17. देवा दाविदाआरे गोठ

शौल इस्राएला पोयलो राजा आतो. इस्राएल माअहाल जोजे तोहोडो तोअ हारो आन उचो आतो. इस्राएलावोय वार वोरहे शौल राजाय हारा राज कोया.पेन पासे तोअ योक खराब राजा बोनी गोयो आन त्याय देवा आज्ञा मानी नाय, याहाठी देवाय त्या जागावोय राज कोराहाठी बिहरा माअहाल थोव्या.

देवाय शौला पासे दावीद नावा योका इस्राएली जुवान्याल राजा ओरा निवडी लेदा. दावीद ओ बेथलेहेम गावामाने योक मेंडे पाळ्नारो आतो. तो आबहा मेंडे चायतो आतो दाविदाय वारदा मेंडहाल खा येनारा सिंहाल आन अस्वलाल मायला आता. दावीद ओ देवा बिख राखनारो हारो आन सेवा कोयनारो माअहू आतो.

दावीद योक हारो लोडनारो पुढारी जायो. दावीद हानो आतो तोवे त्याय गल्याथ नावा योका राक्षा माअहाआरे लोडाई कोयी.गल्याथ ओ योक हिकाडलो, मजबूत आन तीन मीटर उचो आतो! पेन देवाय दाविदा मदत कोयी आन त्याकोयता गल्याथाल मायीन इस्राएली माअहाल सोडव्ये. त्यापासे दाविदाय इस्राएली लोकहा विरोदयाहा वोय वार जीत मिळव्यो याहाठी माअहाय त्याय वाखान कोयी.

माअहे दाविदा वाखाण कोय ती ऐयीन शौलाल त्या रग ओरा लागी. शौलाय वारदा मारा कोशीश कोयी, पेन दाविदाय स्वतः शौलाहीने दोबीन बोठला गोडदामाय शौल गोयो. पेन शौलाल तो देखायो नाय.दावीद आमी शौला खूब जागेज आतो आन त्याल मोई सकतो आतो,पेन त्याय तेहेके कोया नाय.त्याकोयता, दाविदाय शौला फडकाहा सेडो कातर्यो आन देखाडीन कोया का राजा बोनाहाठी तोअ शौलाल मायी नाय.

सेंले, शौल लोडाईम मोयी गोयो आन दावीद इस्राएला राजा बोन्यो. तोअ खूब हारो राजा आतो आन माअहे त्यावोय माया कोये. देवाय दाविदाल बोरकत देनी आन तोअ हारो जायो. दावीदाय वार लोडाया कोया आन देवाय त्याल इस्राएला विरोदयाहाल आरवाहाठी मदत कोयी. दाविदाय यरुशलेम जिकी आन तील आपे राजधानी बोनाडी. दाविदा काळाम इस्राएल शक्तीवाळा आन धनवान राज्यो बोन्या.

दाविदाल योक मंदिर बादना आता ज्यामाय बादा इस्राएली माअहे देवा सेवा कोरी आन अरपन कोय सकी.लगबग ४०० वोरहे माअहे मोशाय बांदला दर्शना मांडवा हुबूर देवा सेवा कोयते आते आन अरपन लीअ येते आते.

पेन नाथान सेवकाल दाविदाही गोठ लीन दोवाडया, तूअ लोडाई माअहू हेय याहाठी ई मंदिर बांदी सखये नाय. तोअ पोहो ती मंदिर बांदी. पेन आंय तुल खूब बोरकत दिही. तोअज पोहोहामाने योक माअहू मा माअहा वोय राज कोरी! बादी वेले राज कोयनारो दाविदा पोहोहा माने योकुज माअहू ती मशिहा.मशिहा ओ देवा निवडूलो बोरकोती जगामाने माअहाल त्याहा पापाहीने सोडवूनारो आतो.

दाविदाय या शब्द वोनायान ताबाडूज देवाल धन्यवाद कोयो आन त्याय स्तुती कोयी,काहाका देवाय त्याल ओ मान आन खूब बोरकत दाअहाठी वोचन देनला आता. देव ई कोदही पुरा कोरी याबद्दल दाविदाल मालूम नाय आता. पेन मशिहा याआगला इस्राएली माअहाल लगबग १००० वोरहे त्याय वाट ऐरा पोडी.

दाविदाय खोरा आन बोरसा कोय वार वोरहे राज कोया आन देवाय त्याल बोरकत देनी. तेबी,त्या जीवना सेंले त्याय देवा आगला खूब मोठो पाप कोयो.

योक दिही दाविदा बादा सैनिक लोडाईहाठी बारे गोया तोवे, त्याय त्या राजवाडामाने योक खूब हारी बाईल आंगळूता देख्या.तीअ नाव बथशेबा आता.

बिहिरी जागे ऐरा राअदीन, दाविदाय त्ये बाईल त्याहीं लीया आख्यां, याहाठी कादाल तेबी दोवाडया. तोअ तिअआरी हुतो आन तील तीअ गोअ दोवाडी देना. वार वेले पासे माआन मोईना हेय ऐहेके तीअ दाविदाल आखी दोवाडया.

बथशेबा दोनारो उरिया ओ दाविदा हारो लोडनारो आतो. दाविदाय उरीयाल लोडाईमाने पासी हादया आन आपे दोनारी आरी राअ आख्या. पेन बिजा सैनिक लोदाई लोडताहा आन आपा गोअ जायना हारा नाय हेय ऐहेके होमजीन त्याय गोअ जाहाठी नाय आखी देना.याहाठी उरीयाल पासी लोडाईम दोवाडया आन सेनापतील आख्या का त्याय वोदारी लोडाईहि जागावोय उरिया थोवा जोजे मनजे उरिया लोडाईम मोयी जाय.

उरिया मोई गोयो पासे दाविदाय बथशेबा आरी वोराड कोया पासे तीअ दाविदा पोहाल जन्म देनो. दाविदाय कोयला कामाकोय देवल रग कोई येनी. आन त्याय नाथान सेवकाल दाविदाही दोवाडीन त्याय पाप कोलो खराब आतो याबद्दल आख्या. दाविदाय त्याअ पापा कोयता ईत कोया आन त्याल माफ कोया. पासे मोयो ताऊहुदी दाविदाय खोराज कठीण वेले बी देवा आज्ञा पाळ्या.

पेन पापा वोखो ऐहेके त्या पोहो मोई गोयो.दाविदा उगरुला जीवनाम त्याय कुटुंबाम पासे भिडा ओयता रोया आन त्या शक्तीबी खूब कमी जायी. दावीद देवाआरी बोरसोनाय रोयलो आतो तेबी देव त्याअ वोचन पाळाहाठी दाविदाआरी बोरसाकय रोयो.पासे दावीद आन बथशेबा याहाल आजू योक पोहो जायो, आन त्याहाय त्या नाव शलमन ऐहेके थोव्या.