48. यीसू ई वादा कितिरा मसीह आ

जेबे परमेसरे संसार बणाया ता सभ कुछ खरा था। कोई पाप नी था। आदम होर हव्वा एक दूजे किन्हें प्यार करहा ऐ थे, होर स्यों परमेसरा किन्हें प्यार करहा ऐ थे। कोई ब्मारी या मौत नी थी। परमेसर एह्ड़ा ई संसार चाहाँ था।

सैताने सर्पा रे ज्रीए बगीचे मन्झ हव्वा साऊगी गल्ला कीती, क्यूंकि से तेस्सा जो धोखा देणा चाहाँ था। तेबे हव्वा होर आदमे परमेसरा रे बरख्लाफ पाप कितेया। क्यूंकि तिन्हें पाप कितेया था इधी कठे धरती पर रैहणे वाले सभ आदमी मरहा ऐं।

क्यूंकि आदम होर हव्वे पाप कितेया था, इधी कठे कुछ होर भी बुरा हुआ। स्यों परमेसरा रे दुस्मण बणी गए। एस वजहा ले, तेबे ले हर एक म्हाणुँऐं पाप कितिरा। हर एक आदमी जन्मा ले ई परमेसरा रा दुस्मण आ। परमेसर होर लोका रे बीचा मन्झ सांति नी थी। पर परमेसर सांति स्थापित करणा चाहाँ था।

परमेसरे वादा कितिरा था कि हव्वा रा एक बंस सैताना रा मूंड कुचलणा। तिन्हें ये भी बोल्या कि सैताना तेसरी आडी डसणी। दूजे सब्दा मन्झ बोलिए ता, सैताना मसीह मारी देणा, पर परमेसरा से दबारा जिऊन्दा करी देणा। एता ले बाद, मसीहा सैताना री सक्ति हमेसा रे कठे खत्म करी देणी। कई साला ले बाद, परमेसरे दसी दितेया कि से मसीह यीसू आ।

जेबे परमेसरे संसारा रे सारे लोक बाढ़ भेजी किन्हें नास किते ता तिन्हें तेस पर विस्वास रखणे वाला परिवार बचाया जो तेस पर विस्वास करहा था। तिन्हें नूहा जो एक किस्ती बनाणे रे कठे बोल्या ताकि एस तरीके ले परमेसरे तिन्हा लोका जो बचाए जो तेस पर विस्वास करहा ऐ थे। ठीक तिहां ईं, स्यों सभ के सभ परमेसरा रे ज्रीए मारे जाणे रे लायक थे क्यूंकि तिन्हें पाप कितेया था। पर परमेसरे तेस पर विस्वास करणे वाले जो बचाणे रे कठे यीसू भेज्या।

कई सौ साला तक, याजक परमेसरा रे कठे बलिदान चढ़ान्दे रहे। एस गल्ला ले ये पता चल्हा कि लोके पाप कितेया, होर ये भी पता चल्हा कि स्यों परमेसरा रे ज्रीए मिलणे वाली सजा रे लायक थे। पर स्यों बलिदान तिन्हारे पाप माफ नी करी सके। यीसू सभी ले बड़ा महायाजक आ। तिन्हें से कितेया जो कोई याजक नी करी सक्दा था। तिन्हें से सिर्फ एक ई एक बलिदान हूंणें रे कठे आपणे आपा री बलि देई दिती जो हर केसी रे पाप मिटाई सक्हा ई थी। तिन्हें मन्नी लया कि परमेसर तिन्हा सभी रे पापा रे कठे तेस जो सजा दे। एस वजहा ले, यीसू सिद्ध महायाजक था।

परमेसरे अब्राहमा किन्हें बोल्या, "मैं तेरे ज्रीए संसारा रे सभ कुला जो आसरीवाद देणा।" यीसू एसी अब्राहमा रा बंस था। परमेसर अब्राहमा रे ज्रीए सभ कुला जो आसरीवाद देहां, क्यूंकि जो यीसू पर विस्वास करहा ऐं परमेसर तिन्हा सभी जो पापा ले बचाहाँ। जेबे ये लोक यीसू पर विस्वास करहा ऐ, ता परमेसर तिन्हा जो अब्राहमा रे बंस मन्हा।

परमेसरे अब्राहमा किन्हें बोल्या कि से आपणा म्हठा, तेसरे कठे बलिदान करी दे। पर फेरी परमेसरे इसहाका रे बदले मन्झ बलि करणे रे कठे एक गाभू दितेया। आस्से सभ आपणे पापा रे कठे मारे जाणे रे लायक थे! पर परमेसरे आस्सा री जगहा पर मरणे रे कठे यीसू जो बलिदाना रे रूपा मन्झ देई दितेया। एसी वजहा ले आस्से यीसू जो परमेसरा रा गाभू बोल्हा ऐ।

जेबे परमेसरे मिस्र देसा पर आखरी विपत्ति भेजी ता तिन्हें हर एक इस्राएली परिवारा किन्हें बोल्या कि स्यों एक गाभू बलि करे। से गाभू बिलकुल खरा हो तेस मन्झ कोई कमी नी हो। तेबे आपणे दरवाजे री चौखटा रे ऊपर होर ओरे परे द्वार साखा पर तेसरा खून लगाया। जेबे परमेसरे से खून देख्या ता से तिन्हारे घरा ले अगे बढ़ी गया होर तिन्हारे पहलौठे म्हठे नी मारे गए। जेबे ये हुएआ ता परमेसरे एता जो फसहा रा साजा बोल्या।

यीसू फसहा रे साजे रा एक गाभू साहीं आ। तिन्हें कधी पाप नी कितेया, इधी कठे तेस मन्झ कुछ भी गलत नी था। से फसहा रे साजे रे टैमा पर मरेया। जेबे कोई यीसू पर विस्वास करहा, तेबे यीसू रा खून तेस म्हाणुँ रे पापा री कीमत चुकाहां। ये एह्ड़ा आ जिहां कि परमेसर तेस म्हाणुँ वाले से अगे बढ़ी गया हो, क्यूंकि से तेस जो सजा नी देंदा।

परमेसरे इस्राएली लोका साऊगी एक वाचा बान्हीं, क्यूंकि स्यों एह्ड़े लोक थे जिन्हा जो परमेसरे आपणा हूंणें रे कठे चुणेया था। पर ऐबे परमेसरे एक एह्ड़ी वाचा बान्हीं जो कि सभी रे कठे ई। अगर केसी भी जाति रा कोई भी आदमी एस्सा नौंईं वाचा जो मन्नघा, ता तेस परमेसरा रे लोका मन्झ मिली जाणा। से एह्ड़ा इधी कठे करहा क्यूंकि से यीसू पर विस्वास करहा।

मूसा एक एह्ड़ा नबी था जिने परमेसरा रा वचन बड़ी सामर्था किन्हें प्रचार कितेया था। पर यीसू सभ नबीया मन्झ सभी ले बड़ा आ। से परमेसर आ, इधी कठे जो कुछ भी तिन्हें कितेया होर बोल्या से परमेसरा रे काम होर वचन थे। इधी कठे पवित्र-सास्त्र यीसू जो परमेसरा रा वचन बोल्हा।

परमेसरे राजा दाऊदा किन्हें वादा कितिरा था कि राजे रे रूपा मन्झ तेसरा एक बंस परमेसरा रे लोका पर हमेसा रे कठे राज करणा। यीसू परमेसरा रा म्हठा होर मसीह आ, इधी कठे से राजा दाऊदा रा बंस आ जो हमेसा रे कठे राज्य करी सक्हा।

दाऊद ता इस्राएला रा राजा था, पर यीसू सारे संसारा रा राजा आ! तेस दबारा आऊणा होर हमेसा रे कठे न्याय होर सांति साऊगी आपणे राज्या पर राज करणा।