46. पौलुस मसीही विस्वासी बणी जाहाँ

साऊल नांऊँआं रा एक म्हाणुँ था जो यीसू पर विस्वास नी करदा था। से जुआन था, होर जेबे स्तिफनुसा जो मारेया करहा ऐ थे ता से तेस टैम से मारणे वाले रे कपड़ेया री देखभाल करेया करहा थे। बादा मन्झ, तिन्हें विस्वासी लोक बौह्त तंग किते। तिन्हें यरूस्लेम सैहरा मन्झ घर-घर जाई किन्हें आदमी होर ज्नानिया दुहें गिरफ्तार करी किन्हें जेल्हा मन्झ पाई दिते। तेबे महायाजके साऊला जो दमिस्क नगरा मन्झ जाणे री इजाजत दीती। तिन्हें साऊला जो बोल्या कि से तेथी रे मसीही लोका जो गिरफ्तार करे होर तिन्हा जो वाप्स यरूस्लेमा मन्झ लई आए।

इधी कठे साऊले दमिस्क नगरा मञ्झ जाणे रा सफर सुर्हू कितेया। तेस नगरा जो पूजणे ले थोड़ा ई पैहले, तेसरे चहुँ वखा ओर सर्गा ले एक चमकदार प्रयासा चमक्या, होर से जमीना पर पई गया। साऊले केसी जो बोल्दे हुए सुणेया, "हे साऊल! हे साऊल! तू मुंजो किधियो तंग करेया करहा?" साऊले पूछेया, "हे प्रभु, तू कुणहां?" यीसूए तेस जो जवाब दितेया, "हांऊँ यीसू आ। जेस जो तू तंग करेया करहा!"

जेबे साऊल उठेया ता तेस जो सुझ्दा नी लगिरा था। तेसरे दोस्त तेस जो दमिस्क नगरा मन्झ लई किन्हें गए थे। साऊले तीन ध्याड़े तक कुछ भी नी खाधेया ना पितेया था।

दमिस्क नगरा मन्झ हनन्याह नांऊँआं रा एक चेला था। परमेसरे तेस किन्हें बोल्या, "तेस घरा जो जा जेथी साऊल रुकिरा। आपणे हाथ तेस पर रख ताकि से दबारा बी देख्दा लगे।" पर हनन्याहे बोल्या, "हे प्रभु, मैं सुणेया कि इने म्हाणुँऐं विस्वासी लोक बौहत तंग कितिरे।" परमेसरे तेस जो जवाब दितेया, "जा! मैं से यहूदिया मन्झ होर दूजी जातिया रे लोका मन्झ मेरे नांऊँ रा एलान करणे रे कठे चुणी लईरा। तेस मेरे नांऊँआं रे कठे बौह्त दुःख सैहन करणे।"

इधी कठे हनन्याह साऊला वाले गया, आपणे हाथ तेस पर रखे, होर बोल्या, "जो कुछ दमिस्क नगरा रे पैंडें मन्झ तेरे साऊगी हुएआ था, एस वजहा ले प्रभु यीसूए हांऊँ तेरे वाले एथी भेजिरा ताकि तू दबारा देख्दे लगे, होर पवित्र आत्मा तुजो भरी दे।" एकदम ई साऊल दबारा देख्दा लग्या, होर हनन्याहे तेस जो बप्तिस्मा दितेया। तेबे साऊले खाणा खाधेया होर तेस जो द्बारा ताकत मिली।

तेबे ले, साऊले दमिस्क नगरा मन्झ रैहणे वाले यहूदिया मन्झ प्रचार करणा सुर्हू करी दितेया। तिन्हें बोल्या, "यीसू ई परमेसरा रा म्हठा आ!"यहूदी लोक हैरान थे, क्यूंकि साऊले ता विस्वासिया जो मारणे री कोसिस किती थी, पर ऐबे तिन्हें यीसू पर विस्वास करी लया। साऊले यहूदिया साऊगी बैहस किती। तिन्हें दस्या कि यीसू ई मसीह था।

बौह्त ध्याड़े ले बाद, यहूदिए साऊला जो मारणे री योजना बणाई। तिन्हें तेस जो मारणे रे कठे नगरा रे फाटका वाले लोक भेजे। ताकि तेस पर नजर रखी सके पर साऊले तेस योजना रे बारे मन्झ सुणी लया, होर तेसरे दोस्ते बची किन्हें निकलणे मन्झ तेसरी मदद कीती। एक राती तिन्हें तेस जो किरडे मन्झ बैठाई किन्हें नगरा री कान्धा ले हेठ तुआरी दितेया। दमिस्क नगरा ले बची किन्हें निकलणे रे बाद साऊले यीसू रे बारे मन्झ प्रचार करणा जारी रख्या।

साऊल प्रेरिता किन्हें मिलणे रे कठे यरूस्लेम सैहरा मञ्झ गया, पर स्यों तेसले डरहा ऐ थे। तेबे बरनबास नांऊँआं रा एक विस्वासी साऊला जो प्रेरिता वाले लई किन्हें गया। तिन्हें तिन्हा जो दस्या कि साऊले बड़ी हिम्मता किन्हें दमिस्का मन्झ प्रचार कितेया। तेसरे बाद, प्रेरिते साऊल अपनाई लया।

कुछ विस्वासी जो यरूस्लेम सैहरा मन्झ हूंणें वाली परेसानी ले भगी गए थे स्यों दूर अन्ताकिया नगरा मन्झ चली गए थे होर यीसू रे बारे मन्झ प्रचार करेया करहा ऐ थे। अंताकिया मन्झ रैहणे वाले लोक ज्यादातर यहूदी नी थे, पर पैहली बारी, तिन्हा मंझा ले बौह्त सारे लोक विस्वासी बणी गए। बरनबास होर साऊल इन्हा नंऊँऐं विस्वासिया जो यीसू रे बारे मन्झ होर ज्यादा स्खाणे रे कठे तेथी गए होर कलीसिया मजबूत किती। यीसू पर विस्वास करणे वाले जो पैहली बार अन्ताकिया मन्झ ई "मसीही" बोल्या गया।

एक ध्याड़े, अन्ताकिया रे मसीही लोक उपवास रखी किन्हें प्रार्थना करेया करहा ऐ थे। पवित्र आत्मे तिन्हा किन्हें बोल्या, "मेरे कठे बरनबास होर साऊला जो से काम करणे रे कठे लग करी देआ दो जेसरे कठे मैं स्यों सादिरे।" इधी कठे अन्ताकिया री कलीसिए बरनबास होर साऊला रे कठे प्रार्थना कीती होर तिन्हा पर आपणे हाथ रखे। तेबे तिन्हें स्यों बौह्त सारी दूजी जगहा पर यीसू रे बारे मन्झ खरी खबरा रा प्रचार करणे रे कठे भेजी दिते। बरनबास होर साऊले लग-लग जातिया रे लोका जो उपदेस दितेया, होर बौह्त सारे लोके यीसू पर विस्वास कितेया।