45. स्तिफनुस होर फिलिप्पुस

पैहले मसीही अगुवे मन्झ स्तिफनुस नांऊँआं रा एक आदमी था। सभ लोक तेसरी इज्जत करहा ऐं थे। पवित्र आत्मे तेस जो बौह्त सक्ति होर बुद्धि दितिरी थी। स्तिफनुसे बौह्त सारे चमत्कार किते थे। जेबे तिन्हें यीसू पर भरोसा करणे रे बारे मन्झ तिन्हा जो उपदेस दितेया ता बौह्त सारे लोके तेस पर विस्वास कितेया।

एक ध्याड़े, स्तिफनुस यीसू रे बारे मन्झ उपदेस देया करहा था, होर कुछ एह्ड़े यहूदी आए जिन्हें यीसू पर विस्वास नी कितेया था होर तेस साऊगी बैहस करणी सुर्हू करी दिती। स्यों बौह्त गुस्से हुई गए, इधी कठे स्यों धार्मिक अगुवे वाले गए होर तेसरे बारे मन्झ झूठ बोल्या। तिन्हें बोल्या, "आस्से स्तिफनुसा जो मूसा होर परमेसरा रे बारे मन्झ बुरी गल्ला बोल्दे सुणेया!" इधी कठे धार्मिक अगुवे स्तिफनुस गिरफ्तार करी लया होर तेस जो महायाजक होर यहूदिया रे दूजे अगुवे रे साम्हणे लई किन्हें आए। होर भी झूठे गुआह आए होर तिन्हें स्तिफनुसा रे बारे मन्झ झूठ बोल्या।

महायाजके स्तिफनुसा ले पूछेया, "क्या ये लोक तेरे बारे मन्झ सच बोल्या करहा ऐ?" स्तिफनुसे महायाजक को जवाब देणे रे कठे बौह्त सारी गल्ला बोलणी सुर्हू करी दिती। तिन्हें बोल्या कि अब्राहमा रे टैमा ले यीसू रे टैमा तक परमेसरे इस्राएला रे लोका रे कठे बौह्त सारे नौखे काम किते। पर लोके हमेसा परमेसरा रे हुक्म नी मन्ने। स्तिफनुसे बोल्या, "तुस्से लोक परमेसरा रे बरख्लाफ जिद्दी होर विरोध करणे वाले ऐ। तुस्से हमेसा पवित्र आत्मा जो नी मन्नदे, जिहां कि आस्सा रे स्याणे हमेसा पवित्र आत्मा नी मन्नी थी होर हमेसा तेसरे नबिया जो मारदे रहे। पर जो तिन्हें कितेया था तेता री बराबरी मन्झ तुस्से होर भी बुरा कितेया! तुस्से मसीह मारी दितेया!"

जेबे तिन्हें धार्मिक अगुवे ये सुणेया, ता स्यों इतने गुस्से हुई गए कि तिन्हें आपणे कान बंद करी लये होर ऊची अवाजा मन्झ चिंगे। स्यों स्तिफनुसा जो खिंजी किन्हें नगरा ले बाहर लई गए होर तेस जो मारणे रे कठे तेस पर पात्थर बरसाए।

जेबे स्तिफनुस मरेया करहा था, से बोली उठेया, "हे यीसू, मेरी आत्मा जो ग्रैहण कर!" तेबे से आपणे जांढू रे भारे हेठ ज्मीना पर पई गया होर द्बारा बोल्दा लग्या, "हे प्रभु, ये हत्या रा पाप तिन्हा पर मत लगान्दा।" तेबे से मरी गया।

तेस ध्याड़े, यरूस्लेम सैहरा मन्झ रैहणे वाले बौह्त सारे लोके यीसू जो मन्नणे वाले लोक तंग करणे सुर्हू करी दिते, इधी कठे विस्वासी लोक दूजी जगहा पर भगी गए। पर एता रे बावजूद भी, जेथी केथी भी स्यों गए तिन्हें यीसू रे बारे मन्झ प्रचार कितेया।

फिलिप्पुस नांऊँआं रा यीसू रा एक विस्वासी था। से भी बाकि कई विस्वासिए साहीं यरूस्लेम सैहर ले भगी गईरा था। से सामरिया के इलाके मन्झ चली गया। तेथी तिन्हें लोका मन्झ यीसू रे बारे मन्झ प्रचार कितेया। बौह्त सारे लोके तेस पर विस्वास कितेया होर उद्धार पाया। एक ध्याड़े, फिलिप्पुसा वाले परमेसरा री वखा ले एक स्वर्गदूत आया होर तेस जो रेगिस्थाना मन्झ जाणे, होर एक सड़का पर चलणे रे कठे बोल्या। फिलिप्पुस तेथी चली गया। जेबे से तेस सड़का पर जाया करहा था, ता तिन्हें एक म्हाणुँ आपणे रथा मन्झ जान्दे हुए देख्या। ये म्हाणुँ कूस देसा रा एक खास हाक्म था। पवित्र आत्मे फिलिप्पुसा किन्हें बोल्या कि जाई किन्हें तेस म्हाणुँ साऊगी-साऊगी चल।

इधी कठे फिलिप्पुस रथा वाले गया। तिन्हें सुणेया कि से कूसी परमेसरा रे वचन पढ़ेया करहा था। जो यसायाह नबिए लिखिरा था से तेस जो पढ़ेया करहा था। से पढ़ेया करहा था, "कि स्यों तेस जो काटे जाणे वाली भेडा साहीं लई गए, होर जिहां एक गाभू सांत हूंहाँ, तिन्हें भी एक सब्द नी बोल्या। तिन्हें तेस साऊगी गलत व्यवहार कितेया होर तेसरी इज्जत नी किती। तिन्हें तेसरा प्राण लई लया।"

फिलिप्पुसे तेस कूसी ले पूछेया, "जो तू पढ़ेया करहा क्या तू से समझ्या करहा कि नी?" तिन्हें कूसी म्हाणुँऐं जवाब दितेया, "नी। जेबे तक कोई एता जो मुंजो नी समझाए, तेबे तक मैं ये नी समझी सक्दा। दया करी किन्हें मेरे वाले आई किन्हें बैठ। यसायाह नबी ये आपणे बारे मन्झ लिख्या करहा था या केसी होरी रे बारे मन्झ?"

फिलिप्पुस रथा पर चढ़ेया होर बैठी गया। तेबे तिन्हें तेस कूसी म्हाणुँ जो से दस्या जो यसायाहे यीसू रे बारे मन्झ लिख्या था। फिलिप्पुसे परमेसरा रे वचना रे बौह्त सारे दूजे हिस्से री भी गल्ला कीती। एस तरीके ले, तिन्हें तेस म्हाणुँ जो यीसू रे बारे मन्झ खरी खबर सुणाई।

फिलिप्पुस होर से कूसी चल्दे हुए पाणी वाले आए। तिन्हें कूसी म्हाणुँऐं बोल्या, "देखा! एथी पाणी आ! क्या हांऊँ बप्तिस्मा लई सक्हा?" होर तिन्हें साथी ले रथ रोकणे रे कठे बोल्या।

इधी कठे स्यों पाणी मन्झ चली गए, होर फिलिप्पुसे तेस कूसी म्हाणुँ जो बप्तिस्मा दितेया। जेबे स्यों पाणी ले बाहर आए, ता पवित्र आत्मा अचानक ई फिलिप्पुसा जो चकी किन्हें केसी दूजी जगहा लई गया। तेथी फिलिप्पुसे लोका जो यीसू रे बारे मन्झ दसणा जारी रख्या।

से कूसी म्हाणुँ आपणे घरा री वखा जो सफर करने रे कठे अगे चली गया। से खुस था कि से ऐबे यीसू जो जाणहां था।