणे वाले हर एक आदमी किन्हें एस तरीके ले प्यार कितेया: कि तिन्हें आपणा इकलौता म्हठा कुर्बान करी दितेया ताकि परमेसर तिन्हा जो सजा नी दे जो तेस पर विस्वास करहा ऐ। एता रे बजाए, तिन्हा तेस साऊगी हमेसा रे कठे रैहणा।

तुस्से मरणे रे लायक ऐ, क्यूंकि तुस्से पाप कितिरा। परमेसरा जो तुस्सा पर गुस्सा करणा चहिए, पर एता रे बजाए, तिन्हें आपणा सारा गुस्सा यीसू पर गुस्सा तुआरी दितेया। तिन्हें यीसू जो क्रूसा री मौत देई किन्हें सजा दिती।

यीसूए कधी पाप नी कितेया, पर तिन्हें परमेसरा जो तेस जो सजा देणे री इजाजत दिती। तिन्हें मरी जाणा ग्रैहण करी लया। एस तरीके ले, तुस्सा रे पाप होर एस संसारा मन्झ रैहणे वाले हर एक आदमी रे पाप उठाए जाणे रे कठे से एक सिद्ध बलिदान था। यीसूए आपु जो परमेसर रे कठे बलिदान करी दितेया, इधी कठे परमेसर कोई भी किस्मा रा पाप, एथी तक कि भयंकर पाप भी माफ करहा।

चाहे अगर तुस्से बौह्त सारे खरे काम करदे हो, ता एता रे ज्रीए परमेसरा तुस्से नी बचाणे। तेसरे दोस्त बणने रे कठे एह्ड़ा कुछ भी नी आ जो तुस्से कर सक्हा ऐ। एता रे बजाए, तुस्से सिर्फ विस्वास करा कि यीसू परमेसरा रा म्हठा आ, होर से तुस्सा रे बदले मन्झ क्रूसा पर मरी गया, होर ये भी कि परमेसरे से द्बारा जिऊन्दा करी दितेया। अगर तुस्से एस गल्ला पर विस्वास करघे, ता परमेसरा तुस्सा रे पाप माफ करी देणे।

परमेसरा स्यों हर एक आदमी बचाणे जो यीसू पर विस्वास करहा ऐ होर तेस जो आपणा प्रभु मन्हा। पर तेस स्यों नी बचाणे जो तेस पर विस्वास नी करदे। ये जरूरी नी आ कि तुस्से अमीर हो या गरीब हो, आदमी हो या ज्नाने हो, स्याणे हो या जुआन हो, या तुस्से केथी रैहन्दे हो। परमेसर तुस्सा किन्हें प्यार करहा होर चाहाँ कि तुस्से यीसू पर विस्वास करे कि से तुस्सा रा दोस्त बणी सके।

यीसू तुस्सा जो सादेया करहा कि तेस पर विस्वास करा होर बप्तिस्मा लऊआ। क्या तुस्से विस्वास करहा ऐ कि परमेसरा रा एकलौता म्हठा, यीसू ई मसीह आ? क्या तुस्से विस्वास करहा ऐ कि तुस्से एक पापी म्हाणुँ ऐं होर ये कि तुस्से परमेसरा रे ज्रीए सजा रे हकदार ऐ? क्या तुस्से विस्वास करहा ऐ कि तुस्सा रे पाप मिटाणे रे कठे यीसू क्रूसा पर मरेया?

अगर तुस्से यीसू पर होर जो तिन्हें तुस्सा रे कठे कितेया तेस पर विस्वास करहा ऐ, ता तुस्से एक मसीही ऐ! सैतान आपणे न्हयारे रे राज्या मन्झ ऐबे तुस्सा पर राज नी करदा। ऐबे परमेसर आपणे प्रयासे रे राज्या मन्झ तुस्सा पर राज करहा। तिन्हें तुस्से पाप करणे ले रोकी दितिरे, जो तुस्से करदे रैह्याँ ऐं थे। तिन्हें तुस्सा जो एक नौंईं, सही जिन्दगी दितिरी।

अगर तुस्से एक मसीही ऐ ता जो यीसूए कितिरा तेता रे वजहा परमेसरे तुस्सा रे पाप माफ करी दितिरे। ऐबे, परमेसर तुस्सा जो एक दुस्मणा रे बजाए एक पक्का दोस्त मन्हा।

अगर तुस्से परमेसरा रे दोस्त ऐ होर प्रभु यीसू रे सेऊआ दार ऐ ता तुस्सा जो तिन्हा गल्ला रा पालन करणे री इच्छा करणी चहिए जो यीसू तुस्सा जो स्खाहाँ। चाहे तुस्से एक मसीही ऐ, सैताना ऐबे भी पाप करणे रे कठे तुस्सा री परखणी करणी। पर परमेसर हमेसा से करहा जो से बोलणे रे कठे बोल्हा कि अगर तुस्से आपणे पाप मन्नी लो, ता तेस तुस्से माफ करी देणे। तेस तुस्सा जो पापा रे बरख्लाफ लड़णे री सक्ति देणी।

परमेसर तुस्सा जो प्रार्थना करणे होर तेसरे वचन पढ़ने रे कठे बोल्हा। से तुस्सा जो दूजे विस्वासिया साऊगी मिली किन्हें कर तेसरी अराधना करणे रे कठे भी बोल्हा। तुस्सा जो दूजे लोका जो भी दसणा पऊणा कि तिन्हें तुस्सा रे कठे क्या कितेया। अगर तुस्से ये सभ काम पुरे करघे, ता तुस्सा तेसरे एक पक्के दोस्त बणी जाणा।