16. तारनारा

यहोशवा मोई गोयो पासे, इस्राएली माअहाय देवा रोका कोया नाय, उरला कनानी माअहाल नाहाडी देअता नाय येना देवा नियम पाळ्या नाय. याशिवाय आन जीवता देवा सेवा नाय कोयता इस्राएली माअहे कनानी देवहा पूजा कोयते लाग्ये. इस्राएलाल राजा नाय आतो, याहाठी बादे जांऐ आपे नजरीके जी हारा त्ये कोयते आते.

इस्राएलीहाय सदा देवा आज्ञा तोडया, देवाय त्याहाल त्याहा विरोडयाहा आगला आर कोयीन सिको देनो. या विरोडयाहाय इस्राएली माअहा वस्तूहू चोरी कोयी, त्याहा धना नाश कोयो आन त्याहामाने खूब माई टाक्ये. खूब वोरहा पासे देवा आज्ञा तोडीना आन विरोडयाहा वोखो कोयीन जायो पासे त्याहाल ईतवा येना आन त्याहाय सुअटा हाठी देवाही दाहू लेदी.

पासे देवाय त्याहाल योक तारनारो दोवाडयो ज्याय त्याहाल विरोदयापाने सोडव्या आन त्याहा माजे शांती उचबाडी देनी. पेन पासे इस्राएली माअहे देवाय विहीराय कोये आन पासी मूर्तीपूजन कोरा लाग्ये. पासे देवाय बाजुमाने मिद्यानी माअहा कोय त्याहाल आरवी देना.

मिद्यानी माअहाय सात वोरहे इस्राएली माअहा अन्न-धान्य पेचकी लेदा. आमी इस्राएली खूब बीई गोया आन आपा मिद्यान्याहा आथाम सापडूहू नाय याहाठी त्या गोडदाम राअ लाग्या. सेंले आपे बोचाव उचबे याहाठी त्या देवाही विनंती कोरा लाग्या.

योक दिही गिदोन नावा योक इस्राएली माअहू मिद्यानी आपे धान्यो चरे नाय याहाठी ठाकाज त्याहाल ऐया कोयतो आतो. यहोवा योक दूत यीन त्याल आख्या, ऐ शक्तीवाळा वीर, देव तोआरे हेय.जो आन इस्राएलीहाल मिद्यान्याहा आथामाने सोडवे.

गिदोना आबहाय योका मूर्तीहाठी वेदी बोनाडली आती. देवाय गिदोनाल ती वेदी तोडा आख्या. पेन गिदोनाल माअहा बिख लागीयाहाठी त्याय आंदारा पोडाहाठी वाट ऐतो आतो.पासे त्याय ती वेदी फोडीन तीअ तुकडा-तुकडा कोया. मूर्तीहाठी बांदली वेदी जागेज त्याय जीवता देवाहाठी योक नवी वेदी बांदी आन त्यावोय देवाल जनावरे चोड्वीन अरपन कोया.

बीजे दिही त्या वेदी कुअ तेबी नाश कोयलो हेय ई ऐयीन माअहाल खूब रोग कोययेनी. गिदोनाल माराहाठी त्याय गोअ गोया, पेन गिदोना आबहाय त्याहाल आख्या तुमा आपे देवा मदत कोराहाठी कोशीश काहा कोतेहे? जर तोअ देव हेय तर त्याल योखलाल हारा कोरा दाअ! त्याय ऐहेके आख्या याहाठी त्याहाय गिदोनाल माअया नाय.

आन मिद्यानी माअहे पासी इस्राएली माअहा धान्य चोरी कोराहाठी येने. त्ये ओले बादे आते का, त्ये गोनाय नाय सक्ये ओले आते. गिदोनाय इस्राएली माअहाल योखठे हादीन मिद्यान्याहा आरी लोडाई लाअ तियार कोये. गिदोनाय देव आपहाल इस्राएली माअहा सूटको कोराहाठी वापर कोराहाठी कोनारो हेय या जाणं पोटा जोजे याहाठी देवाही बेन खुन मागी.

पोयली खून ई गिदोनाय दोरतीवोय फाडको थोव्यो आन देवाल आख्या का हाकाळ हाकाळेहे दोरतीवोय जाकळा नाय पोडता फक्त फडकावोयज पोडा जोजे ऐहेके ओय. देवाय तेहेकेज कोया. बिहिरी राती, त्याय आख्या का दोरती बिजा जोजे पेन फाडको उखालो राअय ऐहेके ओय. देवाय तीबी कोया या बेनी खुनाहा कोय गिदोनाल जाणं पोटी का देव त्या वापर इस्राएलाल मिद्यान्याहा हीने सोडवाहाठी वापर कोनारो हेय.

३२,००० इस्राएली सैनिक त्याही येना, पेन देवाय त्याहाल आख्या का, त्ये खूब हेय. याहाठी लोडाई कोरा बिनारा २२००० सैनिक त्याय पासी दोवाडया. देवाय गिदोनाल आख्या का त्या आजू खूब हेता. याहाठी ३०० सैनिक सोडीन आरदा बादहाल त्याय गोअ दोवाडी देने.

ती राती देवाय गिदोनाल आख्या, तूअ मिद्यान्याहा मांडवा ऐहे जो आन त्या काय आखताहा ई वोनायन बिअतो नाय. याहाठी ती राती तोअ त्या मांडवाऐहे गोयो आन त्याहाल पोडला होपना योक मिद्यानी सैनिक आपे आऱ्याल आखता गिदोन वोनायो. त्या सैनिका आऱ्याय आख्या, या होपना अर्थ गिदोना सैनिक मिद्यानी सैनिकाहाल आरवी ऐहेके ओहे! गिदोन ई वोनायन देवा सेवा कोयी.

आन गिदोन त्याअ सानिकाही पासी येनो आन त्याय बादहाल योक हिंग,योक वेनडला आन योक चुडो देनो. मिद्यानी सैनिक हुतला आता त्याअ मांडवा चोमखी रोय गोया.गिदोना ३०० सैनिकाहाल त्याहा चुडा वेनडलाम माजे थोव्या याहाठी मिद्यान्याहाल उजवाडो देखायो नाय.

आन ,योकूज वेले गिदोना सैनिकाहाय वेनडले फोडये आन आपे चुडहा आग देखाया देनी. त्याहाय ज्या-त्याहा तुताऱ्यो फुक्यो आन आवाज कोयो, त्याहावोय देवा तलवार आन गिदोना तलवार!

देवाय मिद्यान्याहा माय गडबड टाकी देनी आन त्याहाटी त्या त्याहामांयज योका-बीजाल ठोकता लाग्या आन मायता लाग्या.ताबाडूज मिद्तानी लोकहाल नाहाडाहाठी मदत कोराहाठी आर्दा इस्राएली माअहाल त्याहा गोओ हादां दोवाडये. त्याहाय त्यामाने खूबजाहाल मायी टाक्या आन आर्दाहाल इस्राएला दोरतीवोरे नाहाडी देने. त्येज दिही १२०००० मिद्यानी सैनिक माई टाक्या. देवाय इस्राएला ऐहके सूटको कोयो.

माअहे गिदोनाल आपे राजा बोनाडा ऐते आते. गिदोनाय त्याहाल ऐहेके कोरा नाय आख्या, पेन त्याहामाने बादहाय मिद्यान्याहा हीने लेदला होना मुंदहीमाने आर्दया त्याय माग्या. माअहाय गिदोनाल खूब होना देना.

पासे गिदोनाय त्या होनापाने महायाजक पोवे तोहोडा फडकारोका योक फाडका तियार कोया. पेन माअहाय त्या फाडकाल योक मूर्ती होमजीन त्या पूजा कोरा लाग्या. आन देवाय इस्राएलाल पासी वोखो देखाडयो, काहाका त्याहाय मूर्ती पूजन कोयला आता. देवाय त्याहा विरूद्याहा हीने आर कोई देनी.सेंले त्याहाय देवाज मदत मागी आन देवाय त्याहाल बिजो तारनारो दोवाडयो.

ई गोठ खुबदा तेहेके-तेहेकेज जायी. इस्राएली पाप कोए,देव त्याहाल वोखो देखाडे, त्या ईतवी लेय आन देव त्याहा तारन कोराहाठी तारनारो दोवाडे. खूब वोरहाहीने, देवाय इस्राएली माअहा ही

त्याहाल विरोदयाहा हीने सोडवाहाठी खूब तारनारा दोवाडया. सेंले, माअहाय बिहरा देशाहां रोको राजा देवाही माग्यो.त्याहाल उचो, हारो आन लोडाईम आगला कोअनारो राजा जोजतो आतो. देवाल ई पोट्या नाय, तेबी त्याय त्याहा मागनी कोय त्याहाल योक राजा देनो.