47. फिलिप्पी नगरा मन्झ पौलुस होर सीलास

जेबे साऊले पुरे रोमी राज्या मन्झ सफर कितेया तिन्हें आपणे रोमी नांऊँ "पौलुस" रा इस्तेमाल करणा सुर्हू करी दितेया। एक ध्याड़े, पौलुस होर तेसरा दोस्त सीलास फिलिप्पी नगरा मन्झ यीसू रे बारे मन्झ खरी खबर सुणाणे रे कठे गए। स्यों नगरा रे बाहर नदी रे बाढे एक जगहा पर गए, जेथी लोक प्रार्थना करणे रे कठे कट्ठा थे। तेथी स्यों लुदिया नांऊँआं री एक ज्नाने किन्हें मिले जो एक व्यापार करने वाली थी। से परमेसरा किन्हें प्यार करहा ई थी होर तेसरी अराधना करहा ई थी।

परमेसरे लुदिया जो यीसू रे बारे मन्झ मिलिरे संदेसा पर विस्वास करणे रे लायक बणाया। पौलुस होर सीलासे तेस्सा जो होर तेस्सा रे परिवारा जो बप्तिस्मा दितेया। तिन्हें पौलुस होर सीलास आपणे घरा रुकणे रे कठे सादे, इधी कठे स्यों तेथी रुकी गए।

पौलुस होर सीलास लोका किन्हें हमेसा तेस जगहा पर मिल्हा ऐं थे जेथी यहूदी लोक प्रार्थना करदे रैह्याँ ऐं थे। हर रोज जेबे स्यों तेथी जाहें थे ता एक नौकराणी म्हठी जो दुष्ट आत्मा रे कब्जे मन्झ थी से तिन्हारा पीछा करदी रैह्याँ थी। एस्सा दुष्ट आत्मा रे ज्रीए से लोका रा भविस्य दस्हा ई थी, इधी कठे से भविस्य दसणे वाली रे रूपा मन्झ आपणे माल्का रे कठे बौह्त ढब्बे क्माहीं थी।

तिन्हारे जाणे रे टैम ये दासी म्हठी चिल्लाई किन्हें बोल्हा ई थी, "ये आदमी परम प्रधान परमेसरा रे सेऊआदार ऐ। ये तुस्सा जो उद्धार पाणे रा पैंडा दस्या करहा ऐ!" से हर रोज एह्ड़ा ई करहा ईं थी जेस वजहा ले पौलुस नराज़ हुई गया।

आखरी मन्झ, एक ध्याड़े जेबे तेस्से दासी म्हठिऐ चिल्लाणा सुर्हू कितेया, ता पौलुसे तेस्सा वखा जो मुड़ी किन्हें तेस्सा रे अंदरा री दुष्ट आत्मा किन्हें बोल्या, "यीसू रे नांऊँआं ले एस्सा मंझा ले निकली जा।" तेस ई टैम तेस्से दुष्ट आत्मे से छाडी दिती।

तेस्सा दासी म्हठी रे माल्क बौह्त गुस्से हुई गए। तिन्हा जो पता चली गया कि बगैर तेस्सा दुष्ट आत्मा रे से दासी म्हठी लोका जो भविस्य नी दसी सक्दी थी। एता रा मतलब था कि लोका ऐबे तेस्सा रे माल्का जो ढब्बे नी देणे ताकि से तिन्हा जो भविस्य दसे कि तिन्हा साऊगी क्या हूंणां।

इधी कठे तेस्सा दासी म्हठी रे माल्क पौलुस होर सीलासा जो रोमी हाक्मा वाले लई गए। तिन्हें पौलुस होर सीलास पीटे, होर फेरी स्यों जेल्हा मन्झ पाई दिते।

तिन्हें पौलुस होर सीलास जेल्हा रे एह्ड़े हिस्से मन्झ रखे जेथी पर सभी ले ज्यादा स्पाही थे। एथी तक कि तिन्हें तिन्हारे पैर लकड़ी रे बड़े टुकड़े मन्झ जोड़ी दिते। पर पौलुस होर सीलास आधी राती, परमेसरा री बड़ाई रे गीत गाया करहा ऐ थे।

अचानक से, एक जबरदस्त हिलण हुएआ! जेल्हा रे सारे द्वार खुल्ही गए, होर सारे कैदिया रे सांगल खुल्ही किन्हें पई गए।

तेबे दरोगा जागी गया। तिन्हें देख्या कि जेल्हा रे द्वार खुल्ही गईरे थे। तिन्हें सोच्या कि सारे कैदी बची किन्हें भगी गए। से डरी गया कि तिन्हारे भगी जाणे री वजहा ले रोमी हाक्मा से मारी देणा, इधी कठे से आपु जो मारणे री रे कठे त्यार हुई गया! पर पौलुस तेस जो देखी किन्हें चिल्लाया, "रुकी जा! आपु जो नुकसान मत कर। आस्से सभ एथी ऐ।"

तिन्हें दरोगे काम्दे हुए पौलुस होर सीलासा वाले आई किन्हें पूछेया, "उद्धार पाणे रे कठे हांऊँ क्या करूँ?" पौलुसे जवाब दितेया, "प्रभु यीसू पर विस्वास कर, तेबे तुध होर तेरे घराने उद्धार पाणा।" तेबे से दरोगा पौलुस होर सीलासा जो आपणे घर लई गया होर तिन्हारे जख्म धोए। पौलुसे तेसरे घरा रे सभ लोका जो यीसू रे बारे मन्झ खरी खबर सुणाई।

दरोगा होर तेसरे पूरे परिवारे यीसू पर विस्वास कितेया, इधी कठे पौलुस होर सीलासे तिन्हा जो बप्तिस्मा दितेया। तेबे दरोगे पौलुस होर सीलासा जो खाणा खुआया, होर तिन्हें कठे हुई किन्हें खुसी मनाई।

अगले ध्याड़े नगरा रे अगुवे पौलुस होर सीलास जेल्हा ले अजाद करी दिते होर फिलिप्पी ले चले जाणे रे कठे बोल्या। पौलुस होर सीलास लुदिया होर कुछ दूजे दोस्ता किन्हें मिले होर तेता ले बाद नगरा ले निकली गए। यीसू रे बारे मन्झ खरी खबर फैल्दी गई, होर कलीसिया बढ़दी गई।

पौलुस होर दूजे मसीही अगुवे बौह्त सारे नगरा रा सफर कितेया। तिन्हें लोका जो यीसू रे बारे मन्झ खरी खबर सुणाई। तिन्हें कलीसिया रे विस्वासी जो हिम्मत बढ़ाणे होर उपदेस देणे रे कठे कई चिट्ठिया भी लिखी। इन्हा मंझा ले कुछ चिट्ठिया बाईबला री कताबा बणी गए।